1 VAKORINTO 14
14
Viinkwa vya vuroti na vitetire
1Endisheni lukundo na kuendisha viinkwa vya kimpeho, mira kukela ni iti muidime kurota. 2Ambu ula eteta kitetire kingi teteta na mntu, esire Mrungu, ambu tehena esikia, mira eteta vintu vya mpiso he ngoro yakwe. 3Ula erota eteta na vantu viteto vya kuvajenga, na kurunga, na kuvatuja. 4Ula eteta vitetire vingi ekujenga ye mwenye, ula erota ejenga kanisa. 5Nami nienda iti unywi vose mutete mitetire ingi migheni, mira kukela haiwa nienda murote, ambu ula erota ni m’baha kukela ula eteta mitetire, esire kakicha ehgarusha nesa kanisa lijengwe.
6Mira iki vandughu, kakicha nekiza henyu nekiteta vitetire vingi ninemughenja ni, nekisateta kwa kufunyirija, kana he kiugho kana he kurota, kana he kucheja? 7Hata vintu vyesina moo vyekifunya izii, kari ni mitoriro, kana ipango, vyekisafunya mazii etekane, kinemanyika ze icho chebughwa he mtoriro kana he ipango? 8Kana lugunda lwekifunya izii lesimanyike, niani enekuringanya he nkondo? 9Na unywi nirehuvo, icho kitetire kingi mwekisafunya nacho kiteto chemanyisha, icho kiteto chetetwa kinemanyika ze? Ambu muneoka varekutetira du.
10Ni huvo, hena mbare nyingi ja mazii he si ii, neri tehena imwe heo lesimanyike. 11Ana nekisamanya cho ilo izii leteta, naoka kirundu he ula eteta, na ula eteta aoka kirundu hemi. 12Na unywi nirehuvo, kila mwevareenda viinkwa vya kimpeho, endani iti muvineshijwe, nesa mujenge kanisa. 13Heicho ula eteta kitetire kingi, naombe iti ainkwe kukigharusha. 14Ambu nekiomba na kitetire kingi, mpeho wangu eomba, mira kucha kwangu tekugera ntunda. 15Hama cheikee ze ra? Nineomba kwa mpeho, kangi nineomba kwa kucha; nineimba kwa mpeho, kangi nineimba kwa kucha. 16Ambu wekikaza kwa mpeho, ula eho he vurundu eneghuhia ze: “Ameni,” aho wekinaanjela, naye esimanyije cho weteta? 17Ambu ni cha idi, we weanjele nezo, mira ye tejengwa. 18Nimwanjela Mrungu kila neteta na mitetire ingi kukela unywi vose; 19mira he kanisa nienda kuteta viteto visano kwa kucha kwangu, nesa nicheje vaghenji, kukela kuteta viteto viku ikumi na kitetire kingi.
20Vandughu vangu, musioke vana he kucha; mira he vuvivi muoke vana, na he kucha muoke vantu vazima. 21He myomongwa heandikwe iti: “Nineteta na vantu ava kwa vantu va mitetire ingi, na miomo ya vagheni, mira nerihuvo tevekanisikie neri, nivwo vuntu Mfumwa eti.” 22Heicho, vitetire vigheni ni luvengo, si he vala veitikije, mira ni he vala vesiitikije; na kurota si he vala vesiitikije esire he vala veitikije. 23Ana, kakicha kanisa yekivungana, aho vose vekiteta vitetire vingi, hakaingia vantu vasoka kana vantu vesiitikije, tevekati: “Mutagharuka?” 24Mira kakicha vose verota, mntu esiitikije kana mntu msoka ekiingia, enevotwa ni vose na kulahwa ni vose; 25kangi mpiso ja ngoro yakwe jinemanyika; huvo enemtasa Mrungu ekigwa halasi na kughamba boo kuti, “Cha kididi Mrungu eho ghati he unywi.”
Kuketa mpango wetara he mtaso
26Vandughu, cheve nini? Aho mwekivungana kila mmwe ena izumo, ena kucheja na kifunyirijo, ena kitetire kingi, ena kugharusha kitetire. Mira ivyo vyose vioke vya kujenga. 27Kakicha hena eteta kitetire kingi, hatete veri kana vatatu, kukela hai, kangi kimakamba na mmwe agharushe. 28Mira hekisoveka mrehgarusha, ahuje he kanisa, atete na Mrungu ye mwenye. 29Na varoti vatete veri kana vatatu, vaherereje. 30Mira kakicha hena ungi eikae aho ekifunukurirwa kintu, ula wa kuvoka ahuje. 31Unywi vose muidima kurota mmwe mmwe, nesa vose vakucheje kangi vatujwe. 32Na mpeho ja varoti jivasikia varoti. 33Ambu Mrungu si Mrungu wa mvulughiko, mira ni wa mporere, sa vuntu cheikee he makanisa ose a vala vezerire.
34He kanisa vache vahuje, ambu tevekundijwa kuteta, mira vasikie sa vuntu myomongwa yeti. 35Vekienda kukucheja kintu vavwije vome vavo uko kaa; ambu he mche kina soni kuteta he kanisa. 36Hama kiteto cha Mrungu chefumie henyu, kana chetemufikia unywi du?
37Mntu ekikuvona iti ni mroti, kana mntu wa kimpeho, namanye vila nemuandikie iti ni maazero a Mfumwa. 38Mira mntu ekirunda, narunde.
39Heicho vandughu vangu, endani mno kurota, neri musisuje kuteta vitetire vingi. 40Mira vyose vihirwe nezo kangi vitonge kimakamba.
Currently Selected:
1 VAKORINTO 14: CHSUNT67
Highlight
Share
Copy
Want to have your highlights saved across all your devices? Sign up or sign in
Chasu New Testament © Bible Society of Tanzania, 1967.
