Wutuluce 8

Ligazo lye kejete

Madelu

1U Muwaha Mulungu yakamulonjela Musa yakamutya, “Alu, wubite kuli mutemi Falawo wukamulonjele wumutye, Muwaha Mulungu yakutya nhavi, ‘Wuwakombole wanhu wangu wabite wakahembe nene. 2Na hono wutye du wuleme kuwakombola, ale, noyilipiciza yisi yako, nogagumila madelu mu yisi yako yose. 3Ne likolongo lye Nile lyomema madelu gose, nago gomatuka genjile mu kaya yako, na mu nyumba yako yono kugonaga, na mu citanda cako, na mu zinyumba ze wetumami wako, sunga na mu wanhu wako wose, na ha mafigwa hako, na mu viya vyako vyose vyo kutiwila wusaje. 4Kanyhi gokutambala sunga na mu muwili wako gwegwe, ne wanhu wako, sunga ne wetumami wako wose.’ ”

5Muwaha Mulungu yakamulonjela Musa yakatya, “Wumulonjele Haluni yasole nghome yakwe, yayinule mucanyha ye makolongo na mu vikolongo na mu malamba, gaze madelu gameme mu yisi yose ya Misili.” 6Haluni yakayinula yiyo nghome mucanyha ye malenga gose ge Misili, ne madelu gakalawila menji muno, gakamema mu yisi yose. 7Ninga nawo waganga wakanoza nhavivyo no wuganga wawo, nawo wakagalavya madelu menji, nago gakamema mu yisi yose.

8Mutemi Falawo yakawacema Musa na Haluni, yakawatya, “Ale, mumulombe Muwaha Mulungu yagawuse gaga mabula, nane nowakombola wanhu wenyu, wabite wakamulavizye Muwaha Mulungu makumbiko.” 9Musa yakamupitula Falawo yakamutya, “Ane nosangalala muno nghulombele. Agwe wunonjele du lidaha lyono kosaka ane nghulombele gwegwe, ne wetumami wako, hamonga ne wanhu wako. Ne madelu gose gowuka mu yisi yako, hasina hamba linji lyono lyosigala, langa mwi'kolongo lya Nile du mo gosigala.”

10Nayo mutemi Falawo yakamupitula yakatya, “Ale, nhondo wunombelaje mitondo.” Nayo Musa yakatya, “Ale viswanu, nokwituma nha vyono wulombile. Nagwe nhondo, baho ho komanyila vyono, hasina mulungu yunji wo wose mono yehwanile no Muwaha Mulungu, u Mulungu wetu. 11Nagwe hamonga ne wetumami wako, hamonga ne wanhu wako wose, madelu gomuwucilenyi, hasina linji lyono lyosigala, langa mwi'kolongo lya Nile du mo gosigala.” 12Nawo Musa na Haluni wakawa kuwuka hali mutemi Falawo. Nayo Musa yakalomba kuli Muwaha Mulungu, ho yagawuse madelu gono yali yamugumilila Falawo. 13Nayo Muwaha Mulungu yakanoza nha vyono Musa yalomba, ne madelu gono gali gali mu zikaya, na gono gali gali mwi'hala na mu migunda, gakafwa gose.

14Nawo Wamisili wakagafwaguliza, wakagalundika malundo malundo mawaha muno, sunga ne yisi yose yikawa yina munungho mubi ku soko ye madelu. 15Nayo mutemi Falawo, yali yeza kuwona vyono mabula gose gakondya kufwa, hodu yakawa kanyhi yasina cihuliko, nha vyono Muwaha Mulungu yalonga du yakutya, “Falawo hamba si kowahulika Musa na Haluni.”

Ligazo lye kadatu

Mhani

16Muwaha Mulungu yakamulonjela Musa yakatya, “Wumulonjele Haluni yagatowe manghundi ge yisi ne nghome yakwe, nago manghundi ga mu yisi yose ya Misili, gohunduka mhani.” 17Haluni yakagatowa manghundi ne nghome yakwe, nago manghundi gose ge yisi yose ya Misili, gakahunduka mhani, gakenjila muli wanhu sunga na mu zi nimu mose. 18Nawo waganga wakajela kunoza wuganga wawo ho mhani zijele, ninga wakalemegwa. Nazo zi mhani zikatagalila hanhu hose, na mu wanhu na mu zi nimu. 19Nawo waganga nhondo wakamutya Falawo, “Gwe mutemi Falawo, azi zinozwa no Mulungu du!” Ninga Falawo yakacila kuwa yasina cihuliko, nha vyono Muwaha Mulungu yalonga du yakutya, “Falawo hamba si kowahulika Musa na Haluni.”

