Waefeso 3
3
U mulimo wa Pawulo kuli makungugo ganji
1Ku soko yiyo holeka ane no Pawulo no muwopwa wa Kilisito Yesu ku soko ya nyenye mo we makungugo, nghumulomba u Mulungu. 2Nitumbiye mwakondya kuhulika vyono u Mulungu, so lihewa lyakwe, yamhela u mulimo wuwu, niwitume so cambuzi cenyu. 3Ane namanyizwa zizi mu nzila yo wugubulilwe wo wuhile wakwe wono wali wuhundicigwe. Nizandice kwa cifupi, izinghani zizi, 4nanye kolo mukuzisoma izinghani zangu, mosuma kuwutanga u wumanye wangu wa muli zono zihundicigwe za muli Kilisito. 5Zono katali wanhu si wamanyizwa, ninga alu u Mulungu yakondya kuwamanyiza iwatumwa, ne wawizi wakwe wono welile ntu nzila yo Muhe. 6Ne nghani yiyo yono yihundicigwe nha yoyi, vyono mu nzila yo Luganuzi Luswanu, iwanhu we makungugo ganji mo wakutujila ilifungu lyawo hamonga ne Wayahudi muli zo wulugutwe wo Mulungu, wene nawo nha wali vilunzwa vyo muwili wuwulya, kanyhi wahanji wo wihuwizo wuwulya wono u Mulungu yawunoza mu nzila ya Kilisito Yesu.
7Ane nanozwa ho niwe mwitumami wo Luganuzi Luswanu ha nghango ye cipegwa ce lihewa lilya lyo Mulungu lyono napegwa ha nghango yo witume we vilungo vyakwe. 8Ane nili mudodo si nhe wanhu wo Mulungu wose, ninga napegwa ilihewa lyakwe, ho niwaganulile iwanhu we makungugo u wugoli wa Kilisito wono wusina cipimo, 9kanyhi ho niwalajile iwanhu wose wawone vyono wukufisilizwa u wuhile wo Mulungu wono wali wuhundicigwe. U Mulungu mono yaviwumba vinhu vyose, yayihundika inghani yakwe yiyo kulawa katali, 10ho alu i wawaha ne vilungo vya ku wulanga vimanyizizwe mu nzila ye Likanisa, ho wasume kugamanya i mahala go Mulungu gono gena mihilimo minji. 11U Mulungu yayituma inghani yiyo nha vyono wali winha u wutemye wakwe we cibitilila, wono yawunozeza muli Kilisito u Muwaha wetu. 12Holeka mu wilunza na Kilisito, na mu nzila yo wihuwilo muli Kilisito, ase cikwijelela kumusejelela u Mulungu cisina woga. 13Holeka nghumunenenyi mulece kuyitukuwika i mitima yenyu kusoko ye magayo gono nghugatuga ku soko yenyu, hambi gago nha gali ku soko yo lukumyo lwenyu.
U wendo wa Kilisito
14Ku soko yiyo holeka nghumufugamila u Sogo yo Munhu, 15mono wo mwamulizo wa vyose vyono vili mononze na vya ku wulanga. 16Nghumulomba u Mulungu, mu nghango yo wugoli wo lukumyo lwakwe, yamupelenyi u wusume wo Muhe wakwe, i vilungo vyo kuwa musikame mu wunhu wa mugati, 17nayo Kilisito yekalaje mu zinhumbula zenyu ko wihuwilo. Nghumulomba muwe mukamile mu musinji wo wendo, 18ho musume kumanya hamonga ne wanhu wo Mulungu wose, nha vyono winha u wendo wa Kilisito, vyono wutandalaga mu wugazi no wutali, no wima na hasi yayo. 19Kanyhi muwumanye no wendo wa Kilisito, wono wucizize wumanye wose, ho mumemywe u wukwilanicile wose wo Mulungu.
20Ale kuli yuyo mono kwe vilungo vyakwe vyono vikwituma mugati yetu, yasumile kwituma zimbaha zono zicizize kuli zono cidahile kulomba hamba kwihwesa, 21kuli yuyo lweze lukumyo mu Kanisa na muli Kilisito Yesu, mu mapango gose sunga ku myaka ne cibitilila. Heya.
Currently Selected:
Waefeso 3: GOG91
Highlight
Copy
Compare
Share
Want to have your highlights saved across all your devices? Sign up or sign in
Cigogo New Testament © Bible Society of Tanzania, 1991.
