Metumo ge Watumwa 14
14
Pawulo na Balanaba mu Ikoniyo
1Kuko ku Ikoniyo, zinghani zikawa nha vyono zali ku Antiyokiya. Wa Pawulo na Balanaba wakenjila mu nhangʼanilo yo wuhembelo ye Wayahudi, wakalonga wapetuce, sunga Wayahudi wenji ne Wayunani, wakehuwila. 2Ninga Wayahudi wanji wono si wasaka kwihuwila, wakawasagahaza wanhu we makungugo ganji no kuwalajila nhumbula yo lusulo ho wawabeze we zindugu. 3Holeka wa Pawulo na Balanaba wakajendelela kwikala kuko vilo vilo. Wakulonga wasina woga muli Muwaha, nayo Muwaha yakayikamya i mbeka ye lihewa lyakwe yono wayiganulaga, ko kuwapela vilungo vyo kunozeza mapoto ne mezino.
4Ninga wanhu wa mwikaya lilyo, wakegawa hejete, wanji wakawa ku lubavu lwe Wayahudi, na wanji wakawa ku lubavu lwe watumwa. 5Hanyuma yayo, iwanhu wanji we makungugo ganji ne Wayahudi, wakelunza hamonga ne wawaha wawo, ho wawatendele vibi wawo iwatumwa, no kuwatowanga ne mabwe. 6Ninga iwatumwa waza kuyimanya nghani yiyi, wakatiziza ku Lusitela na Delibe, i matumbi ga Likawoniya, na mu mhelo mhelo ya baho. 7Na kuko wakajendelela kuluganula u Luganuzi Luswanu.
Pawulo na Balanaba ku Lusitela na Delibe
8Kwali na munhu yunji kuko ku Lusitela, mono yali yali citewe kulawa vyono yalelwa, nayo yali yakali si yanajenda hamba hadodo. 9U munhu yuyo, yamuhulicizaga Pawulo lono yaganulaga. Nayo Pawulo yakamulanga muno, na yaza kumuwona vyono yena wihuwilo wo kusuma kuponywa, 10yakalonga neʼzi iwaha, yakutya, “Winuce wime wima.” Nayo yuyo mono yali yali citewe, yakenuka musunho, yakanza kujenda. 11Imapuga ge wanhu gaza kuwona yono Pawulo yayinozize, wakanza kuzoza, wakulonga mu nonga ye Cilukawoniya, wakutya, “Imilungu yicitimila yihwanile wanhu.” 12Balanaba wakamucema Zewusi, na Pawulo, vyono mwene yali yo mulonji muno, wakamucema Heleme. 13Nayo mukohani mono yamwitumamilaga yuyo mulungu Zewusi, mono nyumba yakwe yo wuhembelo vyali vidomile ne likaya, yakaleta ngʼombe no wihambo wa maluwa, sunga ho ha mulango muwaha we likaya, nayo yasakaga vihanje ne wanhu wawalya, wawalavizye ikumbiko iwatumwa.
14Wa Pawulo na Balanaba waza kuzihulika zizo, wakademulanga myenda yawo, wakenjila hagati ye lipuga lye wanhu, wakazoza wakutya, 15“Nhawulenyi mukwituma zizi? Nase nha cili wanhu du kotya nyenye. Nase cili baha ho cimuganulilenyi Luganuzi Luswanu, ho muzilece zizi zo wulele, mumupitucile Mulungu mumi mono yawumba wulanga ne yinze, lilenga na vyose vyono vili mugati. 16I katali u Mulungu yagakombola i makungugo gose getume nha vyono gendile. 17Hamba nha vivyo, u Mulungu si yaleka kwilajila, so metumo maswanu gono yakumunozezenyi, yakumupelenyi mvula ya ku wulanga, kanyhi ya kumupelenyi ne vipango vye matika, yakumupelenyi zi ndigwa, no kuzigutya zinhumbula zenyu na nyemo.” 18Hamba wawe walonga zizo, ninga wakawona kukamu kuwemila mapuga, ho galece kuwalavizya likumbiko.
19Ninga Wayahudi wanji, wakaza wakulawa ku Antiyokiya na Ikoniyo wakawakwega wanhu ho welunze nawo, wakamutowanga Pawulo ne mabwe, wakamukulunhya sunga ko kunze ye likaya, wakawa kwihwesa vyono yakondya kufwa. 20Ninga wejizwa wakekonghola, wakamupilima, nayo yakenuka yakenjila mwikaya. Imitondo yaco yakatuluka, mwene na Balanaba, wakabita ku Delibe.
Wa Pawulo na Balanaba, wakuwuya kwikaya lya Antiyokiya ya ku Siliya
21Waza kuwaganulila Luganuzi Luswanu wa mwikaya lilyo lya Delibe, no kutuga wejizwa wenji, wakawuya ku Antiyokiya, ninga wakakolela ku Lusitela na Ikoniyo. 22Wakawasinyhimika zinhumbula i wejizwa, no kuwasikamya wekalaje mu wihuwilo. Wakawalonjela wakutya, “Yicinojeye ase wose kukolela mu magayo menji, mu winjile mu wutemi wo Mulungu.” 23Wakawahagula wanyamhala kulawa mu makanisa gose, ho walidime i Likanisa. Nawo waza kuwa walomba no kuleka kulya, wakawawika kuli Muwaha mono wamwihuwila.
24Wakakola mu yisi ya Pisidiya, wakafika ku Pamufuliya. 25Waza kukondya kuganula nghani mu Peliga, wakabita ku Ataliya, 26na kuwulawa kuko, wakajendela mu ngalawa, wakawuya ku Antiyokiya, ihanhu bahalya hono walombelwa ha mwamulizo, no kuwikwa mu wukamiswe wa mwihewa lyo Mulungu, so mulimo wono wali wakondya kuwufisiliza.
27Waza kufika kuko ku Antiyokiya, wakacema mukungʼano wa Kanisa ya baho. Wakawasimuliziza zose zono Mulungu yetumile hamonga nawo, kanyhi vyono Mulungu yawadiguliye mulango, iwanhu we makungugo ganji, ho wenjile mu wihuwilo. 28Wakekalana hamonga na wawalya iwejizwa vilo vikatela.
Currently Selected:
Metumo ge Watumwa 14: GOG91
Highlight
Share
Compare
Copy
Want to have your highlights saved across all your devices? Sign up or sign in
Cigogo New Testament © Bible Society of Tanzania, 1991.