Ligazo lye kane

Mahazi

20Muwaha Mulungu yakamulonjela Musa yakatya, “Ale, wilawaje mitondo hakali mitondo muno muno, wuketang'anile no mutemi Falawo lono yakubita kwi' kolongo. Nagwe wumulonjele wutye, Muwaha Mulungu yakutya nhavi, ‘Wuwakombole wanhu wangu wabite wakahembe. 21Nane nghukusugula nghutya, hono wuleme du, ale, nokuletela gwegwe mahazi, mu wetumami wako, na mu wanhu wako sunga na mu zikaya zako. Nazo zikaya zose ze Wamisili, zomema mahazi gose, sunga ne yisi yose yomema mahazi gose. 22Ninga ku yisi ya Gosheni kono wekaye wanhu wangu, ako langa mahazi si gokwinjila yaye. Nane nozinoza zizi, agwe ho wumanye vyono yo nene no Muwaha Mulungu, mono nghuzituma zizi mono yisi yiyi. 23Nane nowika wisimajile kuli wanhu wangu na kuli wanhu wako. Ne lipoto lilino lyokwitumwa mitondo.’ ” 24Hodu, Muwaha Mulungu yakawa kugaleta mawumbi mawaha muno ga mahazi, gakenjila mu wikalo wo mutemi Falawo, hamonga na mu zinyumba ze wetumami wakwe. Yisi yose ya Misili yikahodanjika ku soko ye mawumbi ge mahazi.

25Hanyuma nhondo, mutemi Falawo yakawacema Musa na Haluni yakawalonjela yakatya, “Ale mubite mukamulavizye makumbiko Muwaha Mulungu, u Mulungu wenyu, ninga yiweze bahano du mono yisi yiyino, mulece kubita kunji.” 26Nayo Musa yakamupitula Falawo yakatya, “Si yowa viswanu hamba hadodo hono citume nhavivyo. Hambi Wamisili nha si wokwendezwa yaye ne makumbiko getu, ge zimitugo zono comulavizya Muwaha Mulungu wetu. Na hono cizitumamile zimitugo zizi ciwakalaze Wamisili, so makumbiko gono cokumbicila hanhu hono wosuma kuciwona vyono cikunoza, mbeka wocitowanga ne mabwe sunga waciwulaje. 27Holeka langa, yicinojeye cibite ku nyika muhinzo wa vilo vidatu, kuko ko cikamulavizye makumbiko u Muwaha Mulungu, u Mulungu wetu, nha vyono mwene yacilajiliza.”

28Nayo mutemi Falawo yakatya, “Ale, viswanu, nomukombolenyi mubite mukamulavizye makumbiko u Muwaha Mulungu wenyu kuko ku nyika, ninga mulece kubita kutali muno muno. Ale munombelaje na nene.” 29Musa yakapitula yakatya, “Ale viswanu, nane nonoza mbela mbela, nimulombe Muwaha Mulungu, i mitondo mahazi gawuce mu wikalo wako, hamonga na mu wetumami wako, sunga na muli wanhu wako. Ninga wulanjilile, wulece kucikonga, kanyhi wuwalemeze wanhu walece kubita kumulavizya makumbiko Muwaha Mulungu.”

30Musa yakawuka hali mutemi Falawo, yakamulomba Muwaha Mulungu. 31Nayo Muwaha Mulungu yakanoza nha vyono Musa yalomba. Mahazi gakawuka gose mu kaya yo mutemi Falawo, na kuli wetumami wakwe, sunga na kuli wanhu wakwe, si lyasigala hamba yihazi limonga yaye. 32Ninga hamba no muhinzo wuwu, mutemi Falawo yakawa yasina cihuliko, hamba si yawakombola wanhu wabite yaye.

Currently Selected:

Wutuluce 8: LLKWW

Highlight

Compare

Copy