Amosi 7
7
Wulajilwe we ning'aniza
Wulajilwe wulongozi: zinzije
1Nane nghatuga wulajilwe ku wulawa kuli Muwaha Mulungu. Muli zizo, nghamuwona yakuwumba yitewa lya nzije lono u mulimo wo kutema mahanze go mutemi, go kulisa zing'ombe zakwe wali wakondya, ne lihanze lyali lyanza kuwiluka kanyhi. 2Mu wulajilwe wuwo, nghawona nzije zikulya vinhu vyose vyono videdewaye mu'si. Nane hanyuma nghatya, “Gwe Muwaha Mulungu nghukunena, uwanenelaje wanhu wako! Alu wanhu wako ho wowumipa vye wule? Hambi nha wacefu, kanyhi wasoceye!” 3Hodu Muwaha Mulungu yakakawaniza nghani yiyo no kutya. “Azi zono wuziwene, hodu sizokwijela yaye.”
Wulajilwe we kejete: Moto
4Nane nghatuga wulajilwe wunji kanyhi, ku wulawa kuli Muwaha Mulungu. Muli wuwo, nghamuwona mwene yakwiwikaniza yawongomeze wanhu wakwe ko moto. No moto wuwo wukalinyanya lilenga liwaha ku'si ye'si, kanyhi wukawa kwanza uyinyanya ne yisi. 5Nane nghatya, “Gwe Muwaha Mulungu! Nghukunena wuwanenelaje wanhu wako! Alu wanhu wako u lulelo lwa Yakobo ho wowumipa vye wule?” Hambi nha wacefu kanyhi wasoceye! 6Hodu Muwaha Mulungu yakakawaniza kanyhi nghani yiyo no kutya, “Nghani yiyi nayo, hodu si yowa yaye.”
Wulajilwe we kadatu: Cipimilo
7Nane nghatuga wulajilwe wunji kanyhi, ku wulawa kuli Muwaha Mulungu. Muli wuwo, nghamuwona mwene Mulungu, yali yemile behi ne lijinji, lyono lyali lizenjigwe ko wutazi we cipimilo, ne cipimilo cali cili mu muwoko wakwe. 8Hodu Muwaha Mulungu yakambuza yakatya, “Amosi, wukuwona cici?” Nane nghamupitula nghatya, “Nghuwona cipimilo.” Nayo yakanyitya, “Ane nghwitumamila cipimilo cici, kulajila vyono wanhu wangu wenha lijinji lyono si ligoloce libinuce, yono lili kunze yo mucilili. Holeka nane sinokawaniza yaye wuhile wangu kanyhi, wo kusaka kuwongomeza wene. 9Ne hanhu hono lulelo lwa Isaka wahembelaga, naho holo kongomezwa. Ne hanhu hose hono helile ha Isilayeli, holekwa matongo du. Nane noloyidumya ne mhuga yo mutemi Yelobowamu.”
Amosi na Amaziya
10Amaziya u mukohani wa Beteli, yakamutegulila zinghani Yelobowamu, u mutemi wa Isilayeli, yakutya, “Amosi yakutajila nghani za wusonjezi muli wanhu wa Isilayeli. No wulonje wakwe wohodanga yisi. 11Hambi mwene nha yakulonga yakutya, ‘Yelobowamu kolofwila ku wulugu, ne wanhu wa Isilayeli wolosolwa ku wulawa ku yisi yawo, wategulwe kutali nha wawopwe.’ ” 12Nayo Amaziya yakamulonjela Amosi yakatya, “Gwe go muwizi, hodu zakondya, alu, wuwuye ko ku Yuda, wukaganule luganuzi lwako kuko. Nawo wokulisa so mulimo wuwo. 13Ninga wulece kuwila kanyhi ahano hono Beteli. Hambi aha, nha ho hanhu hono mutemi kahembelaga ho ha wuhembelo we likungugo.”
14Amosi yakapitula yakamutya Amaziya, “Ane si nili muwizi we, liwala lye wawizi wono wakuwila ho walipwe. Ane nili mudima mitugo kanyhi nili mulanjilizi we mikuyu. 15Ninga Muwaha Mulungu, yasola ane ku wulawa mu mulimo wangu wo wudimi, no kunhuma nize kuwila kuli wanhu wakwe Isilayeli. 16Holeka alu, wuhulicize vyono Muwaha Mulungu yakutya. Agwe wukunyitya vyono ndece kulavya wuwizi hamba kuganula kuli Waisilayeli. 17Holeka lu agwe Amaziya. Muwaha Mulungu yakutya kuli'gwe, ‘U mugolece wako, kowa musenyha mumuno mwikaya lili, ne wanago nawo walume ne wacekulu, wolowulagwa ku wulugu. Ne yisi yako nayo, yologawilwa wanji. Nagwe go mweneco, kolofwila mu yisi yo wavufywe. Ne Waisilayeli, mbeka wolosolwa no kuwuswa mu yisi yawo, wategulwe ku yisi yo wujenzi.’ ”
Currently Selected:
Amosi 7: LLKWW
Highlight
Share
Copy
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
