2 Wakolinto 6
6
1Holeka nase vyono cikwituma mulimo hamonga no Mulungu, cikumunenenyi mulece kuvumila i lihewa lyo Mulungu lyono mwabocela, lyajilile bwete. 2Hambi u Mulungu nha yakutya nhavi; “Mwidaha lyono lyali linojeye, lo nakuhulicila. Mwizuwa lyono lyali linojeye wuponywe, baho ho nakutaziza.” Lanje, aluno ho hanojeye muno muno, kanyhi izuwalili lyo lizuwa lye mhonelo! 3Na kanyhi vyono si cikusaka ciwe ne lilema lyo lyose mu witumami wetu, holeka si cendile kumuwicila munhu wo wose cikobazo co cose. 4Langa cikuhila kwitajila nha vyono ase mbeka cili wetumami wo Mulungu muli zose, ko wukangalizi wuwaha mwipango lyo wutamiswe, mu magayo na mu wuciwa. 5Cikatowangwa, cikatajilwa mu jela, no kuhowelezwa cagalanze, cetuma mulimo kuciza sunga cikakatala, cikagona meso hamba kulya. 6Cikwilajila nha vyono cili wetumami wo Mulungu mu nzila yo wele wa mu nhumbula, mu wumanye, mu wukangalile, mu wunhu wuswanu, ko Muhe Mono Yelile, na ko wendo we mbeka wono wusina hamba wukonji, 7mu nghani ye mbeka, na kwe vilungo vyo Mulungu. No wilingʼano, co citwalo cetu co kwitaziza ku lubavu lo kulume no lubavu lo kucekulu. 8Nhondo zose ciwikanize kutuga lukumyo, kupegwa lilumbo no kubedegalwa, kuhoswa no kupegwa lilumbo. Cikwijela nha cili walambi, kumbe ase ho cikulonga mbeka, 9cikwijela nha wanhu wono si wamanyice, kumbe ho cimanyice kuli wanhu wose, cikwijela nhe wanhu wono wafwiye, kumbe nha vyono mukuwona, ase ho cili womi du. 10Hamba ciwe catuga wulipicizwe, ninga si cikawulagwa yaye, hamba ciwe cina wuzinguce, ninga cikusangalala nhondo zose, hamba ciwe ciciwape muno muno, ninga cikuwagolifya wanhu wenji, cijelaga nha cili wanhu mono cisina cinji co cose, ninga kumbe ho cina navyo i vinhu vyose.
11Nye Wakolinto nyo wandugu zetu wendece, calongana nanye calinze, ne zinhumbula zetu zili mwazi muno muno. 12Na hono muwe mukuwona ko cili cikobazo co cose cilya, i cikobazo cico cili muli nyenye nyo weneco, ninga si cili kulubavu lwetu yaye. 13Alu nghulongana nanye nha wanangu, nghutya, ale mudigule zinhumbula zenyu, nha vyono ase cikanoza.
U wusugulwe kuli wuhangahanje ne wanhu wono si wamumanyile Mulungu
14Mulece kwihwana ne wanhu wono si wehuwiye. Alu mbi u wuswanu no wavu, vyosuma kwilumvya? Hamba u Wuzelu no wutitu, vyosuma kuwezana hamonga? 15Alo Kilisito kosuma nhawule kwilumvya na Setani? Hamba mono yehuwiye, ho kosuma kulagana nhawule na mono si yehuwiye? 16Hamba howuli wulaganeci we Nyumba yo Mulungu ne vihwani vyo wulambi? Hambi ase nha cili wuhembelo wo Mulungu mumi. Nha vyono Mulungu mweneco yalonga yakatya,
“Nowunoza u wikalo wangu wuwe muli wene,
na muli wene mo nowa jendela,
Nane nowa Mulungu wawo,
Nawo wowa wanhu wangu.”
17Holeka u Muwaha kanyhi yakutya,
“Ale muwuce muli wene, mweze musiwanuce
mulece kupamiziza lukulu cinhu cavu
nane ho nomubocelenyi.
18Ane nowa Sogo yenyu,
nanye mowa wanangu,
we cilume na we cicekulu
U Muwaha Mono yali Vilungo,
vyo yakutya.”
Currently Selected:
2 Wakolinto 6: GOG91
Highlight
Copy
Compare
Share
Want to have your highlights saved across all your devices? Sign up or sign in
Cigogo New Testament © Bible Society of Tanzania, 1991.
