Wukumbucize wo Wulajilize 12

Hanhu hamonga du ha Wuhembelo

1“Alu agano go malajilizo gono ganojeye mugebate no kugakamisa, mu vilo vyose vyo wikale wenyu, mu yisi yono u Muwaha Mulungu, u Mulungu we walezi wenyu, yakumupelenyi yiwe yenyu. Holeka alu muhulicize! 2Kolo mweza kwinjila mu yisi yiyo yono mukuyisola, muhamwagulaje hanhu hose hono i wanhu wayihembelaga milungu yawo, mu matunda matali, na mu vigongo, sunga na hasi ye mibici yose yono yidedewaye. 3Mugamwagule makumbicilo gawo, mugatulanjize ne masumbili gawo ge mabwe. Muviticimize vihwani vyose vyo mulungu we cicekulu Ashela, muvibenanjize ne vihwani vyawo viseswe, ho walecele lukulu kuhemba kanyhi hanhu baho.

4“Kanyhi, mulecele lukulu kumuhemba Muwaha Mulungu, u Mulungu wenyu, mu nzila yono wanhu wawa wali kuyihembela milungu yawo. 5Ninga Muwaha Mulungu, kohagula hanhu hamonga du mu yisi yose, i hanhu hono i wanhu wose we milango yenyu yose, mowa kumubitila no kumuhemba. 6Ne hanhu baho ho mowa kuvilavizya vilavywa vyenyu vinyanywe, ne makumbiko genyu ganji ganji, ne zaka zenyu, ne vilavywa, ne vipegwa vyono muvihuwize nyenye nyo weneco kuli Muwaha Mulungu. Hamonga ne vilavywa vye lihewa. Ne zinyana zinongozi kulelwa, ze zing'ombe zenyu ne zingholo zenyu. 7Nanye molya no kung'wa ko wusangalale baho hali Muwaha Mulungu, u Mulungu wenyu, mono yamulugutizenyi, no kumupelenyi vinhu viswanu ku walawa mwamulizo wenyu, nyenye hamonga ne wagolece zenyu ne wana wenyu.

8“Ne lipango lilyo, kolo lyeza kufika, nanye hamba si mokwituma kanyhi nha vyono mukwituma izuwali, hambi izuwali, nha mukwituma munhu na zakwe du nha vyono yendile mweneco. Hambi nha mukali mukuhemba nha vyono nyenye weneco mwendile du, 9vyono mukali si nenjila mu yisi yono Muwaha Mulungu, u Mulungu wenyu, yakumupelenyi yiwe yenyu, i hanhu hono mokwikala nhondo mupolile. 10Nanye kolo mwakondya kulowoka likolongo lya Yoludani, nayo Muwaha Mulungu, nhondo ho komulecenyi muyisole no kuyitema yisi yiyo wuwe wo wikalo wenyu. Nayo komucitilenyi kuli walugu wenyu wose, nanye mokwikala mupolile du. 11Nayo Muwaha Mulungu, kokwihagulila mweneco, i hanhu hono mosuma kumuhembela. Na kanyhi hanhu baho, ho mowa kumulavizya vilavywa vyenyu vyose, nha vyono nghamulajilizenyi. I vilavywa vyenyu vinyanywe, ne makumbiko ganji ganji, ne zaka zenyu, hamonga ne vilavywa vinulwe vyono nyenye nyo weneco mwehuwiza nha vyono momulavizya Muwaha Mulungu. 12Mumusangalalile Muwaha Mulungu, nyenye ne wana wenyu, ne wetumami wenyu, ne Walawi wono mwikalane nawo mu makaya genyu, ninga mweze kukumbucila vyono Walawi, wowa wasina yigawo, hamba wuhazi we yisi. 13Holeka mulecele lukulu kulavizya makumbiko genyu hanhu hohose du, hono muhaguye nyenye nyo weneco. 14Langa yinojeye wose mulavizye hanhu hamonga du, i hanhu hono Muwaha Mulungu kohahagula, mu wulawa mu yisi monga ya muli zi'si ze milango yenyu. Ne hanhu baho, ho mowa kulavizya makumbiko genyu ge vilavywa vinyanywe, no kwitumila zinji zose zono namulajilizenyi.

