VAEFESO 6

1Unywi vana, vasikieni vamoghi venyu he Mfumwa, ambu icho nicho chetara. 2Vavikie vaveo na mlala wenyu shima; iamoro ili nilo iamoro la kuvoka lena kiravo: 3Uvone vwedi, uikae misi mingi he isanga. 4Na unywi vavava, musivaendereje vana venyu; mira varereni kwa shima na machundwe a Mfumwa.

5Unywi vazoro, vasikieni vala e vazima venyu he kimwiri, kwa fole na kuzingiza, na kwa ngoro yerongeke, sa mwetamsikia Kristo; 6neri si kwa vuzoro vwa meso du sa varekuizihija he vantu, mira sa vazoro vakwe Kristo, mwekironga vyemwizihira Mrungu kwa ngoro; 7kwa ngoro yedi sa kumhirira Mfumwa neri si vantu; 8manyani iti kila kintu chedi mntu eronga, nirecho enerakiinkwa ni Mfumwa, kakicha ni mzoro kana ni nkombolwa. 9Na unywi vazuri, vaketieni navo huvo huvo, mwekishigha kuvafolesha, kangi manyani iti, ye e Mfumwa wavo na wenyu eho uko wanga, neri heye tehena sombo.

Mata a Kikristo

10Cha msirikijo, zikani kudinda he Mfumwa na he vubaha vwa nzinya yakwe. 11Dokani mavuta ose a Mrungu, muidime kukinda viavya vyakwe Shetani. 12Ambu ivoo letu si la kuomana na sakame na mwiri; mira ni na vifumwa na nzinya, na vabaha va kija iki, na irivati la nkondo ya mpeho mbivi jeho he wanga ii. 13Heicho ghuhani mavuta ose a Mrungu, muidime kuomana he msi wa vuvivi, na mwekikenja kukolosha vyose, kuimuka. 14Heicho imukani, mwedokie idi he vikwidi, na kudoka he mpafu kibao cha kighera cha kitea; 15na kuchungiwa he maghu vila vyeringanywe, twevivonia he Mburi Yedi ya mporere; 16chevecha vyose ghuhani ngao ya mwitikijo, eyo heyo mweneidima kujimija mivwi yose yena moto ya ulaa mvivi. 17Kangi ghuhani chepeo ya lukio, na mhandwi wa Mpeho ewo kiteto cha Mrungu; 18he mitaso yose na maombi, mwekiomba kila igheri kwa Mpeho, mwekiyaa kyavi kwa mburi iyo, na kuzika kuombia vezerire vose; 19hata he vuntu vwangu mi, niinkwe kuteta he kuchungua momo wangu, nesa nibirikire kwa ndereko ila mpiso ya Mburi Yedi; 20eyo he vuntu vwayo mi ne mmondo he minyororo; mhaka nivone ndekero heyo, kuteta vuntu chenitara kuteta.

Msirikijo

(Kol. 4:7-8)

21Heicho, na unywi nesa mumanye mburi jangu vuntu jeikee, Tikiko, mndughu mkunde, e mndima erinda kitengo he Mfumwa, enemimanyisha mburi jose; 22eye nemtuma henyu he iyo mburi, nesa muidime kumanya mburi jetu, naye amutuje ngoro jenyu.

23Mporere na iikae he vandughu, na lukundo, hamwe na mwitikijo, vyefuma he Mrungu Vava na he Mfumwa Yesu Kristo. 24Mbonea na iikae hamwe na vose vemkunda Mfumwa wetu Yesu Kristo, he miikarire yesikondika.

Currently Selected:

VAEFESO 6: CHSUNT67

Highlight

Copy