Ezekiyeli 36

Wumoteswe wo Mulungu, kuli yisi ya Isilayeli

1U Muwaha Mulungu yakatya, “Gwe go munhu wulonje ne matunda ga Isilayeli, wugalonjele nha vyono ganojeye gayihulicize nghani, 2yono ane no Muwaha Mulungu, nghusaka nigalonjele. Hambi i walugu we yisi ya Isilayeli, nha wakwitopa wakutya, ‘I matunda gago ge katali nha geza getu co weneco!’ 3Alu wuwawililaje, wuwalonjele zono ane no Muwaha Mulungu nghuwalonjela nghutya, Lono i makungugo i mekalani ne Waisilayeli, wagasolela no kugateka i matunda ge yisi ya Isilayeli, i makungugo gose gakawa kuwaliganga Waisilayeli. 4Ninga aluno muhulicize zono ane no Muwaha Mulungu nghumulonjelenyi anye nyo matunda ne vigongo, nanye nyo mivwilo ye malenga, ne malolo, na kuli'nye nyo matongo, na kuli'nye nyo makaya gono mwatekwa no kusolwa ne makungugo gono gapilime.

5“Alu nane no Muwaha Mulungu, nghulonjela mwi'kuwo lyangu liwaha, kuli makungugo gose gono gapilime yisi ya Isilayeli, na ko muno kuli yisi ya Edomu. Wono waketemya mu yisi yangu yiwe wutemi wawo, so nyemo ye zinhumbula zawo, wakahasola ne hanhu ho wudimilo wayo. 6Holeka luno, wuyiwililaje yisi ya Isilayeli, wugalonjele matunda ne vigongo, ne mivwilo ye malenga, hamonga ne malolo gose, wuvilonjele zinghani zono ane no Muwaha Mulungu nghuzilonjela mwi'kuwo lyangu, ku soko ye makungugo gono gali wanhu, kuwaliga, no kuwakoza cevu wanhu wangu. 7Nane no Muwaha Mulungu, nghwilahiza nha vyono, i makungugo gose gono gayipilime yisi ya Isilayeli, golokozwa cevu. 8Ninga mucanyha ye matunda ga mu yisi ya Isilayeli, i mibici yolotula kanyhi mahamha, no kumulelelenyi mikalo, anye nyo wanhu wa Isilayeli. Hambi nha mweza behi ku wuze kono kwenyu. 9Na langa, ta! Ane nili ku lubavu lwenyu, nane nghusaka sunga nize mbone yisi yenyu yikulimwa, no kuhadikwa mbeyu. 10Nane nolokonjeza liwalo lyenyu muwe wenji muno. Molokwikala mu makaya gono gaweza matongo, mugazenje kanyhi i makaya gose gono gamwaguka. 11Nane nolokonjeleza liwalo lye wanhu, hamonga ne mitugo. Nanye molokwinjipa muwe wenji muno kuciza nha vyono mwali. Kanyhi molotuga wana wenji muno. Nane nolomulecenyi mwikale du mu yisi yiyo, nha vyono mwekalaga katali. Nolomumotyeni kuciza halulongozi. Vyo yakutya u Muwaha Mulungu. 12Nolomugomolenyi 'nye nyo wanhu wangu Isilayeli, muze mwikale kanyhi mu'si, nayo yolowa yisi yenyu nyo weneco. Nayo yisi hamba si yolowaleka kanyhi i wana wenyu waze wagazice ne lizala.

13“Ane no Muwaha Mulungu nghukutya nhavi, ‘I wanhu wakukutya agwe go yisi, ati, wuli mulya wanhu, na kanyhi ati weza wuli muwulaji we wanhu we nghungugo wulawa lulu, 14agwe si kowa kanyhi wuli mulya wanhu, hamba muwulaga nghungugo yako. Vyo nghutya ane no Muwaha Mulungu. 15Ne yisi si yolohuliciza kanyhi zo wusekwa ne makungugo, hamba kuwawona wanhu wakuyizwajiza kanyhi yisi yenyu. Ne yisi hamba si yolohizizwa kanyhi i wana wayo. Vyo nghutya ane no Muwaha Mulungu.’ ”

I mikalile mipya ye Waisilayeli

16Muwaha Mulungu yakanonjela yakatya nhavi, 17“Gwe go munhu, lono Waisilayeli wali wakali wekaye mu yisi yawo, wene wakeyavufya mu nzila ye metumo gawo. Nghagawona metumo gawo gali mavufywe nho mucekulu mono yali mu vilo vyakwe vyo mwezi. 18Holeka nane nawaleka wawuwone u wukali we likuwo lyangu, ku soko yo wuwulaji wawo wono wetuma mu yisi, na ku soko yo wiyavufye wawo so wuhemba vihwani. 19Nane nghawalipiciza ku soko ye zinzila zawo zimbi ze metumo gawo. Holeka nghawa kuweyagaziza mu zi'si zinjenzi. 20Nawo ho hose hono wabita, wakajendelela du kulikoza cevu, litagwa lyangu lyono lyelile. Sunga ne wanhu wakawa kuwatya, ‘Lanjenyi ta! Awa wo wanhu wo Muwaha Mulungu, ninga alu wakondya kuwuka mu yisi yakwe.’ 21Na yiyi nane yo yikuleka nghulikalalila litagwa lyangu lyono lyelile, vyono wene Waisilayeli, i hanhu hose du hono wakubita, wakulikoza cevu litagwa lyangu.

