1 Samwili 24

Dawudi si yakumuwulaga Sawuli

1Nayo Sawuli yali yeza kuwuya ku wulawa mu wihome ne Wafilisiti, yakalonjelwa nha vyono Dawudi yehundice mu nyika behi na Engedi. 2Hodu Sawuli yakawa kusola mu Waisilayeli wasilikale vitung'ati wo wulugu, waficile elufu yidatu liwalo lyawo. Yakawa kubita nawo ku wulondola Dawudi ne wanhu wakwe, ku lubavu lwa kucilima, mucanyha ye mabwe ge zimhene za mu mbago. 3Nayo Sawuli lone yali yali mu muhinzo wakwe, yakafika hono hoyili mhango, yinji yono yali yili behi ne mabululu ge zingholo, ha mhelo ye nzila. Hodu yakawa kwinjila mumo mu mhango ho yabite kunze. Kumbe yikawa yo mhango yono Dawudi hamonga ne wanhu wakwe, wali wehundice mumo mugati. Ninga wakawa wali kugati muno muno ye mhango. 4Nawo wanhu wakamulonjela Dawudi wakatya, “Ale, nhondo, acino co cilejeho cako cono Muwaha Mulungu yakulonjela nha vyono, komuwika mulugu wako mu miwoko yako, nagwe kosuma kumutendela nha vyono wendile go mweneco!” Hodu Dawudi yakawa kumusepa Sawuli mhola mhola, yakawa kulitema cinyele limhembo lyo mwenda wa Sawuli, mwene Sawuli hamba kumanya yaye. 5Ninga ciselinji cakwe Dawudi cikawa kwanza kumugaza muno muno 6yakawa kuwalonjela i wanhu wakwe, yakawatya, “Muwaha Mulungu, yanyhitile, ho ndece kwituma nghani yo yose ye citamisi kuli muwaha wangu, mono Muwaha Mulungu yamuhagula yawe mutemi! Holeka si yinojeye ane nimutamise hamba hadodo, hambi nha mutemi muhagulwa no Muwaha Mulungu!” 7Na ku soko ye zinghani zizo, yakawemila wanhu wakwe walece kumuwulaga Sawuli.

Nayo Sawuli yakenuka yakawuka mu mhango yakawa kubita kono yabitaga. 8Hanyuma hadodo, Dawudi yakalawila mu mhango, nayo yakawa kwanza kucemeleza yakutya, “Gwe mutemi!” Nayo Sawuli yakapituka, nayo Dawudi yakagundama sunga ho hasi yakulajila cogopo cakwe kuli mutemi Sawuli. 9Yakawa kumulonjela Sawuli yakutya, “Alu, nhawule wali kuwahuliciza wanhu wono wali kukulonjela vyono ane nghuhila nghutamise? 10Ale, alu kosuma kuwona go mweneco, vyono lulu baha du lono wali wuli mu mhango, Muwaha Mulungu yali yakutajila mu miwoko yangu. Ne wanhu wangu wanji, wali wanonjela vyono nghuwulaje kamonga du. Ninga ane nghukalalila muno muno, sunga niwa kutya, vyono si nosuma kukutamisa hamba hadodo, hambi agwe, nha yo gwegwe mono Muwaha Mulungu yakuhagula wuwe mutemi. 11Holeka agwe baba, wulanje ta, acino cimhembo cono nibate mu muwoko wangu co nicitemile mu mwenda wako! Nali nghuwulaje, ninga niwa kutema cimhembo cici du. Ne nghani yiyi, yo yokunoza wihuwile vyono ane sina lihweso hamba hadodo lyo kukubedegala, hamba kukutamisa yaye. Ninga agwe wukusepa ho wumbulaje, nane kumbe ho si nghusutizye hamba nghani yo yose. 12Holeka alu, Muwaha Mulungu mweneco yo koling'aniza no kulajila nani mubi muli sese co wejete! Ciba le, yali yakulipicize so litumo lyako kuli'ne. Vyono ane si nosuma hamba hadodo kukutamisa. 13Nitumbiye wumanyile vyono wawaha walongaga wakutya, ‘I zinghani zimbi, zitumwaga ne wanhu wabi.’ Holeka ane si ndahile hamba hadodo kukutamisa yaye. 14Alu wulanje ta, u mutemi we Waisilayeli, yakulondola yawulaje nani? Lanje ta, alu kowa yakumusepa nani? Yibwa lyono lifwiye, hamba cikukupani cimonga? 15Muwaha Mulungu yo koling'aniza, kanyhi yo kolamula yalajile nani mubi muli sese co wejete. Muwaha Mulungu yayilanje nghani yiyi, yandime, kanyhi yamhonye kuli'gwe.”

16Dawudi yali yeza kuzilonga zizi, hobaho nayo Sawuli yakawa kutya, “Alu yo gwegwe mbeka mwanangu Dawudi?” Hodu Sawuli yakawa kwanza kulila mahozi. 17Hanyuma yakawa kumulonjela Dawudi yakatya, “Mbeka agwe mwanangu, wina ling'ani, ninga ane nili musutyi. Hambi nha wina nhumbula swanu muno kuli'ne, ninga ane nghutendela nghani 'mbi muno! 18Izuwali langa mbeka kwilajila vyono winha kuli'ne, vyono si wumbulaje, hamba yiwe Muwaha Mulungu yali yakodya kunhajila mu miwoko yako. 19Hambi mbeka, kalinga kono munhu kamwibataga mulugu wakwe, hanyuma kanyhi kawa kumulecela hamba kumutendela vibi yaye? Holeka Muwaha Mulungu yakulugutize muli zose zono wunhendeye zuwali! 20Nane luno, ho namanya vyono kowa mutemi muli Isilayeli, na vyono no wutemi wojendelela viswanu mu wutonji wako. 21Ninga luno, nghukunena wunyihuwizize mwi'tagwa lyo Muwaha Mulungu, nha vyono kowaleka wo lulelo lwangu, litagwa lyangu hamonga ne litagwa lya we mhuga yangu, ho lilece kusemelwa lukulu.” 22Nayo Dawudi yakawa kwihuwiza nha vyono konoza nhavivyo.

Hodu, Sawuli yakawa kuwuya kwawo. Nayo Dawudi hamonga ne wanhu wakwe, wakawa kuwuya kanyhi ha wihundiko wawo.

Currently Selected:

1 Samwili 24: LLKWW

Highlight

Copy

Compare