Wukumbucize wo Wulajilize 25

1“Na hono Waisilayeli wejete wawe wakwisoka nghani, nawo kolo wakubita mu mahakama, na kuko yunji yejele yena masutya, no muyagwe yejele vyono yasina masutya. 2Na hono musutyi yapegwe wulipicizwe wo kukunwa viboko, ale u mulamuzi yamusole, yamuwice yagone wugubama, hanyuma wamukune viboko. No winji we viboko vyono kokunwa, vyowa mu nghango ye lisutya lyono yetumile. 3Ne viboko vyono womukuna, vilece kuwa vinji muno kuciza viboko makumi mane. Hambi hono vicize vivyo, nha vyomukoza cevu u nduguyo hali wose. 4Mulece kuziwicila lubano mu mulomo, zing'ombe zono zikutwanga wuhemba.”

Zono zinojeye kuli we ndugu, mono yakondya kufwa

5“Na hono wanhu wejete wono wali ndugu, wawe wekaye hamonga, na hono monga muli wene yafwe, yalece yasina hamba mwana wa cilume. Nayo mucekulu wakwe mulekwa, nha vyono yinha, si kosuma kutolwa, na wono si walawile mu mhuga yo mulume wakwe mono yakondya kufwa, holeka yowa yimunojeye yuyo nduguye yo mulume wakwe mono yafwiye, yamutole u mucekulu yuyo. 6Na kolo wakulelana u mwana mulongozi we cilume, ayo kowa mwana wo mulume mono yafwa, womucemela ne litagwa lyakwe. Ho litagwa lilece kwajilila mu Waisilayeli ho yetume mulimo wono ndugu yali kwituma. 7Ninga hono u nduguye wo mulume mono yafwa, yaleme kumutola mucekulu yuyo, ale, mucekulu yuyo yabite kuli wanyamhala wa mwi'kaya yawalonjele yatye, ‘U nduguye wo mulume wangu mono yafwa, si yakusaka kunhola, yamulelele nduguye wana, ho yalijendeleze litagwa lyo mulume wangu mu Isilayeli.’ 8Nawo wanyamhala wa mwi'kaya lilyo, wamuceme mulume yuyo walongane nayo. Nayo hono yajendelele kulema kumutola mucekulu yuyo, 9ale, mucekulu yuyo yamubitile yuyo mulamuwe, yamuwopoze lilatu limonga ha mwande ye wanyamhala, hanyuma yamufunyile mate mu wusu, akuno yakutya, ‘Nhavivi vyo yakunozezwa u munhu mono yakulema kumulelela nduguye wana, ho yalijendeleze litagwa lyo nduguye mu Isilayeli.’ 10Holeka sunga ne mhuga yakwe yomanyika mu Isilayeli mose, woyicema, mhuga yo munhu mono yawopozwa lilatu lyakwe limonga.”

Malajilizo ganji

11“Na hono hawe ho wali wanhu wejete wakwitowa, hanyuma mugolece wa yumonga, muli wawa wono wakwitowa, yaze yamutazize mulume wakwe, na baho ha wutazize, yagolole muwoko wakwe yebate mapinde go mulume mono vikwitowa no mulume wakwe, 12wumudumulaje muwoko wakwe u mucekulu yuyo, wulece kumuwonela lusungu hamba hadodo. 13Wulece kuwa na vipimo vili hejete mu mufuko wako vyono visimajiye, ciwaha ne cidodo. 14Kanyhi wulece kuwa na vipimo vili hejete mu kaya yako, vyono visimajiye, ciwaha ne cidodo. 15Munojeye mwitumamile vipimo vye ling'ani na vye mbeka, ho mwikale vilo vinji mu yisi yono Muwaha Mulungu, u Mulungu wenyu, yakumupelenyi yiwe yenyu. 16Muwaha Mulungu si yakwendezwa ne wanhu wakonji.”

I lilajilizo lyo kuwawulaga i Waamaleki

17“Ale, mukumbucile zono wamutendelenyi Waamaleki, lono mwali muli mu nzila mukulawa ku Misili. 18Wene wali wasina hamba wogopa Mulungu kose. Holeka wakamuhungucilenyi, wakawatowanga wanhu wenyu wono wali wasigaye mu nyuma, na wono wali wasoceye, na wono wali wakataye, wakawawulaga wose. 19Holeka luno, kolo Muwaha Mulungu, u Mulungu wenyu, yakondya kumupelenyi yisi, no kumuwicenyi mupolile mu wulawa muli walugu wenyu wose, wono wekaye mbavu zose ze yisi yenyu, ale, muwawulagaje Waamaleki wose, muwongomezeze lukulu, ho walece kukumbucililwa lukulu kanyhi na munhu wowose. Mulece kuyisemwa nghani yiyi!”

Currently Selected:

Wukumbucize wo Wulajilize 25: LLKWW

Highlight

Compare

Copy