1 Samwili 1
1
Elikana hamonga ne Mhuga yakwe ku Shilo
1Kwali na munhu, yacemwaga Elikana, mulawa mu mhuga ya Efulayimu, munhu, yuyu yekalaga mu citumbi ca Lama, mu yisi ye matunda ya Efulayimu. Elikana yali mwana wa Yelohamu, kanyhi yakawa mwizukulu wa Elihu, yali we mhuga ya Tohu, na ku lubavu lunji, yakawa we mhuga ya Zufu. 2Elikana yakawa na wagolece wejete, Hana na Penina. Penina yakawa yena wana, ninga Hana yakawa yasina mwana hamba monga. 3Elikana yalawaga ku Lama yakubita ku Shilo kamonga kwa mwaka, ho yakahembe, no kumulavizya Muwaha Mulungu Mudaha vyose, makumbiko kuko ku Shilo. Ne wana wejete wa Eli, Hofuni na Finehasi, i wakohani wo Muwaha Mulungu wo wali wali kuko. 4Na mu vilo vyose lono Elikana yalavyaga makumbiko gakwe, yamugawilaga na Penina ligawo lyakwe lye nyama, hamonga ne magawo ge wanagwe wose. 5Hamba yawe yali yamwendile Hana muno muno, ninga yamupelaga ligawo limonga du, vyono Muwaha Mulungu si yali yamupelile wana yaye. 6Nayo Penina yamusagalaga muno muno Hana, ho yamukalaze, vyono Muwaha Mulungu yali si yamupelile wana. 7Ne zinghani zizo, kuli Penina, zikajendelela du mwaka na mwaka. Na mu vilo vyose, kolo wabita ku Nyumba yo Muwaha Mulungu, Penina yamusagalaga Hana no kumukalaza muno, sunga nhondo, Hana kawa kulila mahozi, kawa kwizila no kulya. 8Nayo mulume wakwe Elikana ya kawa kumuwuza yakutya, “Hana, alu wukulilila cici? Alu nhawule wezila no kulya? Kanyhi nhawule nhondo zose, nghuwonaga wina wukalale? Wule, ane si nili muswanu kuli'gwe si nha wana we cilume yikumi?”
Hana na Eli mukohani
9Na mwizuwa linji, lono wali wakondya kulya zindigwa mu Nyumba yo Muwaha Mulungu kuko ku Shilo, hodu, Hana yakawa kwinuka, 10akuno yali mu wusungu wuwaha muno muno, yakalila muno lono yalombaga kuli Muwaha Mulungu. Akuno nayo Eli mukohani yekaye ha wikalo wakwe du ha mulango. 11Nayo Hana yakehuwiza ko wilahize yakatya, “Gwe go Muwaha Mulungu we mihanga, wunangaje ane no mwitumami wako! Wulanje zo wugaye wangu, wunghumbucile! Wulecele lukulu kusemwa! Nane nghwihuwiza nha vyono, hono wumhele mwana we cilume, nane nomulavya kuli'gwe, yawe wako mu mikalile yakwe yose, na kanyhi, hamba si kocetela lukulu zimvili zakwe.”
12Nayo Hana yakajendelela kumulomba Muwaha Mulungu du kwa cidaha citali. Nayo Eli mukohani, yakawuwona mulomo wa Hana vyono wukuvina. 13Hambi Hana nha yalombaga si yakulavya lizi yaye, langa mulomo wakwe wo wavinaga du. Holeka Eli mukohani yali yeza kuziwona zizo, yakehwesa vyono Hana yali yagalile divayi, 14holeka Eli yakamutya Hana, “Alu Hana, ho kogala sunga nili lu? Ale, wulecele lukulu divayi yako, kanyhi weze wuli mwiyimizi!” 15Nayo Hana yakamupitula yakatya, “Ng'o, ye, 'gwe mukohani ane, si ngalile yaye, hamba nghali si nang'wa divayi yaye! Langa nhumbula yangu yimemile wukalale. Nane nali nili muwulombe, nghumuwicila Muwaha Mulungu wugaye wangu. 16Holeka wulece kwihwesa nha vyono ane nili mucekulu we caka caka, aa, ng'o. Langa ane nghulomba nhavivi, vyono nhumbula yangu yili mu wukalale wuwaha muno muno.” 17Nayo Eli mukohani, yakamutya Hana, “Ale wubite wupolile, nayo Mulungu wa Isilayeli yakupele cico cono wumulombile.” 18Nayo Hana yakamutya Eli mukohani, “Ale, nane no mwitumami wako nghukulomba, nhondo zose neze nina wendezwe hali gwe.” Hana yali yeza kukondya kuzilonga zizo, hodu yakawa kutuluka, yakawa kubita kulya ndigwa. Na ku wulawa baho, si yatuga wukalale kanyhi.
U wulelwe wa Samwili, hamonga no wusiwanulwe wakwe
19I mitondo yaco, Elikana hamonga na we mhuga yakwe, wakelawa kwinuka hakali mitondo muno. Nawo wali weza kukondya kumuhemba Muwaha Mulungu, hodu wakawa, kuwuya kwawo ku Lama. Nayo Elikana yakamumanya Hana mugolece wakwe. Nayo Muwaha Mulungu yakawupitula wulombe wakwe. 20Hana yakatuga 'nda, yakalela mwana wa cilume. Yakamucemela litagwa lya Samwili, nhunizo yayo, “Nimulombile kuli Muwaha Mulungu.” 21Lizuwa likawa lyafika lyo wubita ku Shilo, Elikana hamonga na we mhuga yakwe, ho wakamulavizye Muwaha Mulungu likumbiko lye myaka yose, lyono yali yehuwiza. 22Ninga mu cipango cico, Hana si yasuma kubita, yakamulonjela mulume wakwe yakutya, “U mwana kolo yakondya kuleswa ane nomutegula ku Nyumba yo Muwaha Mulungu yekale kuko mu mikalile yakwe yose.” 23Nayo Elikana yakamupitula Hana yakatya, “Ale, witume gwegwe nha vyono wukuwona viswanu. Wikalaje hono kaya, sunga kolo wakondya kumulesa. Nayo Muwaha Mulungu yafisilize wihuwizo wakwe.” Holeka Hana yakawa kwikala ha kaya, yakamosa mwana sunga yakawa kumulesa.
24Nayo yali yeza kumulesa mwana, hodu, yakawa kumutegula ku Shilo, yakasoleleza hamonga na nzeku monga ya myaka midatu, na kilo yikumi za wusaje, hamonga no mufuko wa nyhingo wumemile divayi. Yakawa kumusola Samwili yakali mudodo du, yakawa kumutegula ku Shilo, ku Nyumba yo Muwaha Mulungu. 25Nawo wali weza kukondya kuyiwulaga nzeku yiyo, wakamusola mwana Samwili, wakamutegula kuli Eli mukohani. 26Nayo Hana yakamulonjela Eli mukohani yakutya, “Gwe muwaha wangu, ane nghukulomba wunenele. Mwene wunghumbuciye? Ane yo nene mucekulu yulya, mono wambona nimile bahano, nghulomba kuli Muwaha Mulungu. 27Namulomba yamhele mwana ayu, nayo yakahulika wulombe wangu, yakawa kumhela cono namulomba. 28Holeka nane 'lu nghumulavizya Muwaha Mulungu mwana yuyu. Nayo mwana yuyu kowa sawo yo Muwaha Mulungu du, mu vilo vyakwe vyose vyo wikale wakwe.” Wakamuhemba Muwaha Mulungu baho.
Currently Selected:
1 Samwili 1: LLKWW
Highlight
Copy
Compare
Share
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.
