2 Wakolinto 10
10
Pawulo yakwitetela ku soko yo mulimo wakwe
1Ane yo nene no mweneco Pawulo, mono nghwijela nili mupolo lono nili hamonga nanye, ninga ho nili mukali lono nili kutali nanye, nghumunenenyi ko lusungu no wuswanu wa Kilisito. 2Nghumunenenyi mulece kusagahiza ho niwe nili mukali kolo neza kuza, hambi nha manyiye lukulu vyono nowakalipila wose wono wakwihwesa vyono ase cikaye mu mikalile ye ciyinze yinze. 3Heya mbeka cikaye mononze, ninga si cikwihoma ciyinze yinze. 4Hambi i vitwalo vyono cikwitumamila mu wihomi wetu, nha si vitwalo vye ciyinze yinze, langa vyo vilungo vyo Mulungu vyono vigwisaga magomawakali gose. Nase cikusuma kuwugwiza u wusugusugu wose wo wulambi, 5no kuvikumulanga vimizi vyose vyo wiwoni vyono vikwimila u wumanyo Mulungu, cikugakwega i mahweso gose no kuganoza gamuhulice Kilisito. 6Mulawa mweza kuwa mwakwilanicila mu cihuliko, ale ase ciwikanizize lukulu kuwulipiciza u wula cihuliko wose.
7Anye waco mulangaga za kunze du. Wulenyi, ho yuli munhu wo wose mono yakwihwesa vyono mwene yo wa Kilisito? Ale viswanu! Ninga yehwesaje nha vivilya nha vyono nase cili wakwe Kilisito nha vyono mwene yuyo wa Kilisito.
8Hamba niwe nghwijela nha naciziliza muno u wilumbi wangu so wulajilize wono u Mulungu yacipela, u wulajilize wo kumusikamyenyi nyenye, hamba si so kumugwisenyi yaye. 9Si nyendile mwihwese nha vyono nghusaka kumogofyenyi so baluwa zangu. 10Yunji yadahile kutya, “Baluwa za Pawulo nzito, kanyhi zina nghani zono zili vilungo, ninga mwene lono yalihamonga nase, yo munhu musocele, sunga lono yakuduwa du, koziwona i zinghani zakwe kotya si cinji ngʼo.” 11No munhu mono yakulonga nha vivyo, ciba yakumbucile vyono hasina wisimajile na zono candikaga mu zibaluwa zetu lono cili kunji, na zono cokwituma lono cowa cili baho hamonga nanye.
12Hamba nha vivyo, si cali cisume kwijelela kwiwika hamba kwiyihwananiza na awalya wanhu wono wakwiyikumya weneco. I wanhu wono wakwiyinoza weneco kuwa nha cipimo co kwiyipimila weneco, kanyhi wakwiyilingʼaniza weneco wose, wawo wasina wizuce. 13Ninga ase si cosuma kwiyilumba kuciza ha nghango langa u wilumbe ifuwo wowa wuli mu nghango yo mulimo wono u Mulungu yacipela, u mulimo wono cikuwituma sunga na kuko kwenyu. 14Alu nanye vyono muli mu nghango yiyo, nase si casuma kuciza nghango yiyo lono cazizo kwenyu, kumuletelenyi u Luganuzi Luswanu lwa Kilisito. 15Holeka nase si cikwilumbila mulimo wono wanji wetuma, si nhe nghango yono capegwa, langa citumbiye vyono u wihuwilo wenyu wocila kuwiluka, nase ho cituje mulimo muwaha muno muli nyenye mu nghango yiyilya du yono yaciwicilo Mulungu. 16Baho lu, ho cosuma kuluganula u Luganuzi Luswanu na mu zisi zinji zono zili kutali na kono kwenyu, na yowa si nghani yo kwilumbila mulimo wono wetuma wanhu wanji kunhu kunji. 17Nha vyono i Mandiko gakulonga gakutya, “U munhu wo wose mono yakusaka kwilumba, yimunojeye yelumbile muli yono yetumo Muwaha.” 18Nayo mono yakuvumilwa, si yulya mono yakwiyikumya mweneco ngʼo, langa yo yulya muno Muwaha yakumukumya.
Currently Selected:
2 Wakolinto 10: GOG91
Highlight
Copy
Compare
Share
Want to have your highlights saved across all your devices? Sign up or sign in
Cigogo New Testament © Bible Society of Tanzania, 1991.
