1 Samwili 10
10
1Hobaho Samwili yakawa kusola cupa ye mafuta, yakawa kumwitila Sawuli mu mutwe, hanyuma yakawa kumunonela, yakamutya, “Muwaha Mulungu kakwitila mafuta, ho wuwe mutemi muli wanhu wakwe wa Isilayeli. Kotema muli wanhu wakwe, kanyhi kowacitila muli walugu wawo. Naco aci co citanjilo kuli'gwe, cono cikukulajila vyono Muwaha Mulungu yo yakuhaguye wuwe mutemi muli wanhu wakwe. 2Na kolo ceza kwileka nane izuwali, agwe mokwitang'anila na wanhu we cilume wejete, behi ne citenjelo ca Laheli, ha Zeliza, mu yisi ya Benyamini. Nawo wokulonjela nha vyono zi zilya zindogowe zono mwali kuzilondola, alu zakondya kwijela. Holeka hamba no sogo si yakwihwelela ze zindogowe, langa aluno yena mahwele ku soko yako, nayo kekalaga yakuwuza du, ‘Alu nye, ho notenda wule so mwanangu?’ 3Ninga agwe wujendelele du, sunga wufice ha mubici waha Taboli. Na baho naho mokwitang'anila na wanhu wadatu we cilume, wono wowa wakubita ku Beteli kumulavizya Muwaha Mulungu likumbiko. No munhu monga muli wene, kowa yakuhwaga nyana za mhene yidatu. U muyagwe nayo, kowa yadinghuye mikate midatu. Na yunji nayo we kadatu, kowa yadinghuye mufuko wa nyhingo, wumemile divayi. 4Nawo wokulamusa, kanyhi wokupela mikate myejete ya muli yiyo mikate yawo midatu. Nagwe nhondo wubocele. 5Hanyuma wuwe kubita kwi Tunda lyo Mulungu ku Gibeya, kono koyili nghambi ye Wafilisiti. Kolo weza kufika he 'lango lye likaya, baho naho, mokwitang'anila na mhuga ye wawizi wakuwuya wakulawilila he'tunda ha cikumbicilo, akuno wakutowa masumbi ne zing'oma, ne zifilimbi, hamonga no musesele. Nawo wowa wakuwila. 6Ninga nagwe u Muhe wo Muwaha Mulungu wokuziza ne vilungo, nagwe kokwilunza nawo mu wuwile, nagwe kopituka nhinicizo wuwe munhu mupya. 7Na zizi kolo zakondya kwijela, ale witumaje nha vyono Mulungu kokutya witume. 8Hanyuma wunongolele wubite ku Giligali, nane nokwagana kuko, nagwe kolo wafika kuko, wulavye makumbiko manyanywe, hamonga ne makumbiko go mulamu. Hanyuma wikale baho vilo mupunghati, sunga kolo neza kuza, nghulonjele kanyhi zono zinojeye witume.”
9Na lono Sawuli yawukaga hali Samwili, Mulungu yakamupela Sawuli nhumbula mhya. Na zose zono Samwili yali yamulonjela, zikejela zose mwi'zuwa lilyo du. 10Na lono Sawuli hamonga no mwitumami wakwe wali weza kufika ku Gibeya, mhuga ye wawizi wakawa kumuhinjiliza. No Muhe wo Mulungu, wukawa kumuziza ne vilungo nhinicizo, nayo yakawa kwilunza nawo mu wuwizi. 11Nawo wanhu wono wali wamumanyile, wali weza kuwona vyono yakuzinoza zono zinha zizo, wakawa kwanza kwiwuza weneco wose wakutya, “Alo mwene nye, cimwijelela cici mwana wa Kishi? Alu Sawuli nayo yawa muwizi?” 12Munhu yunji, mwikazi wa baho, yakawawuza nayo yakutya, “Alu awa ma nawo i wawizi wanji, u sogo yawo kowa nani?” Na ku wulawilila baho, hodu wukawa mulongo wa vyono, “Sawuli nayo yaweza muwizi?” 13Nayo Sawuli yali yeza kuwila, hodu yakawa kubita ku Cikumbicilo kwi'tunda.
