1 Samwili 7
7
1Ale, wanhu wa Kiliyati Yeyalimu, wakabita wakalisola lilyo Lisanduku lye Cilagane lyo Muwaha Mulungu, wakalitegula ku kaya ya Aminadabu, mono yali yazenjile ha cigongo. Wakawa kumusiwanula Eleyezali u mwanagwe, yo yawe mulanjilizi we Lisanduku lye Cilagane lyo Muwaha Mulungu.
Samwili, yakuwa mutemi kuli Isilayeli
2Nalyo Lisanduku lye Cilagane lyo Muwaha Mulungu, likekala vilo vinji muno muno ku Kiliyati Yeyalimu, kotya myaka makumi mejete. Na mwidaha lyose lilyo, Waisilayeli wamulombaga muno muno Muwaha Mulungu yawapele wutazi. 3Nayo Samwili yakawalonjela Waisilayeli yakawatya, “Hono muwe mbeka mukumuwuyila Muwaha Mulungu, kwe zinhumbula zenyu zose, ale munojeye muwusize lukulu milungu yenyu yose ye cijenzi, hamonga ne vihwani vyose viseswe vye cihwani co mulungu we cicekulu Asitaloti. Mwiyilavizye lukulu nyo weneco kuli Muwaha Mulungu, mumuhembe mweneco yali wene du. Nayo komuponyenyi mu miwoko ye Wafilisiti.” 4Hobaho i wanhu wa Isilayeli wakawa kuviwusa vihwani viseswe vya Baali, hamonga ne vihwani viseswe vya Asitaloti, wakawa kumuhemba Muwaha Mulungu yali wene.
5Hanyuma, Samwili yakawa kuwacema Waisilayeli, wekonghole wose hamonga ku Mizipa, yakawa kuwalonjela yakutya, “Ane nomulombelenyi kuli Muwaha Mulungu kuko ku Mizipa.” 6Wose wakawa kwihanguliziza kuko ku Mizipa. Wakanega malenga, wakagapulinhya hali Muwaha Mulungu, cikawa nha cilavywa kuli Muwaha Mulungu, kanyhi wakaleka no kulya mwi'zuwa lilyo. Wakalonga wakutya, “Ase cakondya kumusutizya Muwaha Mulungu.” (Samwili yakawa mulamuzi muli Waisilayeli baho ha Mizipa.)
7Nawo Wafilisiti wali weza kuhulika, vyono Waisilayeli wekongholeye ha Mizipa, hodu wa walya i wawaha wahano, wakawa kwanza kuwawikaniza wanhu wawo wawahome. Nawo Waisilayeli wakazihulika zizo, wakenjilwa no woga wuwaha. 8Wakawa kumulonjela Samwili wakatya, “Alu Samwili, wujendelele kumulomba Muwaha Mulungu, u Mulungu wetu, ho yaciponye mu miwoko ya Wafilisiti.” 9Nayo Samwili yakasola nyana ye ngholo ndodo, yakayiwulaga, yakawa kuyilavya yikumbiko yinyanye kuli Muwaha Mulungu. Hanyuma ho yakawa kumulomba Muwaha Mulungu, yawapele wutazi Waisilayeli. Nayo Muwaha Mulungu yakawubocela wulombe wakwe. 10Na lono Samwili yali yali mu wulavya likumbiko, Wafilisiti wakawa kuza wawahome Waisilayeli. Ninga Muwaha Mulungu yakalavya lididimo yiwaha muno mwizuwa lilyo, likawevyajiza Wafilisiti wakajililwa ne mahala, wakawa kutiza so mahwele. 11Nawo Waisilayeli, wakawa kuwalondelela Wafilisiti mu nyuma yawo, ku wulawa baho ha Mizipa, wakawa kujendelela kuwawulaganga mumo mu nzila, sunga wakawafisa ko ku Betekali.
12Baho Samwili yakasola yibwe, yakalisimya hagati ya Mizipa na Sheni, yakatya, “U Muwaha Mulungu kacitaza mu nzila yose.” Holeka yakalicemela litagwa lya Ebene-zeli. Nhunizo yayo Libwe lyo wutazi. 13Hodu, Wafilisiti wakawa wasumwa, no Muwaha Mulungu yakawemila, ho walece kuyisola yisi ye Waisilayeli mu mapango gose gono Samwili yali yakali cawumi. 14Makaya gose gono gali gasolwa ne Wafilisiti, ku wulawa Ekiloni sunga Gati, gose gakagomolwa kanyhi kuli Waisilayeli. Holeka Waisilayeli wakawa wakondya kuyituga kanyhi yisi yawo yose nha vyono yali yinha. Kanyhi hakawa na mulamu muno kuli Waisilayeli ne Waamoli.
15Yuyo Samwili, yajendelela kuwalamula Waisilayeli, mu vilo vyakwe vyose vyo wikale wakwe. 16Nayo mu myaka yose, yapilimaga ku Beteli, na Giligali, na Mizipa, no kuwalamula Waisilayeli mu zinghani zawo. 17Na hanyuma kawa kuwuya kanyhi ku wikalo wakwe ku Lama, hono naho yawalamulaga Waisilayeli nhavivyo. Yakamuzenjela ne cikumbicilo Muwaha Mulungu baho ha Lama.
Currently Selected:
1 Samwili 7: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