22“Holeka alu, wuwalonjele wawo Waisilayeli, zono ane no Muwaha Mulungu nghuwalonjela nghutya nhavi, Alu zono nozituma, si nozituma ku soko yenyu anye nyo Waisilayeli, aa ng'o! Langa nozituma ku soko ye litagwa lyangu lyono lyelile, lyono anye mwakondya kulikoza cevu hanhu hose hono mukubita. 23Ninga nane kolo neza kuwalajila we makungugo zo wuwaha wo wele we litagwa lyangu, i litagwa lyono lyatajililwa cevu muli wene, nawo baho ho womanyila vyono ane yo nene Muwaha Mulungu. Vyo nghutya, ane no Muwaha Mulungu. Ane nomwitumamilenyi nyenye du, ho niwalajile makungugo, nha vyono ane nyelile. 24Nomuwusenyi 'nye mu wulawa mu ma'si, na mu makungugo gose, no kumugomolenyi sunga ko ku yisi yenyu. 25Nomumizizenyi malenga maswanu, nimwezenyi mu wavufywe wenyu, ku soko yo wuhemba vihwani wenyu, hamonga ne makani menji du mabi gono gamwavufyajenyi. 26Nomupenyi nhumbula mhya no muhe mupya mugati yenyu. Nomuwusizenyi nhumbula ye 'bwe yono yisina cihuliko muli nyenye, nomupelenyi nhumbula ye cihuliko. 27Nane nomutajilenyi muhe wangu mu zinhumbula zenyu, nayo komupelenyi vilungo ho musume kuwutyatya wulajilize wangu, no kugebata malajilizo gangu gose, gono namupelenyi. 28Nanye ho mosuma kwikala mu yisi yono nawapela i walezi wenyu. Nanye mowa wanhu wangu, nane nowa Mulungu wenyu. 29Nane nomuponyenyi mu wavu wenyu wose. Nowulajiliza wuhemba wuwe winji muno, ho mulece kutuga nzala hamba hadodo. 30Kanyhi nociziliza mikalo ye mibici, hamonga no winji we vilimwa vya mu migunda yenyu, ho halece kuwa ne lizala, lyono lyosuma kumupelenyi cevu ha meso ge makungugo. 31Holeka nanye mokumbucila zinzila zenyu zimbi, ne metumo genyu gono si maswanu, nanye mokwiwona cevu, ku soko yo wubi wenyu hamonga ne mawifyo genyu. 32Ho yimanyice kuli'nye, anye nyo Waisilayeli, nha vyono ane si nghwituma zizi ku soko yenyu nyenye, aa, ng'o! Langa nghwituma nghani zizi, anye ho mukolwe soni no kuwona cevu ku soko ye makani mabi gono mwali kwituma. Vyo nghutya ane no Muwaha Mulungu.”

33U Muwaha Mulungu yakutya nhavi, “Nane kolo nakondya kumwezenyi mu wubi wenyu wose, baho nhondo, ho nolomulecenyi mwikale mu makaya genyu kanyhi, mugazenje kanyhi ne matongo gayo. 34Ne wanhu wose wono wazoweye kukola mu migunda yenyu, wayiwonaga nha vyono yali yisopile ne maselegwa, yawa nha si migunda kanyhi. Ninga ane nomulecenyi kanyhi muyilime. 35Ne wanhu wose kanyhi wotya, nye, muyilangaje ta yisi ayi yono yali yeza nha mbago, alu kumbe yehwana nhe busitani ya Adeni. Alu mulanje ta, sunga ne makaya gono gali gasakala, gambuka, geza matongo, alu wanhu wekaye, wagazenjela sunga ne magomawakali. 36Nhondo baho sunga ne wanhu we makungugo wono wakali womi wono wayipilime Isilayeli, nawo womanya vyono ane no Muwaha Mulungu, yo nene mono nigazengaga kanyhi, i makaya gono geza matongo, no kuhadika kanyhi vilimwa mu migunda yono yali yalekwa. Yo nene Muwaha Mulungu mono nakondya kwihuwiza nha vyono nozituma zizi, na mbeka nozituma.” 37U Muwaha Mulungu yakutya nhavi, “Nane nolowaleka Waisilayeli walombe kanyhi wutazi kuli'ne. Nolowaleka wonjelezece mwi'walo lyawo, wawe wenji nhe 'tewa lye zingholo. 38Ne makaya nago gono gali geza matongo, nhondo golomema wanhu, nha vyono Yelusalemi baho katali, yali yimemile zingholo, zono wazilavyaga makumbiko mu vilo vye zisikukuu. Nhondo nawo ho wolomanyila vyono ane yo nene Muwaha Mulungu.”

Currently Selected:

Ezekiyeli 36: LLKWW

Highlight

Copy