VAROMA 12

Moo mshaa

1Heicho vandughu, nimusemba he mbonea ja Mrungu, inkijani miri yenyu ioke itasi lena moo, lezerire, lemwizihija Mrungu, niwo mtaso wenyu weteghane. 2Neri musiraterije kiisanga; mira mugharushwe madunganyo enyu aghoshwe mashaa, nesa muidime kumanya chaidi kikundire chedi cha Mrungu chemwizihija, chekoloke.

Nzia yeve he viinkwa vya Kimpeho

3Ambu he mbonea nevoneiwe nimvwira kila mntu wa henyu: Asidunganye vibaha kukela vuntu chemtara kudunganya; mira akete madunganyo a kiringanyo, sa vuntu Mrungu emghavie kila mntu kiringanyo cha mwitikijo. 4Ambu sa vuntu he mwiri mmwe twena marungo majinki, neri marungo ose teeronga ndima mwe, 5nirehuvo na uswi twevajinki, tu mwiri mmwe he Kristo, na marungo kila mmwe he mghenji wakwe. 6Heicho kila twena viinkwa vyetekane, he kiringanyo cha mbonea tweinkiwe; kari ni vuroti, turote kiringanyo cha mwitikijo; 7kari ni kuronga ndima ngwa, tuikae he kuronga ndima; mrecheja, he kucheja; 8mrerunga, he kurunga; mwori, aore na ngoro yeelile; mreimukia, akudoke; mrevoneia, kwa kuizihirwa.

Mitongire ya Kikristo

9Lukundo lusikete lung’ong’o; vihiwani kila e kivivi, muandakane na kila e chedi. 10He lukundo lwa kindughu, mukundane unywi venye kwa venye; he shima, mwekivarongoja vaghenji; 11he kukudindia, si veleghele; mwekikudoka he ngoro jenyu, mwekimrongia Mfumwa ndima; 12he ikuji, mwekiizihirwa; he vwasi, mwekirimia; he kuomba, zikani; 13he vila vyeendwa ni vezerire, muteishe kuora; he kughuhia vagheni, mukudindije. 14Vainkeni lutelwedi vala vemurieriesha; inkijani lutelwedi, neri musirare. 15Izihirwani hamwe na vala veizihirwa; iani hamwe na vala veia. 16Mugwie hamwe he madunganyo enyu unywi venye na venye. Musirekere vibaha, mira mukunde kubinushwa ni vila visoka. Musikuvone venye iti mwechee. 17Musimrihe mntu kivivi kwa kivivi. Ringanyani vila e vyedi mozya he vantu vose. 18Chekive, he mondo wa henyu, mukete mporere na vantu vose. 19Vakunde, musichwe sire, mira tesyani oro ya Mrungu, ambu heandikwe: “Sire ni yangu, nimi nenechwa, nivwo vuntu Mfumwa eti.” 20Mira munzo wako esikie nza, munke chala; ena nkiru, munke chanwa; ambu wekiketa huvo, umvikia nkenengo he mtwi wakwe. 21Usivotwe ni vuvivi, mira we vota vuvivi kwa vwedi.

Currently Selected:

VAROMA 12: CHSUNT67

Highlight

Copy