VAROMA 3

Mavwijo egharushwa

1Iki Myuda ekelile heni? Na kutavanwa kuve heni? 2Kuve mno he kila nzia. Cha kuvoka kuti nivo vesigirirwe maazero a Mrungu. 3Iki ni kize, kakicha kumwe hevo teveitikije? H’ii, kusaitikija kwavo kunevusha kitengo cha Mrungu? 4Icho hai! Mrungu naoke mkitengo, na kila mntu ni mmongo; sa vuntu cheandikwe:

“Nesa umanyike iti una kitea he viteto vyako,

Uvote wekiingia he milaho.” 5Mira tuti ze, kakicha vuvivi vwetu vukonesha kitea cha Mrungu? H’ii! Mrungu ni mtungulu ekisikia oro? (Niteta kimntu) 6Icho hai! ambu kakicha ni huvo Mrungu eidima ze kulaha ii si? 7Mira kakicha kweri ya Mrungu yazikafunukura shima yakwe vuntu vwa mongo wangu, hanini necheri lahwa iti ni m’banu? 8Hanini twesiti: sa vuntu twechungijwa, na sa vuntu vangi vezikateta iti tuteta huvo; Natuhire vivivi nesa vyedi vize? evo kulahwa kwavo kwena singisirya.

Kuteshanya kwa mntu he si ii yose

9Nikini ra, tu vedi kuvecha vangi? Hai, neri hadori! Ambu twakenja kuvasitaka Vayuda na Vagriki iti hata vo vetetiwa ni mabanu 10sa vuntu cheandikwe, iti:

“Tehena mkitea neri mmwe.

11Tehena etwarije;

Tehena emwenda Mrungu.

12Vose vetekie, vevoie vose chwe;

Tehena eronga chedi, hai! neri mmwe.

13Mirangi yavo ni mbira yeho mwaji,

Veghosha maluhi avo a kukengerira.

Vusungu vwa bili vuho he miomo yavo.

14Miomo yavo yeizue viraro na kusulumira.

15Maghu avo esara kuita sakame.

16Kukondika na kuganganya viho he nzia javo.

17Neri tevemanyije nzia ya mporere.

18He meso avo tehena kumfoleka Mrungu.”

19Heicho, twemanyije iti mburi jose myomongwa yejiteta, ijiteta he vala vetetiwa ni myomongwa, nesa kila momo ujivwe, na ii si yose iikae kijusi he mlaho wa Mrungu; 20ambu tehena mntu mwenye mwiri enetarwa iti ni mkitea mozya heye, he mirongire ya viziomo; ambu kumanya mabanu kuetwe ni viziomo.

Kutaririwa kitea he mwitikijo vuntu vwakwe Kristo

21Mira iki kitea cha Mrungu chafumirira esi cha viziomo, nacho kitetiwa vuonwa ni myomongwa na varoti, 22ni kitea cha Mrungu cheho he vuntu vwa mwitikijo he Yesu Kristo, he vose vemwitikija. Ambu tehena mtekano; 23vose vebanie, na kuduikiwa ni ngazo ya Mrungu; 24vetarirwa kitea sutwa kwa mbonea yakwe he nzia ya vukomboli vweho he Kristo Yesu; 25eye Mrungu emvikie aoke kikundanyo vuntu vwa mwitikijo he sakame yakwe, nesa avonyeshe kitea chakwe, he vuntu vwa kugumirija kwa Mrungu he mabanu ose erongore kuketwa; 26nesa he marongo aa avonyeshe kitea chakwe, nesa aoke Mkitea, na kumtarira kitea ula emwitikija Yesu.

27Kukukaza kuohi? Kwafingiwa nze. Ni he kiziomo cheikee ze? Ni he kiziomo cha mihiro? Hai! Mira ni kiziomo cha mwitikijo. 28Huvo tuvona iti mntu etarirwa kitea kwa mwitikijo, si kwa mirongire ye viziomo. 29Kanao, Mrungu ni Mrungu wa Vayuda du? Sireye Mrungu hata wa Vakiisanga? Yee, nireye hata wa Vakiisanga; 30kakicha kididi ni Mrungu mmwe, enetarira kitea kwa mwitikijo uo uo vala vetavanwe hata vala vesitavanwe. 31Iki tuvusha viziomo vuntu vwa uo mwitikijo? Icho hai! mira hantu ha kuvikonda, tuzika kuvikonesha.

Currently Selected:

VAROMA 3: CHSUNT67

Highlight

Copy