Wukumbucize wo Wulajilize 28
28
Wulugutwe wono wukuziza mu wuwa ne cihuliko
(Lawi 26:3-13; Kum 7:12-24)
1“Holeka hono mumogope Muwaha Mulungu, u Mulungu wenyu, hamonga no kwibata ko wihuwilwa i malajilizo gakwe gono nghumulajilizenyi izuwali, ale, nayo komunozenyi muwe yikungugo yiwaha lyono lyowa licizize makungugo ganji gose gono gali mononze yiyi. 2Na hono mumogope no kumuhulika Muwaha Mulungu wenyu, wulugutwe wu wuno wose wowa wenyu nyenye.
3“Muwaha Mulungu, kogalugutiza makaya genyu hamonga ne migunda yenyu.
4“Muwaha Mulungu, komulugutizenyi nyenye, kumupelenyi wana wenji, hamonga ne nhwanga mbaha muno, hamonga ne zimitugo, zing'ombe ne zingholo nyinji muno muno.
5“Muwaha Mulungu, kowulugutiza wuhemba wenyu hamonga no wugali wono wukulawa mumo wono mowa kulya.
6“Muwaha Mulungu, kokulugutiza kolo wukwinjila, kolugutizwa kolo wukulawila.
7“Muwaha Mulungu, komusumilenyi walugu wenyu wose lono wakumuhomenyi. Womuhomenyi ku wulawilila ku lubavu lumonga, ninga wotiza wose hali 'nye weyagale ako na ako.
8“Muwaha Mulungu, koyilugutiza milimo yenyu, ne madongha genyu kogamemya no wuhemba. Kanyhi komulugutizenyi muno muno mu yisi yono yakumupelenyi.
9“Na hono mumogope no kumuhulika Muwaha Mulungu, u Mulungu wenyu, kanyhi mwitume zose zono yakuzilajiliza, ale, nayo komunozenyi muwe wanhu wakwe nha vyono yehuwiza. 10Nawo wanhu wa mono'nze yose, wowona vyono Muwaha Mulungu yakondya kumuhagulenyi muwe wanhu wakwe, baho nawo womogopenyi muno muno. 11Nayo Muwaha Mulungu, komupelenyi wana wenji, ne mitugo minji muno, hamonga ne nhwanga mbaha muno muno, mu yisi yono yawehuwiza i walezi wenyu, vyono komupelenyi. 12Nayo komutonyezezenyi mvula mu vipango vyayo, mvula yono yikulawa mu mavunde mono kayiwikaga, kanyhi koyilugutiza ne milimo yenyu yose, ho musume kuwakopesha wanhu we makungugo menji, ninga anye mowa musina wanjile wono womunozenyi sunga nanye mubite mukakope kuli wene. 13Kanyhi Muwaha Mulungu komunozenyi muwe walongola wa muli makungugo gose, ninga anye hamba si molongozwa na yunji yaye. Kanyhi mowa kumoteswa vilo vyose, hamba si mokwanjila cinji yaye, hono mugebate ko wihuwilwa malajilizo go Muwaha Mulungu, u Mulungu wenyu, gono nghumulonjelenyi izuwali. 14Ninga mwilanjilile, mulecele lukulu kugasemwa malajilizo gaga, hanyuma muhembe milungu yinji no kuyitumamila.”
Wulipicizwe ku so wu wula cihuliko
(Lawi 26:14-46)
15“Ninga hono mulece kumuhulika Muwaha Mulungu, u Mulungu wenyu, kanyhi mulece no kugebata ko wihulwa malajilizo gakwe gose, hamonga no wulajilize wakwe, nha vyono nghumulonjelenyi izuwali, ale, i zimbi zizino zose zomwijelelenyi.
16“Muwaha Mulungu, kogalijita makaya genyu, hamonga ne migunda yenyu.
17“Muwaha Mulungu, kowulijita wuhemba wenyu, hamonga no wugali wono wukulawa mu wuhemba wuwo.
18“Muwaha Mulungu, komulijitenyi, yamupelenyi wana wacefu muno muno, no wuhemba wucefu, na ng'ombe ne zingholo nyhefu muno.
