VAGALATIA 2

Ndima yakwe imanyika uko Yerusalemu

1Kangi, hekivecha miaka ikumi na mine nikakwea wa Yerusalemu hamwe ne Barnaba, nikamtika Tito, tukatonga naye. 2Nami nekitongie, kila nekifunukurirwe, nikavaukulila ila Mburi Yedi neibirikire he Vakiisanga, mira kwa mpiso he avo venye nguma, kisireoka iti nikudindikira sutwa, kana nekirakudindikira du. 3Mira Tito ula ekina nami, naye ne Mgiriki, tetitikijwe kutavanwa. 4Mira he mburi ya vandughu va mongo veingijwe mpiso; evo veingie kwa mpiso nesa vazighane vukomboli vwetu twena navwo he Kristo Yesu, nesa vatugere he vuzoro; 5evo neri saa mwe twesikuvikie kijusi hevo, nesa iti idi ya Mburi Yedi iikae hamwe na unywi. 6Mira vala vena nguma, kila vena shima; vuntu veikee, vyose hangu mi ni kimwe; Mrungu terereha vusho vwa mntu: niti avo venye nguma teveniongejije kintu; 7mira kushigha ivyo, vekinavone iti negurijwe Mburi Yedi ya vesitavanwe, sa vuntu Petro, ya vetavanwe; 8-ambu ula emwidimije Petro kuoka ntume he vala vetavanwe, nire ye eniidimije mi kutonga he Vakiisanga;- 9kangi vekinakenje kumanya ila mbonea neinkiwe; Yakobo ne Kefa, ne Yohane, vena nguma iti ni ngwijo, veninkie mi ne Barnaba mkono wa kume wa vumwe; iti uswi tutonge he Vakiisanga, navo vatonge he vantu va kitavani; 10esire kintu kimwe vetuendie iti, kizinya tuvakumbuke vakiva; nami icho nekudindije kukiketa.

Em’bohia Petro

11Mira Kefa ekinaze Antiokia, nekanane naye vusho kwa vusho, ambu chemvaie mlaho. 12Ambu aho hesinaza vantu vasiku vefuma hakwe Yakobo, ekila hamwe na Vakiisanga; mira avo vekinaze, akavuka na mondo, akasongera, ekivafoleka vala vetavanwe. 13Na Vayuda vangi navo vakavuka na mondo hamwe naye, ne Barnaba naye akatujwa ni lung’ong’o lwavo. 14Mira, nekinavone iti nzia yavo teirongikia he ila idi ya Mburi Yedi, nikamvwira Kefa mozya he vose: Ukinakiche we we Myuda uretera misimo ya Vakiisanga, neri esi ya Kiyuda, hanini wevatitikija Vakiisanga kuratera misimo ya Kiyuda?

Myomongwa iherwa

15Uswi twe Vayuda va kimoghwa, neri twesi vabanu va Kiisanga, 16uko twekimanya iti mntu tetarirwa kitea kwa mirongire ya viziomo, esire kwa mwitikijo he Kristo Yesu; uswi twemwitikije Kristo Yesu, nesa tutarirwe kitea kwa mwitikijo he Kristo, neri si kwa mirongire ya viziomo; ambu he mirongire ya viziomo tehena mwenye mwiri enetarirwa kitea. 17Mira kakicha uswi venye he kuenda kutarirwa kitea he Kristo, twevoneke iki tu vabanu, ikio, Kristo aoka mndima wa mabanu? Hai! 18Ambu nekijenga wa vila nevigomoe, nivonyeshe iti mi mwenye ni m’banu. 19Ambu mi he mburi ya viziomo, nefwiie viziomo, nesa nimkalamie Mrungu. 20Nevambiwe he msalaba hamwe ne Kristo; mira nikalama; neri simi wa, mira ni Kristo ekalama ndeni hemi; na ukwo kukalama nena nakwo iki he mwiri, nina nakwo he kumwitikija Mwana wa Mrungu, eye enikundie akakuinkija ye mwenye vuntu vwangu. 21Sivusha mbonea ya Mrungu; ambu, kakicha kitea kivonekia he viziomo, Kristo efwie sutwa.

Currently Selected:

VAGALATIA 2: CHSUNT67

Highlight

Copy