Wutuluce 6

1Nayo Muwaha Mulungu yakamutya Musa, “Alu langa Musa, ho koziwona zono nozituma kuli yuyo mutemi Falawo. Ane nomudindimiza yawakombole wanhu wangu wabite. Nane mbeka nomudindimiza yawawinje wawuce mu yisi yakwe.”

Mulungu yakumucema Musa

2Mulungu yakamulonjela Musa yakatya, “Ane yo nene Muwaha Mulungu. 3Mono nawalawila Abulahamu, na Isaka, na Yakobo nha Mulungu Mudaha Vyose, ninga hamba sinemanyiza kuli wene kwe litagwa lyangu lyono lyelile, lyo Muwaha Mulungu. 4Hamba nhavivyo, nghanoza cilagane cangu nawo, kanyhi nghawehuwiza vyono nowapela yisi ya Kanani, yisi yono wekala katali nha wajenzi. 5Alu nakondya kucihulika cililo ce Waisilayeli, vyono Wamisili wakuwetumya milimo mizito, nane alu nacikumbucila cico cilagane cangu. 6Ale, wuwalonjele Waisilayeli vyono ane nghuwatya nhavi, ‘Ane yo nene Muwaha Mulungu, nane nomuponyenyi, kanyhi nomuwicenyi welecele, mu wulawa mu wuwanda we Wamisili. Nowinula muwoko wangu we vilungo, niwaletele wulipicizwe wo kogofya, nane nomuponyenyi. 7Nane nomunozenyi muwe wanhu wangu, nane nowa Mulungu wenyu. Nanye ho momanya vyono yo nene Muwaha Mulungu, u Mulungu wenyu, kolo nakondya kumuwusenyi mu wuwanda mu yisi ya Misili. 8Nane nomutegulenyi sunga ko ku yisi yono nakondya kuyiwagula, ku so wihuwizo wono namwihuwiziza Abulahamu, na Isaka, na Yakobo, vyono nowapela. Holeka nane nomupelenyi nyenye yiwe sawo yenyu, ane yo nene Muwaha Mulungu.’ ” 9Nayo Musa yakawa kubita kuwalonjela zizi zose Waisilayeli, ninga wene hamba si wamuhulika yaye, vyono zinhumbula zawo zali zakondya kutulilwa no wusungu ku soko yo wuwanda wawo muzito.

10Muwaha Mulungu yakamulonjela Musa yakatya, 11“Ale, wubite wukamulonjele Falawo mutemi we Misili wutye nhavi, ‘Yimunojeye yawakombole Waisilayeli wawuce mu yisi yakwe.’ ” 12Ninga nayo Musa yakapitula yakatya, “Gwe Muwaha Mulungu, Waisilayeli weneco du hamba si wakuhulika yaye, alu mutemi Falawo yo kohulika hongo? Nane nha vyono ninha, si nili mulonji yaye.” 13Muwaha Mulungu yakawalajiliza Musa na Haluni yakatya, “Muwalonjele Waisilayeli hamonga no mutemi Falawo, vyono yo nene mono nimulajilizenyi muwawuse Waisilayeli wawuce mu Misili.”

Liwalo lye zimhuga za Musa na Haluni

14Lubeni u mwana mulongozi wa Yakobo, yakawa yena wana we cilume wane, nawo wali awa. Hanoci, Palu, Hezeloni, na Kalimu, wali wo walezi we zimhuga zono zikalawilila mu matagwa gawo. 15Nayo Simiyoni yali yena wanagwe wali mutandatu, nawo wali awa, Yemuyeli, Yamini, Ohadi, Yacini, Zohali, na Shawuli, u mwana we cilume mono yali mulelwe no mucekulu we Cikanani, wali wo walezi we zimhuga zono zikalawilila mu matagwa gawo. 16Lawi nayo yali yena wana we cilume wadatu, nawo wali awano, Gelishoni, na Kohati, na Melali, wali wo walezi we zimhuga zono zikalawilila mu matagwa gawo. Lawi yekala myaka yigana limonga na makumi madatu na mupunghati ya mu wikale wakwe. 17Gelishoni nayo yakawa na wana we cilume wejete, nawo wali awano, Libuni, na Shimeyi, nawo wakawa na wana wenji muno. 18Nayo Kohati yakawa yena wana we cilume wane, nawo wali awano, Amulamu, Izihali, Hebuloni, na Uziyeli. Kohati yekala myaka yigana limonga na makumi madatu na midatu. 19Nayo Melali yakawa na wana we cilume wejete, nawo wali awano, Mali, na Mushi. Wawa wo we mhuga ya Lawi hamonga ne wana wawo.

20Amulamu yakamutola Yokebedi u lumbulye lyo sogwe Kohati, nayo yakamulelela wana we cilume wejete, Haluni na Musa. Nayo Amulamu yekala myaka yigana limonga na makumi madatu na mupunghati. 21Izihali nayo yali yena wana we cilume wadatu, nawo wali awano, Kola, Nefeli, na Zicili. 22Nayo Uziyeli, yali yena wana we cilume wadatu, nawo wali awano, Mishayeli, Elizafani, na Sitili.

23Nayo Haluni yakamutola Eliseba, u mwana we cicekulu wa Aminadabu u lumbulye wa Nasoni, nayo yakamulelela wana we cilume awano, Nadabu, Abihu, Eleyezali, na Itamali. 24Nayo Kola yakawa na wana we cilume wadatu, nawo awano, Asili, Elikana, na Abiyasafu, wali wo walezi wo wugawanuce we nghungugo ye Wakola. 25Nayo Eliyeza u mwana we cilume wa Haluni, yakamutola yumonga muyagwe ne wana we cicekulu wa Putiyeli, mono yamulelela u mwana we cilume, litagwa Finehasi. Ale wawa wo wali wawaha we zimhuga zo mulango wa Lawi.

26Wawa Haluni na Musa, wo wawa wono Muwaha Mulungu yalongana nawo yakutya, “Ale, muwawusaje we nghungugo ya Isilayeli, wawuce mu yisi ya Misili.” 27Kanyhi wo wanhu wawo wono wamulonjela mutemi Falawo, yawakombole Waisilayeli.

Lilajilizo lyo Muwaha Mulungu kuli Musa na Haluni

28Muwaha Mulungu lono yalonga na Musa kuko ku yisi ya Misili, 29yamulonjela yakatya, “Ane yo nene Muwaha Mulungu. Holeka wumulonjelaje Falawo mutemi wa Misili zose zono nghukulonjela.” 30Ninga mwene Musa yapitula yakatya, “Gwe Muwaha Mulungu, nha wumanyile 'ne vyono ninha, si nili mulonji yaye, alu yuyo Falawo ho kohulika 'ne hongo?”

Currently Selected:

Wutuluce 6: LLKWW

Highlight

Compare

Copy