19“Muwaha Mulungu, kokulijita kolo wukwinjila, kokulijita kolo wukulawila.
20“Na hono mwitume zimbi du, no kumuleka Muwaha Mulungu, nayo komuletelenyi wulijitwe, no wongomele, hamonga no wulemwe mu milimo yenyu yose, sunga kolo mwokondya kongomelela lukulu musunho. 21Nayo komuletelenyi matamwa ge cibehi cibehi, sunga mumalice wose, hawe hasina hamba monga mono yasigaye mu yisi yono mukwinjila muyiteme. 22Muwaha Mulungu komutowenyi ne matamwa go kwileceza, hamonga ne mapu, ne mhungo. Kanyhi komuletelenyi cibahu ciwaha muno, hamonga ne libeho yiwaha lyono lyohodanga vilimwa vyenyu vyose. Ne magazo gago gomutyatililenyi du sunga, kolo wose mwafwila lukulu. 23Hamba mvula si yotonya yaye, ne yisi yonyala yiwe kotya yibwe. 24Nayo Muwaha Mulungu, so kumutonyezezenyi mvula, langa mwene komuletelenyi muhangha ne manghundi ku wulawa ku wulanga, sunga wose mongomele.
25“Nayo Muwaha Mulungu wenyu, kowapela wusume i walugu wenyu, wamusumenyi. Anye mowahoma ku wulawa ku lubavu lumonga, ninga kanyhi motiza no kwiyagala caka caka. Ne wanhu wose wa mono'nze, woziwona wezine muno kuli zono zakondya kumwaganenyi. 26Na kolo mweza kufwa, zindeje hamonga ne zinimu za mu mbago, zokuza zilye miwili yenyu. Na howa hasina hamba munhu mono koziwinga yaye. 27Muwaha Mulungu komuletelenyi mapu, nha vyono yawanozeza Wamisili. Koyinoza miwili yenyu yituje malondalonda. Nanye wose motuga mukuje, na howa hasina wunoje. 28Muwaha Mulungu komulecenyi mahala genyu gajilile, nayo kumuletelenyi wubofu, hamonga no wucelewale. 29Nanye mowa kwalabata kwalabata mu misi nha vyono munhu mubofu kalabataga mu wutitu. Nanye hamba si mosuma kuyiwona nzila. Kanyhi hamba si momoteswa mu milimo yenyu yose. Kanyhi mowa kwiwonelwa no kusolelwa vinhu vyenyu, ninga hamba nhavivyo, howa hasina mono komuponyenyi.
30“Nagwe kolo wabanya muhinza, munhu yunji kogona nayo. Kozenga kaya, ninga hamba si kokwikala mu kaya yiyo. Kolima mugunda wa zabibu, ninga hamba si kozilya zabibu zayo. 31Ne zing'ombe zenyu zowa kuwulajilwa ha meso genyu, ninga anye hamba si mozilya zinyama zayo. Ndogowe zenyu zowa kusolelwa ha meso genyu, ninga hamba si womugomolelenyi kanyhi yaye. Ne zingholo zenyu nazo zopegwa i walugu wenyu, na howa hasina munhu wo wose mono komutazizenyi. 32Nawo i wana wenyu we cicekulu sunga na we cilume, wopegwa likungugo lijenzi ha meso genyu, wawanoze wawe wawanda wawo. Nanye mowa mwikaye nhondo zose muwulanjiliye wuwuye we wana wenyu ninga wulanjilile wenyu, yowa nghani ya bwete du.
33“Nalyo likungugo lijenzi, lyoyikungha nhwanga yenyu yose, yono mwayitumamila milimo miwaha muno muno, ha wulimile. Nanye mokwiwonelwa du no kutendelwa vibi. 34Ne magazo gago, gomunozenyi ne mahala genyu galuzuce. 35Nayo Muwaha Mulungu komunozenyi mutuje mapu gono gasina wunoje, ku wulawilila ku zinzayo sunga ko kwi 'ndosi.
