2 VAKORINTO 11

Ni Ntume vuntu chetara

1Nanga mwekitonjanya nami hodari he vurundu vwangu! yee, mutonjanye nami. 2Ambu nimusikia kiru, kiru cha Mrungu; ambu nemuzangiie mme mmwe, nesa nimwetie Kristo m’bora hirio ezerire. 3Mira nifoleke; iti ila nyoka yemwishije Eva kwa kiavya chayo, isiremukonda madunganyo enyu, mukashigha kuela na kutongia he Kristo. 4Ambu uo eza ekimubirikira Yesu ungi, eye uswi twesim’birikire, kana mwekimghuhia mpeho ungi mwesimghuhie, kana mburi yedi ingi mwesiikundie, muketa chedi mwekigumirijiana naye. 5Ambu nidunganya iti, mi siduinkiwe ni kintu he vila ntume vabaha vena. 6Mira nziaho mi ni mntu nesimanyije kuteta, huvwo sivwo vuntu neikee he icha; mira he kila kintu twefunyirijwe henyu.

7Hamao, netebana, aho nekikuduisha nesa unywi mukazwe, kila nemubirikire Mburi Yedi ya Mrungu hesina mhako? 8Neghumbie makanisa angi mari javo, nikarerwa nivo nesa nimuhirire unywi. 9Nami aho neho hamwe na unywi na kusovekiwa, siemeie mntu; ambu vala vandughu vezie kufuma Makedonia, veninkie kiringanyo cha vila neenda, nami he vintu vyose nekikurindie, nisimuemeie neri hadori; kangi ninekurinda. 10Sa vuntu ila idi yakwe Kristo yeho ndeni hemi, tehena mntu enenigura momo he uku kukukaza kwangu he masanga a Akaya. 11Hanini? Ni iti simukundie unywi? Mrungu emanyije. 12Mira icho nehira ninekihira, nesa nivakinde avo veenda kapengere vasikavone, nesa he iyo mburi vekukazia vavoneke iti vereikaa sa uswi. 13Ambu vantu sa avo ni ntume va mongo, vehira ndima kwa kiavya, vekugharusha vaoke fwanyanyi ya ntume jakwe Kristo. 14Neri si cha kimako, ambu Shetani ye mwenye ekugharusha aoke fwanyanyi ya malaika wa kianga. 15Heicho si kizinya vakwe kukugharusha vaoke fwanyanyi ya vandima va kitea; evo msio wavo weneringanana na ndima javo.

Kuringanya Paulo na vala vemkinda

16Niteta kangi, mntu asidunganye iti mi nitekirundu; mira nziaho munidunganyija huvo, munikundie sa nerundie, nesa nami niidime kukukaza na ere kadori du. 17Icho neteta siteta iazero la Mfumwa, mira ni sa cha rundia, he ndekero ii ya kukukaza. 18Ambu vajinki vekukaza kimwiri, hata mi ninekukaza. 19Unywi kila mwechee, mutonjanya na virundu kwa kuizihirwa. 20Ambu mutonjanya na mntu emugera he vuzoro, emumija, emutaha, ekukaza, emubigha vusho.

Mpwasi na mavwasi akwe Paulo

21Niteta kwa kukuduisha sa iti uswi tu vasoka. Mira, kakicha hena mntu ena ndekero he kintu chochose, -niteta kivurundu,- hata mi nirena ndekero. 22Vo ni Vaebrania? Hata mi. Vo ni Vaisraeli? Hata mi. Vo ni va lukolo lwakwe Abrahamu? Hata mi. 23Vo ni vandima vakwe Kristo? Niteta kivughurushi, mi nevakelile; he mavwasi, kuvakela mno; he kichungo, kukela mno; he kubighwa, kukela kiringanyo; he kifwa kantu kajinki. 24He Vayuda, kantu kasano, nebighiwe viboko makumi mane kuvusha kimwe. 25Kantu katatu nebighiwe kwa nzata; kantu kamwe nebighiwe kwa mabwe; kantu katatu nebajikiwe ni ngilawa; neikae he mpombe di, bagha; 26he kuzoka kantu kajinki; nevonie mpwasi ja mieta; mpwasi ja vakibonda; mpwasi he mbari yangu; mpwasi he Vakiisanga; mpwasi ja he muzi; mpwasi uko nyika; mpwasi he bahari; mpwasi he vandughu va mongo; 27he mavwasi na mabinuko; he kuyaa kiavi kantu kajinki; he nza na nkiru; he kukuima kantu kajinki; he mpeho na kuikaa kituhu. 28Kushigha ivyo vya uko nze, hena vyenizia kila msi, ni kurereha makanisa ose. 29Ni ani e msoka, nami nesiokie msoka? Niani ekwangwalijwe, nami nesivihiwe? 30Chekinitara kukukaza, ninekukazia vusoka vwangu. 31Mrungu, Vava wa Mfumwa Yesu, mwenye ngazo kae na kae, emanyije kuti siteta mongo. 32Uko Damasko, mfumwa wa mfumwa m’baha Areta, ekirinda muzi wa Vadamasko, iti anigure; 33nami nikasejwa he idirisha la he lukuta na kikapu, nikakia he mikono yakwe.

Currently Selected:

2 VAKORINTO 11: CHSUNT67

Highlight

Copy