2 Samwili 22
22
U lwimbo lwa Dawudi lwo wusume
(Zab 18)
1Na lono Muwaha Mulungu yali yakondya kumusumila Dawudi kuli Sawuli na kuli walugu wakwe wanji. Hodu Dawudi yakawa kumwimbila Muwaha Mulungu lwimbo alu yakatya,
2“Muwaha Mulungu wo wutizizo wangu,
lyo ligomawakali lyangu lye vilungo.
3Mulungu wangu wo wutizizo wangu,
nane nikaye mholile muli mwene.
Yakuwa kunyhitila kotya ngula,
kandimaga no kumbika mholile.
Kanyhi yo mukombozi wangu,
kanyhitilaga no kumhonya mu zimbali.
4Nimulililaga Muwaha Mulungu,
nayo kamhonyaga muli walugu wangu.
Muwaha Mulungu yalumbwe!
5“Hambi i mawingo ge lifwa, nha gali gamhilime,
ne mahwazi go wongomezwe, gakunghola mucanyha yangu.
6Ne zimbali ze lifwa zali zimhilime,
ne mitego ye lifwa yali yinhejeze nene.
7Na mu wugaye wangu nghamucemeleza Muwaha Mulungu,
nghamucemeleza Mulungu yamhele wutazi.
Na mu Nyumba yakwe yakalihulika lizi lyangu,
yakacihulika cililo cangu co kulondola wutazi.
8“Yisi nayo yikasinjisika, yikacicima,
ne misinji ya ku wulanga yikatinuka,
yikasinjisika vyono Mulungu yali yena likuwo!
9Lyosi likakomoka mu mhula zakwe,
malambi go wutakamize, hamonga no moto we makala,
vikalawa mu mulomo wakwe.
10Yakawudemula wulanga, yakatima hasi
hamonga ne citi ciwaha ce mavunde ha magulu gakwe.
11Yakagulucila mwi'Kelubi
yakajendela mu mabawa ge mbeho.
12Yakegubika no wutitu,
mavunde mazito, gamemile malenga gamupilime.
13Makala go moto gakaka,
ha wuzelu wa ha mwande yakwe.
14Hanyuma u Muwaha Mulungu yatowa lididimo
ku wulawa ku wulanga,
ne lizi lyo Mulungu mono Yalawiliciye, likahulikwa.
15Yakazigumila zisonga zakwe, yakaweyagaza
walugu wakwe, yakawawinga ko wumwekule we limuli.
16Lilenga likanyazwa, hakawa hakavu,
no musinji we yinze wukawa wuli mwazi,
lono yawakalipila walugu wakwe,
no kuwakolomela kwe likuwo lyakwe.
17“Muwaha Mulungu yakatima hono hasi
ku wulawa kucanyha, yakanyibatiliza,
yakamhonya mu wulawa mu malenga menji.
18Yamhonya mu miwoko ye walugu wangu we vilungo,
na kuli wose wono wasulile.
19Na lono nali nili mu wugaye, walugu wangu wakanyiziza,
ninga Muwaha Mulungu yakamhonya.
20Yakamhonya ku wulawa mu mbali,
yamhonya vyono yali yendezwe nane.
21“Muwaha Mulungu kahumbilizaga,
vyono nane nitumaga zo wiling'ano,
kandugutizaga, hambi nha sina masutya.
22Hambi nane nha nilikamisaga lilajilizo
lyo Muwaha Mulungu
nghali hamba sinamugaluka Mulungu wangu.
23Nane niwukamisaga wulajilize wakwe,
nghali nagabeza ne malajilizo gakwe.
24Kanyhi yamanyile vyono ane sina masutya,
ngheyimila ho ndece kusutya.
25Muwaha Mulungu kahumbilizaga,
vyono nane nitumaga zo wiling'ano,
hambi nha yamanyile vyono ane sina masutya.
26“Gwe go Muwaha Mulungu, agwe wuli mwihuwilwa
kuli wono wehuwilwa kuli gwe,
kanyhi wuli muswanu muno kuli wose
wono wali mugoloka.
27Agwe welile kuli wono welile,
ninga wuwasulile i wanhu wabi.
28Agwe kuwaponyaga i wenenenyhezi,
ninga kuwanyetyaga wono wakwikumya.
29Gwe go Muwaha Mulungu,
yo gwegwe go wuzelu wangu,
kumbusizaga wutitu hali'ne.
30Kumhelaga vilungo vyo kwihomela ne walugu wangu,
kanyhi kumhelaga wusume wo kugazumha majinji gawo.
31Nzila zo Mulungu, za mugoloka
ne zinghani zakwe za mbeka.
Mwene wo wutazi kuli wono wakutiziza kuli mwene.
32“Nayo Muwaha Mulungu, yo Mulungu du yali wene,
Mulungu du yali wene yo mudimi wetu.
33Mulungu yuyu lyo ligomawakali lyangu,
yo kanhongaga mu nzila yo mugoloka.
34Kaganozaga magulu gangu gawa nha ga nhemanyika,
kanghamisaga mholile mu matunda.
35Kanyijizaga zinzila zo wihomi mu wulugu,
ho sume kuwitumamila wupinde wono wukamile.
36Gwe go Muwaha Mulungu, wunhaze kanyhi wumhonye,
hambi wutazi wako nha wamhela lukumyo.
37Wanhaza lono nali nhecigwe
hamba nghali nagwa hasi yaye.
38Nghawalonda i walugu wangu nghawongomeza,
nane sinolecela lukulu, sunga kolo nawongomezeza lukulu.
39Nghawagwisa hasi, hamba si wosuma kwinuka kanyhi,
heya, wagwa hasi ye magulu gangu.
40Kumhelaga vilungo mu milewo,
hamonga no wusume kuli walugu wangu.
41Wukawanoza walugu wangu watize ha mwande yangu,
niwongomezeze lukulu wono wasulile.
42Wakalondola wutazi,
ninga hamba si wamutuga mono kowaponya.
Wakamucemeleza Muwaha Mulungu,
ninga nayo hamba si yawapitula yaye.
43Nane nghawapondanga, wakawa nhe manghundi,
nghawakanyanjila nha nhope ya mu nzila.
44“Agwe wanhaza mu miwoko ye wanhu wangu wagaluci,
wukanghamisa niwe muwaha mu makungugo,
ne wanhu wono nali si niwamanyile,
alu woweza wetumami wangu.
45Ne wanhu wajenzi, wakunyinamila,
na lono nghulonga, wakuhulika.
46Nawo vilungo vyawo vyakondya kumalika,
alu wakuza wakucicima, wakulawa mu magomawakali gawo.
47“Muwaha Mulungu yo mumi!
Yalumbwe u mudimi wangu!
Ale, mwanze zo wuwaha wakwe,
u Mulungu mono yali vilungo mono kamhonyaga!
48Hambi nha kamhelaga wusume muli walugu wangu,
kawacepulaga vilungo makungugo ha mwande yangu,
49kanyhi kamhonyaga kuli walugu wangu.
Gwe go Muwaha Mulungu, kumhelaga
wusume kuli walugu wangu,
kanyhi kunyitilaga ne wanhu wabi.
50“Holeka nane nghukulumbila mu makungugo,
kanyhi nolimbila ne litagwa lyako.
51Mulungu kamupelaga wusume mutemi wakwe,
kalajilaga lusungu lwakwe luwaha kuli mono yamuhagula,
kuli Dawudi hamonga ne wanagwe cibitilila.”
Currently Selected:
2 Samwili 22: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
