1 Samwili 15
15
Waamaleki wakuhomwa
1Hodu, Samwili yakawa kumulonjela Sawuli yakatya, “Ane yo nene, mono Muwaha Mulungu yanhuma kuli'gwe nghwitile mafuta wuwe mutemi muli wanhu wakwe Waisilayeli. Alu nghukulomba, wuhulicize zono Muwaha Mulungu Mudaha Vyose, yakulonga yakutya nhavi, 2vyono mwene kowalipiciza wanhu wa Ameleki, ku soko ye so zinghani walezi wawo wawatendelaga Waisilayeli. Hambi nha wawasepaga mu zinzila, lono walawaga ku Misili. 3Holeka alu, wubite wukawahome Waamaleki, wuvyongomezeze lukulu vinhu vyawo vyose. Wulece kusigaza cinhu hamba cimonga, langa wuwawulagaje i walume wose, ne wacekulu wose, ne wana wadodo, ne wana wose wagalika, hamonga ne zing'ombe zose, ne zingholo zose, ne zingamiya zose, sunga ne zindogowe zose.”
4Nayo Sawuli yakawa kulikongholela hamonga ku Telemu, lipuga lye wasilikale wakwe wo wulugu, yakawawala. Nawo wali waficile wasilikale elufu magana mejete, wono walawa mu Isilayeli, hamonga na wanji elufu yikumi, wono walawa ku Yuda. 5Hodu, yakawa kutuluka hamonga ne wanhu wakwe, wakawa kubita kwi 'kaya lye Waamaleki, wakawa kwihundika mwi'lolo. 6Yakawasugula i Wakeni, wono i walezi wawo wali wena nhumbula swanu kuli Waisilayeli, lono wakolaga mu zinzila wakulawilila ku Misili, yakatya, “Ale, nyo Wakeni, muwuce mwipuga lye Waamaleki, ho yilece kuwa nimuhanzilizenyi nawo, nimuwulajenyi wose hamonga nawo.” Ale, nawo Wakeni wakawa kuwuka.
7Nayo Sawuli yakawasuma Waamaleki, yakawahoma nzila yose ku wulawilila ku Havila sunga ko ku Shuli, ku lubavu lwa kucilima lwa Misili. 8Yakamwibata mumi mutemi Agagi wa Amaleki, yakawawulaga wanhu wose. 9Ninga Sawuli hamonga ne wanhu wakwe, wakamuleka Agagi mumi. Kanyhi hamba si waziwulaga ne zingholo zono zali zijinile, hamonga ne zing'ombe, ne zinyehe ne zinyana ze zingholo, sunga ne vinhu vinji viswanu si wavyongomeza. Langa wene wakongomeza du vyono vyali si viluwucile yaye, hamba kuwa na cambuzi co cose.
Sawuli si yakusakwa kanyhi yawe mutemi
10Kanyhi Muwaha Mulungu yakamulonjela Samwili yakatya, 11“Nghukalala muno muno vyono namunoza Sawuli yawe mutemi, hambi 'lu nha yakondya kundeka, kanyhi yakondya kugabedegala ne malajilizo gangu.” Nayo Samwili yakawa kukolwa ne likuwo. Na mu cilo ci cilya cose, yakagona yakulomba kuli Muwaha Mulungu. 12Ne mitondo yaco, yakawa kwilawa hakali mitondo muno muno, yakawa kubita yakamulondole Sawuli. Hambi nha yali yahulika, nha vyono Sawuli yali yabitile ku cikaya ca Kalimeli, hono yali yazenga cikumbucizo cakwe, hanyuma yakawa kubita ku Giligali. 13Nayo Samwili yakawa kumubitila Sawuli, nayo Sawuli yakamulamusa Samwili yakutya, “Gwe Samwili, Muwaha Mulungu yakulugute! Nane nha nakondya kwituma zose nha vyono Muwaha Mulungu yalajiliza.”
14Nayo Samwili yakamuwuza Sawuli, yakatya, “Alu cililo cici ca cici cono nghucihulika, cililo ce mazi ge zing'ombe na ge zingholo?” 15Sawuli yakapitula yakatya, “I wanhu wangu wazisola kulawa kuli Waamaleki. Wene wahagula zingholo zono zijinile, ne zing'ombe zono zina miwili miswanu, ho wazilavye likumbiko kuli Muwaha Mulungu u Mulungu wako. Ninga zinji zose, cizongomezeza lukulu.” 16Nayo Samwili yakamupitula Sawuli, yakatya, “Ale, wime ta nane nghulonjele zono Muwaha Mulungu yanonjeye mu cilo cici.” Sawuli yakatya, “Ale ta nonjela.”
17Samwili yakamupitula yakamutya, “Hamba wuwe wukwiwona agwe nha si wukwiliye cinji, ninga wahagulwa wuwe mulongola mu nghungugo yose ye Isilayeli. Nayo Muwaha Mulungu yakakwitila mafuta, ho wuwe mutemi we Waisilayeli. 18Nayo yakutuma wubite wukawongomezeze lukulu i wa Ameleki i wanhu wabi. Kanyhi yakakulajiliza vyono wubite wukawahome sunga wuwawulajile lukulu wose. 19Alu nhawule 'gwe kanyhi kubedegala wulajilize wakwe, kuwa kwikala si wumuhulice? Hamba nhawule kumanyhilila ku wusola mateka. Nagwe kuwa kwituma zono si zikumwendeza Muwaha Mulungu?”
