2 VAKORINTO 8
8
Msango vuntu vwa vakiva va Yerusalemu
1Vandughu vetu, tumumanyisha mburi ya ila mbonea ya Mrungu, makanisa a Makedonia einkiwe; 2ambu aho vekigheshwa kwa mavwasi mangi, kuizihirwa kwavo kubaha, na vukiva vwavo eki vubahisha, kukavaongejija vuzuri vwa vuori vwavo. 3Ambu nivatetia vuonwa iti, kwa kuidima kwavo, na kuvecha kiringanyo cha kuidima kwavo, veinkije vintu vyose kwa kukunda kwavo venye; 4vekituomba mno na kutusemba he vuntu vwa ii mbonea na vumwe vwa ndima ii ya kuvahirira vezerire. 5Kangi veketie huvo, si sa vuntu twekiarire du, mira veronge kuinkija he Mfumwa; hata he uswi, kwa kikundire cha Mrungu. 6Nicho cheshigha twekimchunda Tito, iti sa vuntu evokie, hata henyu amukoloshije iyo mbonea. 7Mira sa vuntu mwenetiiwe ni vintu vyose: mwitikijo, mitetire, na icha, na kukudoka kwose, na lukundo lwenyu he uswi; heicho, nire huvo hata ii mbonea iremunetia.
Mfwanano wakwe Yesu
8Siteta huvwo kwa kumuazera na nzinya, esire he vuntu vwa kukudoka kwa vantu vangi nigheshe kitea cha lukundo lwenyu. 9Ambu mwemanyije mbonea ya Mfumwa wetu Yesu Kristo, vuntu eokie mkiva vuntu vwenyu, nziaho neki mzuri, nesa unywi muidime kuoka vazuri vuntu vwa vukiva vwakwe. 10Nami he ii mburi nimuinka idunganyo langu kuti: si kuhira du mira hata kuenda kuhira vila mwevivokie sa mwaka mmwezu wesiie. 11Mira iki, koloshani ila ndima nayo, nesa sa vuntu mwekikuringanye kuenda, murekuringanya huvo hata he kukolosha, kwa kiriganyo cha vila mwena navyo. 12Ambu kakicha hena kurekera, mntu ekundiwa he kiringanyo cha vila ena neri si cha vila esina. 13Ambu siteta huvo nesa vangi vavone kuizihirwa na unywi mule vwasi; 14mira vintu vyose viringane; igheri ili la iki, vukina vwenyu vughenjije vusovu vwavo, nesa na vukina vwavo vunamughenjijije ilo igheri mwekiduikiwa; nesa vintu vyose viringane. 15Sa vuntu cheandnikwe: “Ula evunganye vijinki, teneshije, neri ula evunganye vighere teduikiwe.”
Ndima yakwe Tito na vaghenji
16Mira Mrungu nakazwe, eye egera he Tito ngoro iyo iyo ya kukudoka vuntu vwenyu. 17Ambu ala marunge eaghuhie cha idi, kangi, ekizika kukudoka, kwa kutakunda ye mwenye, akazoka kuza noko henyu. 18Tukamtuma hamwe na ula mndughu eye nguma yakwe he Mburi Yedi yegishije he makanisa ose. 19Neri si huvo du, mira ekisaghurwe ni makanisa iti azoke hamwe na uswi he mburi ya ii mbonea tweihirira, nesa Mfumwa akazwe, kukuringanya kwetu kufumirire. 20Twekitesya iyo mburi nesa hasireketa mntu etushagha he icho kiinkwa, echo twekihirira; 21twekirongadunganya vila e vyedi, neri si mozya he Mfumwa du, mira hata mozya he vantu. 22Na uswi hamwe navo twamtuma mndughu wetu, twemvonie kantu kajinki he mburi nyingi iti ekudoka; na iki ezikisha kukudoka, vuntu vwa ikuji ibaha ena he unywi. 23Heicho mntu ekienda kumanya mburi jakwe Tito, ye ni mghenji wangu, na mndima hamwe nami vuntu vwenyu; kangi ekienda mburi ja vandughu vetu, vo ni ntume va makanisa, na ngazo yakwe Kristo. 24Heicho vavonyesheni nezo idi ya lukundo lwenyu mozya he makanisa, na kukukaza kwetu vuntu vwenyu.
Currently Selected:
2 VAKORINTO 8: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
