VAROMA 7

Mfwanano wa mabanu

1Vandughu temumanyije, -ambu niteta na vala vemanyije viziomo,- iti kiziomo kimtetia mntu hala ereho? 2Ambu mche na mghosiwe emchungiwe ni kiziomo he mghosiwe ereho; mira mghosiwe ekifwa achunguiwa kila kiziomo he mghosiwe. 3Igheri mghosiwe ereho kakicha ekiketa mme ungi, eitangwa mrashinda. Mira mghosiwe ekifwa achunguiwa, techungwa ni icho kiziomo; iki si mrashinda kangi hata ekighuhwa ni mme ungi. 4Huvo vandughu vangu, hata unywi mwefwiie myomongwa, he vuntu vwa mwiri wakwe Kristo, nesa muidime kuoka mari ya ungi, ula evukie he vefwie, nesa tumgerire Mrungu ntunda. 5Ambu aho twecheri he mwiri, tama ja mabanu, jila jekiwaho vuntu vwa myomongwa, jerongie ndima he marungo etu, mhaka tukamoghia kifwa ntunda. 6Mira iki twachunguwa he myomongwa, twafwiia kila kiikarire chekitukinda, nesa uswi tuidime kuronga ndima he kiikarire kishaa cha kimpeho, si he kiikarire cha maandiko.

Myomongwa na mabanu

7Ingeri tuti ze? Myomongwa ni mabanu? Icho hai! mira sekimanya mabanu esire vuntu vwa kiziomo; ambu nesekimanya kumotoka, myomongwa yesetie: “Usimotoke.” 8Mira mabanu evonie kapengere he lila iamoro, akanietia kila mbare ya kumotoka. Ambu mabanu hesina viziomo efwie. 9Nami nekiho moo aho kuvoka hesina viziomo; mira lila iamoro lekinaze, mabanu akakalama, nami nikafwa. 10Nikavoka lila iamoro leete moo iti hangu leetie kifwa. 11Ambu ibanu lekinavone kapengere he iamoro, likaniisha, na he icho likanikoma. 12Heicho myomongwa yezerire, na lila iamoro lezerire, na la kitea, kangi ni ledi. 13H’ii, kila e chedi chaoka kifwa hemi? Icho hai! mira, nesa mabanu amanyike iti ni mabanu kididi, eetie kifwa hemi vuntu vwa kila chedi, nesa he lila iamoro, mabanu azikeoka mavivisha.

Vimoghwa viri vya kimuntu

14Ambu twemanyije iti myomongwa kifumo chayo ni cha kimpeho, mira mi ni wa kimwiri, netaghiwe he mabanu. 15Ambu simanyije cho neronga; ni hala kila nekikundie sikironga; mira kila nekiviihiwa nicho nekironga. 16Mira kakicha nironga kila nesikikundie, nizumira kila kiziomo iti ni chedi; 17iki ra, simi mwenye neronga icho, esire lila ibanu leho ndeni hemi. 18Ambu nemanyije iti ndeni hemi, nikwo kuti ndeni he mwiri wangu, teheikaa chedi; ambu kuenda nienda, mira kuronga kila e chedi siveiwa. 19Ambu kila chedi nekikundie sikironga, mira kila kivivi nesikikundie nicho nekironga. 20Heicho, kakicha kila nesikikundie nicho nekironga, simi mwenye nekironga, esire lila ibanu letue hemi. 21Huvo nivona kiziomo iki, kuti hemi neenda kuronga kila e chedi, kila kivivi nicho cheho hafuhi. 22Ambu niizihirwa ni kiziomo cha Mrungu he mntu wa uko ndeni; 23mira nivona kiziomo kingi he marungo angu, cheomanya kila kiziomo cha madunganyo angu, na kunighosha nkore ya kila kiziomo cha mabanu eho he marungo ango. 24Vwasi vwangu, mi mkiva! niani enenikania he mwiri uu wa kifwa? 25Niti navahache he Mrungu he Yesu Kristo Mfumwa wetu! Heicho, kari ni huvo, mi mwenye na kucha kwangu nirongia kiziomo cha Mrungu ndima, mira he mwiri wangu nirongia kiziomo cha mabanu ndima.

Currently Selected:

VAROMA 7: CHSUNT67

Highlight

Copy