36“Muwaha Mulungu komusolenyi hamonga no mutemi wenyu, yamutegulenyi ku yisi yo wujenzi, i hanhu hono nyenye hamba walezi wenyu wakali nekala yaye. Na kuko, anye mohemba no kuyitumamila milungu ye mabici maseswe, na ye mabwe. 37Na mu ma'si gono Muwaha Mulungu komwiyagazizenyi, i wanhu wono wekaye mu zi'si zizo, wotinuka muno muno kuli zono zamwijelelajenyi, nawo womusekanjenyi no kumubedegalenyi.
38“Nanye kuko mowa kuhadika mbeyu nyinji, ninga mowa kutuga ndudula nyhefu, hambi zinzije nha zowa kulya vilimwa vyenyu. 39Kanyhi mowa kulima zabibu no kuzilanjilila muno muno, ninga hamba nhavivyo si mokwambulila cinji yaye, zabibu hamba divayi yayo. Hambi zabibu nha zokwinjilwa na sulenje. 40Nayo mizeyituni yocindika minji mu yisi yenyu, ninga hamba si mosuma kugatuga mafuta gayo, hambi zizeyituni nha zokung'unhicila hasi zose. 41Nanye motuga wana we cilume na we cicekulu, ninga hamba si mokwikala nawo, langa wosolwa nha wafungwa wo wulugu. 42Nayo mibici yenyu hamonga ne vilimwa vyenyu vyose, vyoligwa ne mazije.
43“Nawo i wajenzi wono wowa mwikalane mu yisi yenyu wocila kuwa ne vilungo muno, ninga anye mocila kucepucilwa ne vilungo vyenyu. 44Nawo womukopeshenyi mapesa. Ninga anye mowa musina mapesa go kuwakopesha. Na ku ndumo yayo, wowa watemi wenyu.
45“Ne malijito gaga gocila kumuzizenyi, nago gowa muli nyenye, sunga kolo mwakondya kongomezwa, vyono si mwamuhulika Muwaha Mulungu, u Mulungu wenyu, no kwibata wulajilize wono yamupelenyi. 46Naco cowa co citanjilo co wuling'anizi wo Mulungu kuli 'nye, na kuli wana wenyu, cibitilila. 47Muwaha Mulungu yali yakondya kumulugutizenyi muli vyose, ninga anye hamba si mwasuma kumwitumamila ko mutima muzelu, hamonga ne nhumbula yono yina nyemo. 48Holeka luno mojendelela kuwetumamila walugu wenyu wono Muwaha Mulungu kowaleka waze wamuhomenyi. Nanye modabuka muno, kanyhi mokaluka muno, kanyhi mowa kujenda cipwi, mowa mwina wanjile wuwaha muno. Nayo Muwaha Mulungu komupelenyi mikalo mikamu, sunga kolo yakumongomezenyi. 49Nayo Muwaha Mulungu, komuletelenyi likungugo ku wulawilila ku mhelo ye yinze, likungugo lyono hamba ne nonga yawo, anye si muyimanyile yaye. Ne wanhu wawo womuzizenyi nha numba.
50“Wanhu wawo wakali, hamba si wolosuma kumuwonela lusungu munhu wo wose, mukombi hamba muzelelo. 51Nawo wololya mitugo zenyu sunga ne vilimwa vyenyu, nanye hamba si molotuga ndigwa, sunga mufwe. Nawo si wolomusigazizenyi hamba mhece monga yaye, hamba divayi, hamba mafuta, hamba ng'ombe, hamba ngholo, anye langa molofwa du. 52Wanhu wawo, wologahoma makaya genyu gose, mu yisi yono Muwaha Mulungu yakumupelenyi. Sunga ne magomawakali, i matali muno, gono mwitumbiye, gose gologwa hasi.
