VAROMA 5

Ntunda ja mwitikijo

1Iki twekinakenje kutarirwa kitea chefuma he mwitikijo, natukete mporere na Mrungu he vuntu vwa Mfumwa wetu Yesu Kristo. 2Eye heye twevonie he nzia ya mwitikijo kufikia mbonea ii eyo tweimuke heyo; na kuizihirwa he ikuji la ngazo ya Mrungu. 3Neri si icho du, mira natuizihirwe hata he mavwasi; twekimanya iti vwasi ndima yavwo ni kuete kugumirija; 4na ndima ya kugumirija ni kudinda; na ndima ya kudinda ni ikuji; 5na ikuji telisonisha; ambu lukundo lwa Mrungu lwakenja kukufutwa na he ngoro jetu ni Mpeho Wedi uswi tweinkiwe.

Lukundo lwa Mrungu luvonekia he kifwa cha Kristo

6Ambu aho twevasoka igheri lekinafike, Kristo efwie vuntu vwa vavivi. 7Ambu ni kizinya mntu ekifwa vuntu vwa mkitea, mira usiche kiidimika mntu kufwa vuntu vwa mntu wedi. 8Mira Mrungu evonyesha lukundo lwakwe ye mwenye he uswi, ambu Kristo efwie vuntu vwetu, aho twecheri vabanu. 9Mira chekelile mno twekinakenje kuinkwa kitea vuntu vwa sakame yakwe, tunekijwa he oro kwa mburi yakwe. 10Ambu kakicha aho twecheri vanzo, tukakundanywa na Mrungu he kifwa cha Mwana wakwe; twekinakundanywe tunezikakijwa he nkalamo yakwe. 11Neri si icho du, mira tuzihirwa he Mrungu he Mrungu vuntu vwa Mfumwa wetu Yesu Kristo, eye heye iki tweghuhie icho kikundanyo.

Kifwa kifuma he Adamu, nkalamo ifuma he Kristo

12Heicho, sa vuntu mabanu eingie he si ii vuntu vwa mntu mmwe, na he ibanu ilo, kifwa; huvo kifwa kikavafikia vantu vose ambu vose vebanie; 13ambu viziomo vyesinaza mabanu ekireho he ii si, mira mabanu teetarwa hesina viziomo. 14Mira kifwa kikatetia hata vala vesebanie ibanu lefwanane na ibanu lakwe Adamu, e fwanyanyi ya ula eneza. 15Mira kila kiinkwa tekiikee sa lila iteshanyo; ambu ukinakiche he kubana kwa ula mmwe vajinki vefwie, ni kuvecha mno mbonea ya Mrungu, na kiinkwa cheho he mbonea ya mntu mmwe Yesu Kristo, kinezika vuntu vwa vala vajinki. 16Neri kiringanyo cha ula mntu mmwe ebanie, tekiringane na kila kiinkwa cha mbonea, ambu mlaho wezie vuntu vwa mntu mwe, ukaete ibigho; mira kiinkwa cha mbonea chezie vuntu vwa mabanu mangi, kikaete kutarirwa kitea. 17Ambu ukinakiche he kubana kwa mntu mmwe, kifwa kikatetia vuntu vwa ula mmwe, vala veghuha mbonea nyingi na kila kiinkwa cha kitea vekelile haiwa, venetetia he nkalamo vuntu vwa ula mmwe, Yesu Kristo. 18Iki ra, he mburi ya ibanu imwe vantu vose vechwiiwe ibigho, nirehuvo, he kirongire kimwe cha kitea, vantu vose venetarirwa kitea chena nkalamo. 19Ambu kakicha he kubera kwa mntu mmwe, vantu vajinki veingijwe he miikarire ya vabanu, nirevwo he kusikia kwa mmwe, vantu vajinki vaingijwa he miikarire ya vakitea. 20Mira viziomo vyeingie nesa lila ibanu lizike oka ibaha, na mabanu ekinanete, mbonea ikaongejika kukela; 21nesa sa vuntu mabanu eketie nzinya he kifwa, nirehuvo he vuntu vwa kitea mbonea itetie mhaka nkalamo ya kae na kae he Yesu Kristo Mfumwa wetu.

Currently Selected:

VAROMA 5: CHSUNT67

Highlight

Copy