14U sogwe mudodo wa Sawuli, yakamuwona Sawuli hamonga no mwitumami wakwe, yakawa kuwawuza yakutya, “Alo mwali muli hayi?”
Nayo Sawuli yakatya, “Cali cili mu wulondola zindogowe. Nase ceza kuwona vyono si cikuziwona, hodu ciwa kubita kumulondola Samwili.” 15Nayo sogwe mudodo wa Sawuli, yakawuza kanyhi yakutya, “Alu Samwili kakulonjela katya wule?” 16Sawuli yakapitula yakatya, “Kacilonjela katya vyono zindogowe zakondya kwijela.” Ninga si yasuma kumulonjela sogwe mudodo, zono Samwili kamulonjela vyono kowa mutemi.
Sawuli yakuwikwa kuwa mutemi
17Samwili yakawa kuwakongholela wanhu wose ku Mizipa. 18Yakawa kuwalonjela yakutya, “Muwaha Mulungu, u Mulungu we Waisilayeli yakutya nhavi, ‘Ane namuwusenyi ku Misili, kanyhi nghamuponyenyi kuli Wamisili, na kuli wanhu wanji wose wono wali kumwiwonelenyi. 19Ane yo nene Mulungu wenyu, mono namuponyenyi mu wulawa mu magayo, hamonga no wugazwe wenyu wose. Ninga zuwali, anye mweza kunema 'ne. Sunga nalu, mukolomba nimupelenyi mutemi. Ale du viswanu. Ninga luno, mwikongholelaje wose hali Muwaha Mulungu mwime wanhu na mulango wawo na mu zimhuga zawo.’ ”
20Ale baho Samwili yakawa kwanza kuwasejeleza mulango na mulango, monga monga. Nayo Muwaha Mulungu yakawahagula wo mulango wa Benyamini. 21Samwili yakawasejeleza wo mulango wa Benyamini mhuga kwa mhuga, ne mhuga ya Matili yikahagulwa. Hanyuma yakawasejeleza wanhu we cilume wa mu mhuga ya Matili, na Sawuli u mwana wa Kishi, yakahagulwa. Nawo wali weza kumulondola hamba si wakumuwona, 22hodu wakawa kumuwuza Muwaha Mulungu wakutya, “Wule, yuyu mono yahaguywe yali hayi lo?”
Nayo Muwaha Mulungu yakapitula yakatya, “Sawuli mono mukumulondola, ayulya ahalya, yehundice ha mitegulo.”
23Hobaho wakawa kumangha, wakawa kubita kumusola Sawuli, wakawa kumuleta hali wanhu. Nayo yakejela mutali muno yacizize wose. 24Nayo Samwili yakawalonjela wanhu yakutya, “Ale, ayuno yo munhu mono Muwaha Mulungu yamuhaguye! Na muli'se wose, hasina hamba monga mono yamwihwanile yuyu.” Nawo wanhu wose wakazozeza hamonga wakatya, “Mutemi yawumipe vilo vinji.”
25Ale, Samwili yakawa kuwaloloseza wanhu vyono yiwanojeye wamutendele mutemi wawo, hamonga na ze milimo yono mutemi kowa kwituma. Hanyuma yakawa kuzandika zose mu citabu, yakawa kuciwika i hanhu hono helile. Hanyuma ya zizo, Samwili yakawa kuwakombola wanhu wawuye ku zikaya zawo, wakawa kwiyagala. 26Nayo Sawuli, yakawa kuwuya ku kaya ku Gibeya. I wanhu wanji we vilungo, wono Muwaha Mulungu yali yazipamiza zinhumbula zawo, wakabitana hamonga na Sawuli. 27Ninga wanhu wanji we cakacaka, wakatya, “Alu mwene yuyu mbeka kociponya?” Holeka wene wawo wakamubedegala, hamba si wamuletela cipegwa co cose. Ninga mwene Sawuli yakenoza nha yali ciziwi.
Currently Selected:
1 Samwili 10: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