53“Walugu wenyu walawa kuwa wagapilima makaya genyu, mologazika muno ne nzala, sunga muwe kulya ne wana wenyu wono Muwaha Mulungu yamupelilenyi. 54No munhu muswanu muno kanyhi mutambule, nayo kolowa yasina witumbilo mu cipango cico, lono walugu wagapilime makaya genyu, nayo kosuma kulya sunga ne wanagwe wanji, vyono howa hasina hamba ndigwa yoyose. 55Hamba si kosuma kumugawila nduguye, hamba mugolece wakwe mono yamwendile muno, hamba kuwagawila i wanagwe wono wasigaye. 56Hamba yawe mucekulu muswanu muno, kanyhi mutambule, kanyhi mugoli, mono hamba lizuwa linji yakali nakanyaga hasi yajende hanhu hanji, yuyo nayo kokwituma nhavivyo du. 57Nayo kolo walugu walipilima likaya, kolowa yasina witumbilo kanyhi, holeka nayo ndigwa yakwe, kololya cizilago, u mwanagwe mugalika, hamonga no mutyati muyagwe mono yamuleceye. Kanyhi hamba si kokwenda kumugawila yunji wowose wa muli wanagwe.
58“Na hono mulece kugebata ko wihuwilwa i mejizo gose go Muwaha Mulungu, gono gandicigwe mu citabu cici, na hono mulece kulipela cogopo litagwa lili lye nhojo ne cogopo, lyo Muwaha Mulungu, 59nayo kolomuletelenyi nyenye ne wana wenyu i matamwa gono si ganogaga, hamonga ne matamwa go wileceze, gono gowa gasina muganga. 60Kolomuletelenyi kanyhi sunga ne matamwa go kuwulaga, gono mwagawona ku Misili, nanye hamba si molonojela lukulu. 61Kanyhi Muwaha Mulungu kolomuletelenyi matamwa ge mawala gose, gono si ganogaga, matamwa gono si gatambuligwe hamba kwandikwa mu citabu cici co wulajilize, hamonga ne mejizo go Muwaha Mulungu. Nanye molokongomezwa. 62Hamba muwe mwakondya kwinjipa no kuwa muli wenji nhe zinyelezi za ku wulanga, ninga hamba nhavivyo, wacefu wa muli nyenye wolopona, vyono si mu muhulice Muwaha Mulungu, u Mulungu wenyu. 63Nha vyono Muwaha Mulungu yasangalala, yakamumotyenyi, no kumwinjifyenyi, yo nhavivyo kanyhi vyo kosangalala, kumongomezenyi no kumuhodanjenyi. Nanye mowuswa mu yisi yono mukwinjila muyiteme.
64“Nayo Muwaha Mulungu kolomwiyagazizenyi mu makungugo gose, ku wulawilila ndumo ayi ye yinze, sunga ko ku ndumo nzagwe kanyhi ye yinze. Na kuko, molowa kuhemba milungu miseswe ye mabici na ye mabwe, i milungu yono nyenye weneco hamba ne walezi wenyu mukali hamba nayihemba. 65Kanyhi si molowona mulamu hamba hadodo hanhu ho hose, hamba si molowa na hanhu ho hose hono molotya henyu nyo weneco. Nayo Muwaha Mulungu kolomumemyenyi mahwele no wu wula witumbilo, hamonga no wutukuwika mutima. 66No wumi wenyu wolowa wuli mu mbali nhondo zose. Na mu vilo vyose, cilo ne misi, molowa mumemigwe no woga, nanye mowa mwikaye akuno mwina no woga we lifwa. 67Nazo zinhumbula zenyu zolowa zina woga wuwaha muli vyose vyono mowa kuviwona. Nanye nhondo zose hakali mitondo, molowa kusulumila mukutya, liswe mbela. Na mu cinyamihe molowa kutya, wele mbela. 68Muwaha Mulungu yadahile kumugomolenyi kanyhi ku Misili, mu nzila ye zingalawa, hamba yawe yakondya kulonga vyono si kolokwenda kanyhi anye muwuye kuko ku Misili. Na kuko wanji wa muli nyenye, wolokwenda no kwiguza weneco kuli walugu wawo, wawe wawanda wawo. Ninga hamba nhavivyo, holowa hasina hamba munhu monga mono kolokwenda kumugulenyi yaye.”
Currently Selected:
Wukumbucize wo Wulajilize 28: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
