2 Samwili 7
7
I nghani ya Natani kuli Dawudi
(1Zin 17:1-15)
1Kukawa mutemi Dawudi yali yeza kwikala mu kaya yakwe yo wutemi, no Muwaha Mulungu, yakondya kumuwika yapolile, ku wulawa muli walugu wakwe wose, mu mbavu zose. 2Hodu mutemi Dawudi yakawa kumulonjela muwizi Natani yakutya, “Alu, lanje ane ahano nikaye mu kaya swanu, nzengwe ne mibici yo muhagata, ninga Lisanduku Lye Cilagane lyo Muwaha Mulungu likaye mwi 'Hema!”
3Nayo muwizi Natani yakamupitula yakamutya, “Ale witumaje nha vyono wukuwona vyowa viswanu, hambi Muwaha Mulungu nha yali hamonga nagwe.” 4Ninga mu cilo cico, Muwaha Mulungu yakamulonjela Natani yakatya, 5“Alu, wubite kuli mwitumami wangu Dawudi, wukamulonjele nhavi, vyono, ‘Agwe yo si gwegwe mono konzenjela Nyumba yono nosuma kwikala. 6Hambi nha wulawa lono nawaponezya Waisilayeli ku Misili, sunga nalu, nha nali nghali si nekala mu Nyumba hamba nhavi, ninga mu muhinzo wose, ane nali njendeleye kwikala mwi 'Hema du. 7Na mu muhinzo wose wono najendana hamonga ne wanhu wa Isilayeli, si namuwuza mulongola hamba monga nitye, nhawule lu si mwanzenjela nyumba ye mibici ye mihagata.’
8“Holeka wumulonjele mwitumami wangu Dawudi vyono, ane no Muwaha Mulungu we mihanga, nghumutya vyono, ‘Ane nakusola agwe mu wulawa mu wudima zingholo mu mawimbi, nghawa kukunoza wuwe mutemi muli wanhu wangu wa Isilayeli. 9Nghawa nili hamonga nagwe hanhu hohose hono wabitaga, sunga nghakusumila na muli walugu wako wose mu nghango nha vyono wacilaga kujendelela kumwande. Nane nokunoza wuwe ne lilumbo yiwaha muno mu wulongola wako, nha vyono wali i walongola we lilumbo wono wali wali mononze. 10Kanyhi nokuhahagula i hanhu hono wanhu wangu Waisilayeli wokwinjila no kwikala mumo, hamba si wolohama kanyhi yaye, i hanhu hono wosuma kwikala hamba kwiwonelwa kanyhi yaye. 11Hambi nha ku wulawa lono wenjilila mu yisi yiyi, i walugu wawo nha wazaga wakuwahoma. Ninga alu zizo zose hamba si zolokwijela kanyhi yaye. Nane nghwihuwiza vyono ku wulawa lulu, nojendelela kukucitila kuli walugu wako wose, kanyhi nokupela sunga ne wana. 12Nagwe kolo wakondya kufwa no kuzikwa hamonga ne walezi wako, ane nomunoza yumonga wa muli wanago, yawe mutemi, kanyhi nowusimya kwe vilungo wutemi wakwe. 13Nayo kowa yo munhu mono konzenjela Nyumba yo wikalo wangu. Nane nowusimya wutemi wakwe cibitilila. 14Nowa sogwe, nayo kowa mwanangu. Nayo kolo yakwituma zimbi, ane nomulipiciza nha vyono sogo ya munhu kamulipicizaga mwanagwe. 15Ninga si nosuma kumulecela lukulu yaye nha vyono namuleka Sawuli, mono namuwusa mu wutemi, agwe ho wuteme. 16Nane nowusimya wutemi wako muli wanago cibitilila. No wutemi wako hamba si wuladuma yaye.’ ” 17Nayo muwizi Natani yakawa kumulonjela Dawudi zinghani zose nha vyono Mulungu yamugubulila.
Wulombe wa Dawudi wo wulumbe
(1Zin 17:16-27)
18Mutemi Dawudi yakawa kwinjila mwi 'Hema lyono Lyelile, yakekala hasi, yakawa kumulomba Muwaha Mulungu yakutya, “Gwe go Muwaha Mulungu, ane si nghwiliye hamba hadodo kuli zono wakondya kunyinhumila, nene hamonga na we mhuga yangu. 19Kumbe sunga nalu wukali wujendeleye du kunyinhumila na zinji kanyhi, hambi nha wehuwiza za kuli lulelo lwangu za ku myaka yono yikuza. Alu yo nhavivi kumbe vyo kuwatendelaga wanhu! 20Alu ane ho nalonga cici kanyhi kuli'gwe! Agwe wumanyile zangu zose, ane no mwitumami wako. 21Hambi nha wo wuhile wako gwegwe ku wituma zizi, nagwe wetuma zimbaha ho wunyijize ne. 22Gwe go Muwaha Mulungu, yo gwegwe du Muwaha wuli wene! Hasina kanyhi hamba yunji wo wose mono yehwanile gwegwe, nase cimanyile vyono yo gwegwe Mulungu du wuli wene. 23Kanyhi, baha mono'nze, hasina hamba nghungugo yinji yo yose yono yihwanile nghungugo ye Waisilayeli, wono wawaponya mu wulawa mu wuwanda, wukawa kuwanoza wawe wanhu wako go mweneco. Ne zimbaha kanyhi zo wogofye, zono wetuma so wanhu wako wa Isilayeli, zizo du zo zawumanyiza u wuwaha wako mono yinze yose. Nagwe wukawawinga makungugo ganji hamonga ne milungu yawo yose, kumwande ye wanhu wako wa Isilayeli, wono wawakomboza ku wulawa ku Misili. 24Wukawanoza wawe wanhu wako cibitilila, nagwe go Muwaha Mulungu, wukawa Mulungu wawo.
25“Holeka aluno go Muwaha Mulungu, nghukulomba wufisilize mapango gose, u wihuwizo wako wono wanyihuwiziza ane hamonga no lulelo lwangu, kanyhi witumaje nha vyono walonga. 26No lukumyo lwako locila kuwa luwaha muno, sunga ne wanhu wowa kulonga cibitilila wakutya, ‘Muwaha Mulungu we mihanga vilungo mbeka yo Mulungu wa Waisilayeli.’ Nagwe baho ho kojendelela kuwakumbucila wo lulelo lwangu vilo vyose. 27‘Gwe go Muwaha Mulungu we mihanga, go Mulungu wa Isilayeli! Gwe go Muwaha Mulungu, ane nina wuluwuce wo kukulomba lilombo lilino, hambi nha yo gwegwe mono wangubulila zizino zose, ane no mwitumami wako. Kanyhi wanonjela nha vyono, kowanoza wo lulelo lwangu wawe watemi.’
28“Holeka aluno go Muwaha Mulungu, agwe yo gwegwe Mulungu, nagwe kukamisaga wihuwizo wako, nagwe wakondya kunyihuwiziza wihuwizo wuwu wo wizine. 29Holeka aluno nghukulomba, wuwalugutize wo lulelo lwangu wose, ho wajendelele mu nyemo yo wuswanu wako. No wulugute wako, wokwikala mu lulelo lwangu cibitilila. Hambi nha yo gwegwe go Muwaha Mulungu mono wehuwiza zizi.”
Currently Selected:
2 Samwili 7: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
