1 Samwili 31

Wufwe wa Sawuli, hamonga ne wanagwe we cilume

(1Zin 10:1-12)

1Wafilisiti ne Waisilayeli wakehomela mucanyha ye litunda lya Gilibowa. Ne Waisilayeli wenji muno muno wawulagwa, na wono wasigala hamonga no mutemi Sawuli, ne wanagwe we cilume, wose wakatiga. 2Ninga hamba nhavivyo, i Wafilisiti wakawawinga sunga wakawebata, wakawa kuwawulaga i wana wadatu we cilume wa Sawuli, Yonazani, Abinadabu, na Malikishuwa. 3No wihomi wukawa wuwaha muno muno, sunga na Sawuli mweneco yakagumwa ne zisonga ze walugu, yakatamiswa muno muno. 4Nayo Sawuli yali yeza kuwona vyono yatamiswa muno, hodu yakawa kumulonjela muzelelo mono yali yamudinghuliye vitwalo vyakwe, yakatya, “Ale, wukweje mumaje wako mu njasulu, wumbulaje, i Wafilisiti ho walece kunyibata no kumbulaga.” Ninga muzelelo yu yulya yakebatwa no woga muno yakalema kuyituma nghani yiyo. Hodu, Sawuli yakawusola mumaje wakwe mweneco, yakawugwila. 5Nayo muzelelo yu yulya yali yeza kuwona vyono Sawuli yakondya kufwa, hodu nayo yakawa kwigumila mweneco mu mumaje wakwe, vikawa kufwizana na Sawuli. 6Ale, nhavivyo vyo wakafwa, Sawuli, ne wanagwe wadatu we cilume, hamonga no muzelelo u mudinghula vitwalo vya Sawuli. Ne wanhu wose wa Sawuli, wakawulagwa mwi'zuwa lilyo. 7Nawo wa Isilayeli wono wali wali ku lubavu luyagwe lwe lilolo lya Yezeleli, na ku lubavu lwa kucilima ye likolongo lya Yoludani, wali weza kuhulika nha vyono wasilikale we wa Isilayeli wakondya kutiza, kanyhi na vyono Sawuli hamonga ne wanagwe wadatu we cilume, wose wakondya kuwulagwa, hodu nawo wakawa kugaleka makaya gawo, wakawa kutiza. Nawo Wafilisiti wakawa kugasola.

8Kukawa i mitondo yaco, i Wafilisiti wakawa kubita kuvisola mateka i vinhu vya wono wali wawulagwa, kumbe wakawa kuwuwona sunga no muvimba wa Sawuli, hamonga ne mivimba ye wanagwe wadatu we cilume, yibiligaye mwi'tunda lya Gilibowa. 9Wakawa kuwudumula mutwe wa Sawuli, wakamuwopola ne vitwalo vyakwe, wakawatuma wanhu wavilajile mu yisi yose ye Wafilisiti, wawalonjele wanhu ze nghani swanu kuli vihwani vyawo, na kuli wanhu wawo wose. 10Hanyuma ya zose, wakawa kuviwika vitwalo vyakwe mu nyumba ye milungu ya Ashitaloti, ninga u muwili wakwe wakawukomanhila mwi'jinji lye likaya lya Bete-shani.

11Nawo i wanhu wa ku Yabeshi ya ku Gileyadi, wali weza kuzihulika zono Wafilisiti wamutendeye Sawuli, 12hodu, i vitung'ati wose wakenuka wakajenda cilo cose sunga wakafika ku Bete-shani. Wakawusola muwili wa Sawuli, hamonga ne miwili ye wanagwe wadatu we cilume, wakayitegula ku Yabeshi, wakayitakamiza. 13Wakasola i mafupa, wakagazika hasi yo mubici wo musisi, mu cikaya ca Yabeshi. Nawo wakaleka kulya vilo mupunghati.

Currently Selected:

1 Samwili 31: LLKWW

Highlight

Copy

Compare