Wukumbucize wo Wulajilize 20
20
Kuli zo wulugu
1“Na lono mukubita ku wulugu kwihoma ne walugu wenyu, na kolo mukuwona kuko matuka go wulugu, hamonga ne zifwalasi, ne wasilikale wo wulugu wenji wacizize liwalo lyenyu, anye mulece kuwogopa hamba hadodo. Hambi Muwaha Mulungu, u Mulungu wenyu, mono yakamuponyenyi ku wulawa mu yisi ye Misili, nha kowa yali hamonga nanye. 2Na lono mowa mukali nanza kwihoma ne walugu wenyu, yinojeye mukohani yabite yeme ha mwande yenyu, yawe kutya, 3‘Muhulicize 'nye nyo Waisilayeli! Izuwali mweza kubita ku wihomi ku wulugu, ninga nghumutyenyi, mulece kuwogopa walugu wenyu, hamba nhumbula zenyu zilece kuzilika, hamba kucicima yaye. 4Hambi Muwaha Mulungu, u Mulungu wenyu, nha yali hamonga nanye, yo komulewelenyi no kumupelenyi wusume.’
5“I walongola nawo, wawalonjele wanhu, watye nhavi, ‘Wulenyi, ho yuli munhu bahano, mono yazenga kaya ninga yali yakali nayisiwanula? Hono yawe yali baha, ale yawuye ku kaya. Yisolaga lunji kawulagwa kuko ku wulugu. Hanyuma ne kaya yakwe yiwe kusiwanulwa na munhu yunji. 6Hamba wulenyi, ho yuli munhu bahano mono yalimile mugunda wa zabibu, nayo yali yakali natuga cilejeho co kuzidudula? Ale yawuye ku kaya. Yisolaga lunji, kawulagwa ku wulugu. Hanyuma ne mikalo yakwe yiwe kumotwa no munhu yunji. 7Hamba wulenyi, ho yuli munhu bahano, mono yabanyile mucekulu, ho yatole? Ale yawuye ku kaya. Yisolaga lunji kawulagwa kuko ku wulugu. Hanyuma munhu yunji yamutole mucekulu mono vyali vitole nayo.’ 8Nawo walongola wawalonjele kanyhi wanhu watye nhavi, ‘Wulenyi, ho yuli munhu bahano, mono yena woga, yakucicima mu nhumbula? Ale yawuye ku kaya, ho yalece kuwogofya ne wayagwe.’ 9Na kolo walongola wakondya kulongana ne wasilikale wo wulugu, wahagulwe walongola wono wosuma kuvilongoza vipuga vipuga vye wasilikale.
10“Na lono mweza kulihoma likaya, nghani nongozi, mweze kuwalecela wanhu wa mwi'kaya cilejeho, wamule weyikombole weneco kuli'nye. 11Na hono wamudigulilenyi milango ye likaya, kanyhi wekombole kuli'nye, ale, wanhu wose wono wali mumo mwi'kaya, wowa weza wetumami wenyu. 12Ninga hono wanhu wa mwi'kaya lilyo, waleme kunoza mulamu nanye, wawe wahagula weneco wehome nanye, ale, wasilikale wenyu walizinjilizaje likaya lilyo. 13Na kolo Muwaha Mulungu, u Mulungu wenyu, yakondya kumupelenyi likaya lilyo mwaliteka, ale, muwawulagaje wanhu walume wose wono wali mumo. 14Langa i wacekulu ne wana, ne zimitugo, hamonga ne vinhu vyose vyono vyowa vili mumo mwi'kaya lilyo, avyo vyose muvisolaje viwe vyenyu. Ne vinhu vyose vye walugu wenyu vyono movisola, avyo mudahile kuvitumamila. Hambi Muwaha Mulungu, u Mulungu wenyu, nha kamupelenyi viwe vyenyu. 15Nhavivyo vyo mugatendelaje makaya gago, gono gali kutali ne yisi yono mokwikala.
16“Ninga langa lono mukugahoma no kugateka makaya gono gali mu yisi yono Mulungu yakumupelenyi, ale, muwawulagaje wanhu wose wono wali mumo, mulece kusigaza hamba monga bwete. 17Muwongomezezaje lukulu wanhu wose, i Wahiti, ne Waamoli, ne Wakanani, ne Wapelizi, ne Wahivi, ne Wayebusi, nha vyono Muwaha Mulungu yamulajilizenyi mwitume. 18Muwawulajilaje lukulu wose, ho waze walece kumunozenyi, mumusutizye Muwaha Mulungu, wamwijizenyi mwitume mawifyo gawo gono wakwituma, go wuhemba milungu yawo.
19“Nanye lono mweza kulihoma no kuliteka likaya, mulece kuyitemanga mibici ye mikalo, ho mulece kuhahodanga hanhu ha wikalo wenyu. Langa, anye mulye mikalo yayo du, ninga mulece kuyitemanga mibici. Hambi i mibici, nha musina wulugu nayo. 20Langa mosuma kugatemanga mabici ganji gono si ge mikalo, mugetumamile mabici gayo so wuzenjela ngazi zo kupandila mucanyha ye majinji ge likaya, lyono mukwihoma nalyo, sunga kolo mwalisuma no kuliteka.”
Currently Selected:
Wukumbucize wo Wulajilize 20: LLKWW
Highlight
Share
Compare
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