15“Langa zi mitugo zono mosaka kulya nyenye du nyo weneco, azo mosuma kuziwulajila hanhu ho hose hono mwikaye. Nanye mosuma kulya nyama nyinji nha vyono mukusaka, mu nghango nha vyono Muwaha Mulungu yakumupelenyi. Ne nyama yiyo, wosuma kuyilya wanhu wose, i wavufywe na wono si wavufywe, nha vyono mulizaga du nyama ye nzela na ye haluzi. 16Ninga langa, mulecele lukulu kulya sakami yazo, langa mweze kuyita hasi nha malenga. 17Langa cinhu cocose cono momulavizya Muwaha Mulungu, mulecele lukulu kucilila mu zikaya zenyu, hamba yiwe zaka yo wuhemba, hamba divayi, hamba mafuta, hamba zinyana zinongozi kulelwa ze zing'ombe, hamba ze zingholo, hamba vilavywa vyenyu vye lihewa, hamba vilavywa vinji vinji vye liwala lyolyose lilya. 18Ne vilavywa vivyo vyose, munojeye muvilile hali Muwaha Mulungu, u Mulungu wenyu. Muvilile i hanhu bahalya du hono yahahaguye u Muwaha Mulungu, u Mulungu wenyu. Muvilye nyenye, ne wana wenyu, hamonga ne wetumami wenyu, hamonga ne Walawi wono mwikalane nawo mu makaya genyu. Nanye muzisangalalile zose zono mwitumile. 19Ninga mulanjilile, mulecele lukulu kuwataga Walawi mu vilo vyenyu vyose, vyo wikale wenyu wa mu yisi yenyu.

20“Nayo Muwaha Mulungu, u Mulungu wenyu, kolo yayigazimhya mipaka ye yisi yenyu, nha vyono yehuwiza, baho langa ho mosuma kulya nyama nha vyono mwendile. 21Na hono i hanhu ho kuhembela hawe hali kutali muno muno na hono wikaye, kosuma kuwulaga ya muli ng'ombe zako, hamba muli ngholo zako mu mapango gogose gono wendile, mu nghango ya vyono Muwaha Mulungu yakupelile. Nanye mosuma kuyilya nyama yiyo mu zikaya zenyu, nha vyono nghamulonjelenyi. 22Kanyhi no munhu wowose u mwavufywe, hamba mono si mwavufywe, wose wosuma kuyilya nyama yiyo, nha vyono walizaga nyama ye nzela hamba ye haluzi. 23Langa du, mulanjilile, mulecele lukulu kulya nyama yono yikali yina ne sakami yayo, vyono u wumi wuli mu sakami. Holeka si viswanu kulya nyama hamonga no wumi wayo. 24Kanyhi mulece kuyinoza sakami yiwe yo ndigwa. Langa mweze kuyita hasi nha malenga. 25Na hono mulibate lilajilizo lili, mbeka Muwaha Mulungu kokwendezwa nanye, na zose zono mowa kwituma, zowa moteswe kuli'nye na kuli wana wenyu. 26Vilavywa vyose, ne vipegwa vyose, nha vyono mwamwihuwiziza Muwaha Mulungu, mweze kuvitegula baho i hanhu ho wuhembelo. 27Mweze kulavizya baho ha cikumbicilo co Muwaha Mulungu, i makumbiko ge vilavywa vinyanywe, ne makumbiko gose, gono anye moyilya nyama yayo no kuyita sakami yayo mucanyha ye cikumbicilo. 28Muzibataje ko wihuwilwa, zose zono nakondya kumulajilizenyi, na zose zono mowa kwituma, zowa moteswe kuli'nye, na kuli wana wenyu cibitilila, hambi nha mowa kwituma zono zili ling'ani, na zono zikumwendeza Muwaha Mulungu u Mulungu wenyu.”

Suguzi kuli zo wuhemba vihwani

29“Muwaha Mulungu, u Mulungu wenyu, kogongomeza makungugo, nanye muwe kuyisola yisi yawo, no kwikala mumo. 30Ninga mulanjilile, kolo Muwaha Mulungu yakondya kugongomeza makungugo, mulecele lukulu kuwutyatya wuhembi wawo, hambi kuli'nye nha wowa mutego. Hamba mulece kuwawuza wuza ho mumanye vyono wayihembaga milungu yawo, nanye ho mwije, muhembe nha vyono wene wahembaga. 31Mulece kumuhemba Muwaha Mulungu, u Mulungu wenyu, mu nzila yono wene wayihembaga milungu yawo yo wulambi. Hambi mu wuhemba milungu yawo, nha wetumaga nghani ze cikomaza zono Muwaha Mulungu si yazendile yaye. Sunga wakulavya ne wana wawo we cilume na we cicekulu wawa kuwakongoga mu moto mu vikumbicilo vyawo. 32Holeka muzitumaje zose zono nakondya kumulajilizenyi, mulece konjeleza hamba kucepula nghani yo yose muli zizi.”

Currently Selected:

Wukumbucize wo Wulajilize 12: LLKWW

Highlight

Compare

Copy