1 Samwili 13

Wulugu kuli Wafilisiti

1Sawuli yali yaficile myaka yo wutunga, lono yamulila kutema. Yakatema myaka yo wutunga mu Isilayeli. 2Sawuli yakawahagula wanhu we cilume elufu yidatu. Yakawasola wanhu elufu nyejete, wakawa wali hamonga nayo ku Mikimashi, na mu yisi ye matunda ya Beteli. Yakawasola wawalya we elufu monga, yakawatuma hamonga na Yonazani u mwanagwe, wabite ku Gibeya, mu yisi ya wo mulango wa Benyamini. Ne wanhu wose wono wasigala, Sawuli yakawakombola wawuye ku zikaya zawo. 3Yonazani yakamuwulaga mulongola we Wafilisiti, kuko ku Geba. Ne Wafilisiti wose wakazihulika zizo. Hanyuma Sawuli yakatuma wanhu watowe ndulele mu yisi yose, wawalalice Wahebelaniya wose waze ku wulugu. 4Ne Waisilayeli wose, wakalonjelwa nha vyono Sawuli yakondya kumuwulaga mulongola we Wafilisiti, na vyono alu Wafilisiti wakondya kucisula. Hodu, wanhu wakawa kwikonghola hamonga, wakawa kubita kwilunza na Sawuli ku Giligali.

5Nawo Wafilisiti wakawa kwikonghola ho wehome ne wa Isilayeli. Wafilisiti wakawa wena matuka go wulugu elufu makumi madatu, ne wasilikale wapanda fwalasi, elufu mutandatu, ne wasilikale wenji muno muno kotya musawawa wa mwilenga. Ale, Wafilisiti wakawa kubita kusimya nghambi yawo ku Mikimashi, ku cilima ye Beti-aveni. 6Wafilisiti wakawa kuwabitila Waisilayeli kwa nghakamo mbaha, sunga ne Waisilayeli wali weza kuwawona Wafilisiti wakuwaziza, hobaho wakenjilwa ne mahwele, wakawa kwanza kutiza no kwihundika. Wanji wakehundika mu zimhango, wanji mu makombo, wanji mu mabwe, wanji mu vititika, na wanji mu masima. 7Na wanji wakatiza wakalowoka likolongo lya Yoludani, wakenjila mu yisi ya Gadi na ya Gileyadi.

Ninga lulo, Sawuli yali yakali yali ku Giligali. Ninga hamba nhavivyo, i wanhu wono wali wali hamonga nayo, wacicimaga so woga. 8Sawuli yakekala baho vilo mupunghati yamulindiye Samwili, nha vyono Samwili yali yamulajilize. Ninga Samwili yakawa yakali du si yanafika ku Giligali. Sunga ne wanhu nhondo wakanza kwiyagala. 9Sawuli yakawalonjela wanhu yakawatya, “Ale, mundetele makumbiko manyanywe, hamonga ne makumbiko go mulamu.” Hodu yakawa kwanza kulavya likumbiko linyanywe. 10Ninga yali yeza kukondeleza du, Samwili nayo yakawa kuza. Nayo Sawuli yakawa kumuhinjiliza, yakawa kumubocela. 11Ninga Samwili yakamutya Sawuli, “Alo nyhici yiyi yono witumile?”

Nayo Sawuli yakamupitula yakamutya, “Alu wanhu nha wali weza kunyiyagala, nagwe wali wacela ku wuze nha vyono wali wihuwize vyono kokuza mbela. Hamonga na zizo, i Wafilisiti nawo wakondya kwikongholela ha Mikimashi. 12Holeka nane niwa kwihwesa vyono, alu wawa Wafilisiti wohomela bahano ha Giligali, nane kuno nali nghali si ninalomba wutazi wo Muwaha Mulungu, holeka niwa kwihwesa nha vyono ciba ndavye makumbiko.”

13Nayo Samwili yakamupitula yakamutya, “Nghani ayi yono wuyinozize, kunoza nghani ya wulele muno muno. Hamba si wulityatizye lilajilizo lyo Muwaha Mulungu lyono yakulajiliza. Vyono hono wali wulibate, nayo yali yakulece gwegwe hamonga ne wanago mujendelele kuwatema wa Isilayeli cibitilila. 14Ninga aluno, hodu, wutemi wako hamba si wojendela yaye. Hambi nha kumubedegala Mulungu. Holeka nayo Muwaha Mulungu kokwihagulila mweneco munhu mono yakumwendeza, yamunoze yawe mutemi muli wanhu wakwe.” 15Hodu, Samwili yakawa kutuluka, yakawa kuwuka baho ha Giligali. Nawo wanhu wono wali wasigaye, wakamutyatya Sawuli lono yabitaga kwilunza ne wasilikale wakwe. Wakabita Gibeya mu yisi ya Benyamini wakulawa ha Giligali. Sawuli yakawawala i wanhu wono yali yena nawo, wakawa waficile wanhu magana mutandatu. 16Ale baho, Sawuli no mwanagwe Yonazani, hamonga ne wanhu wono wali wena nawo, wakasimya nghambi yawo ha Geba, mu yisi ya Benyamini. Nghambi ye Wafilisiti, yali yili ha Mikimashi. 17Nawo wasilikale we Wafilisiti ha wubite ku wihomi, wakegawa mu vipuga vidatu. Cipuga cimonga wakabita ku lubavu lwa Ofila, mu yisi ya Shuwali. 18Cipuga ce kejete, wakabita ku lubavu lwa Bete-holoni. Ne cipuga ce kadatu, wakabita ku mupaka wono wulanjile kwi'lolo lya Zeboyimu ne nyika.

19Na mu vilo vivyo mu wa Isilayeli, mwali musina mutyani, hambi Wafilisiti, nha wali wawalemeze Wahebelaniya, walece kwityanila mimaje hamba migoha. 20Holeka Waisilayeli, wawabitilaga Wafilisiti ho wakanolelwe masili, ne zihengo, ne zinhemo hamonga ne mitalimbo. 21Ne malipo gayo gali madodo du. 22Na ku soko yiyo, mwi'zuwa lyo wihomi, i wasilikale wose Waisilayeli, wakawa wasina vitwalo, langa Sawuli du no mwanagwe Yonazani, wo wali wena mimaje hamonga ne migoha. 23Wafilisiti wakategula cipuga ce wasilikale wakawudime wukolo wo kwinjilila ku Mikimashi.

Currently Selected:

1 Samwili 13: LLKWW

Highlight

Copy

Compare