20Ninga Sawuli yakamupitula Samwili yakatya, “Ane nituma nha vyono Muwaha Mulungu yali yandajilize, hambi nha mbita nha vyono yali yanhumile, nane niwa kumuleta mutemi Agagi, ninga Waamaleki wose niwawulaga. 21Ninga i wanhu wangu weneco wo si waziwulaje zingholo hamonga ne zing'ombe zono zijinile zono wazitecile, langa wawona viswanu wazilece zili nyumi. Nawo wawa kuzileta bahano ha Giligali, ho wamulavizye Muwaha Mulungu wako likumbiko.”
22Nayo Samwili yakamupitula yakatya,
“Alu Sawuli,
wukwihwesa Muwaha Mulungu yakwendezwa na nghani ya hayi,
cihuliko, hamba vilavywa vye makumbiko?
Ninga ane nghukutya,
yili ciba kuwa ne cihuliko kuli mwene,
si nha kumulavizya zingholo zono zijinile.
23Hambi u wula cihuliko kuli mwene,
nha nghani 'mbi muno muno,
yihwanile no wubi wo wuhawi.
Na yo wuhemba vihwani,
nayo yo nghani 'mbi muno muno
yihwanile no wubi wo wusenyha.
Holeka agwe lu vyono wakondya kulibedegala
lilajilizo lyo Muwaha Mulungu,
ale, nayo kakondya kukulema wulece kujendelela kuwa mutemi.”
24Sawuli yakamupitula yakatya, “Heya mbeka, netuma wubi, hambi nha nakondya kulibeza lilajilizo lyo Muwaha Mulungu, hamonga ne zinghani zako. Hambi nha niwogopa wanhu wangu, nane niwa kwituma nha vyono weneco wendile. 25Ninga aluno nghukulomba, wunenele wubi wangu wuwu, alu ciwuyane wose hamonga nagwe, nane ho nghasume kumuhemba Muwaha Mulungu.”
26Ninga Samwili yakamutya Sawuli, “Ane si cojendana hamonga nagwe Sawuli, hambi 'gwe nha wakondya kulibedegala lilajilizo lyo Muwaha Mulungu, nayo kakondya kukulema wulece kuwa mutemi we Waisilayeli.”
27Nayo Samwili yali yeza kukondya kulonga zizo, hodu yakawa kwanza kutuluka yawuye kwakwe. Ninga Sawuli yakebata limhembo lye likoti lya Samwili, yakalizinya zii, sunga likademuka. 28Baho Samwili yakawa kumulonjela Sawuli yakamutya, “Alu Muwaha Mulungu nayo yawudemula zuwali wutemi wako kuli Isilayeli, yamupela munhu yunji mono muswanu yakucizize gwegwe. 29Hambi Muwaha Mulungu mono mwene, wo lukumyo, lwe Waisilayeli, nha si kalongaga zo wulambi, kanyhi yasina cipitupitu mu mutima wakwe.” Hambi mwene nha si munhu yaye ho yawe ne cipitu-pitu. 30Sawuli nayo yakapitula yakatya, “Heya mbeka, netuma wubi. Ninga hamba nhavivyo, nghukulomba wumhele lilumbo hali walongola we wanhu wangu, na hali Waisilayeli wose. Alu cibite ciwuyane nane, nane ho nghasume kumuhemba Muwaha Mulungu wako.”
31Ale, du, nhondo Samwili yakawa kuvumila, wakawa kuwuyana hamonga nayo. Nayo Sawuli yakamuhemba Muwaha Mulungu. 32Nayo baho Samwili yakamulonjela Sawuli yakatya, “Ale wundetelaje ahano Agagi mutemi we Waamaleki.” Nayo Agagi yakawa kuza kuli Samwili, yakucicima so woga, akuno yakwihwesa mweneco mu nhumbula yakwe yakutya, “Na mbeka lifwa co cinhu co wusungu muno!” 33Nayo Samwili yakawa kumulonjela Agagi yakamutya, “Nha vyono mumaje wako wawanoza wacekulu wawe wafwiliywe ne wana wawo wose, ale, nhavivyo no nyina yako nayo, kofwilwa ne wanagwe wose nhe wacekulu wanji.” Hobaho du Samwili yakawa kumutemasha mutemi Agagi viponje viponje, ha mwande ye cikumbicilo baho ha Giligali. 34Hanyuma ya zizo, hodu Samwili yakawa kutuluka yakawa kubita ku Lama. Nayo mutemi Sawuli, yakawa kuwuya kwawo ku Gibeya. 35Nayo Samwili, ku wulawilila baho, hamba si vyewona kanyhi no mutemi Sawuli mu vilo vyose vyo wikale wakwe. Langa mwene yamukalalilaga Sawuli muno muno. Nayo Muwaha Mulungu yakatuga wukalale wuwaha, vyono yamunoza Sawuli yawe mutemi we Waisilayeli.
Currently Selected:
1 Samwili 15: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
