Wukumbucize wo Wulajilize 17

1“Kanyhi mulecele lukulu kumulavizya Muwaha Mulungu, u Mulungu wenyu, mutugo wowose, ng'ombe hamba ngholo, yono yina cilema, mwene si yakwendezwa nazo. 2Na lunji muhulika vyono, linji lya mu makaya genyu, koyuli munhu monga we cilume hamba we cicekulu, mono yetumile wubi hali Muwaha Mulungu, 3kabena cilagane, yakuhemba milungu yinji no kuyitumamila, lunji lizuwa, hamba mwezi, hamba nyelezi, si nhe lilajilizo lyo Muwaha Mulungu. 4Na hono muzihulice zono zinha zizo, muziwuzilizaje mu yisi yose. Na hono yijele vyono nghani yiyi mbeka vyo yinha mu Waisilayeli. 5Hodu mumusolaje munhu yuyo, mumuwice kunze ye likaya, mumutowe ne mabwe sunga yafwe. 6Ninga hamba nhavivyo, yalece kuwulagwa, sunga hawe howali wahomelezi wejete hamba kuciza, wono womuhomelela. Ninga yalece kuwulagwa hono hawe ho yuli muhomelezi monga du. 7Ne wahomelezi weze wo walongozi wo kumugumilila mabwe, hanyuma wanji nawo ho watyatye, wamugumilile munhu yuyo mabwe. Na mu nzila yiyi, mo kowuwusiza wubi wuwu.

8“Hanji, zidahile kwijela nghani zono nghamu muno, ku wulamulwe na wawo walongola. Holeka nghani ze liwala lilyo, nha vyono lunji wuhazi wa sawo, hamba witula mazeya, hamba lunji nghani zo wiwulaji. Muli zizi kolo zejela, munojeye mubite ha wuhembelo, i hanhu hono Muwaha Mulungu, u Mulungu wenyu yahahagula. 9Muyilolose nghani yenyu kuli Wakohani Walawi na kuli mulongola mono kowa yali baho mu vilo vivyo, muwalece wene wayilamule nghani yiyo. 10Nawo womulonjelenyi nha vyono wayilamuye, nanye mobita muketume nha vyono mulonjeywe. 11Nanye munojeye muwubocele wulamuzi wawo, mutyatye zose nha vyono womulolosezenyi. 12Na mono kokwijelela yabedegale zono yalonjeywe no mulongola, hamba no mukohani mono yali baho yakumwitumamila Muwaha Mulungu, munhu yuyo yawulagwe. Na mu nzila yiyi, yowa yo nzila yo kuyiwusiza nghani yiyo 'mbi, muli Isilayeli. 13Nawo wose kolo weza kuzihulika zizi, holeka wokogopa. Na howa hasina kanyhi hamba monga, mono kokwijelela kwituma kanyhi zono zinha zizi.”

Kuli zono zimunojeye mutemi

14“Nanye kolo mwakondya kuyisola yisi, yono Muwaha Mulungu, u Mulungu wenyu, yakumupelenyi, na kolo mwekala mu yisi yiyo, lunji mosaka muwe no mutemi wenyu nanye, nha vyono genha makungugo ganji gono gamupilimenyi. 15Ninga hamba nhavivyo, munojeye mulanjilile muno, u munhu mono momuhagula yawe mutemi, yeze munhu mono Muwaha Mulungu mweneco yamuhaguye. Kanyhi yinojeye yalawe muli nyenye nyo weneco. Mulecele lukulu kumuhagula munhu mujenzi yawe mutemi wenyu. 16Kanyhi mumanye vyono, munhu kuwa mutemi, si vyono ho yawe na fwalasi nyinji so wasilikale wakwe wo wulugu, hamba si vyono ho yawategule wanhu ku Misili wakagule zifwalasi. Hambi Muwaha Mulungu nha yalonga vyono, i wanhu wakwe si wolowuyila lukulu kanyhi ku Misili. 17Kanyhi munhu kuwa mutemi, si vyono ho yawe ne wagolece wenji, hambi zizo nha zomunoza yamulece Muwaha Mulungu. Na kanyhi hamba si yinojeye mwene ho yawe mugoli wa fweza na zahabu. 18Ninga munhu kolo yawa mutemi, munhu yuyo, yimunojeye yapegwe citabu cono candicigwe i malajilizo go Mulungu, hamonga ne mejizo, vyono visoleywe mu wulawa mu citabu cono cikalaga ne wakohani Walawi. 19Nayo yimunojeye yaciwice citabu cico behi no mwene, yawe kucisoma nhondo zose, mu vilo vyakwe vyose vyo wikale wakwe, ho yasume kwiyijiza vyono yimunojeye yamogope Muwaha Mulungu, yazibate ko wihuwilwa, zose zono zandicigwe mu citabu cico yazitume. 20Na yiyi yo yomunoza yalece kwihwesa nha vyono, mwene yo munhu muswanu sinha wanji i Waisilayeli wayagwe. Kanyhi yomutaza ho yalece kubedegala hamba hadodo i malajilizo go Muwaha Mulungu. Nayo holeka kotema myaka minji, ne wanagwe nawo wolitema likungugo lye Waisilayeli mu ndelo nyinji.”

Currently Selected:

Wukumbucize wo Wulajilize 17: LLKWW

Highlight

Compare

Copy