HLIMI 27

Jakɔbe wí ma frɛmɛ kpe ma mi dá bi gân Esawu ma we

1Isake wi dá lɛ ceŋge fɔ wi nyɛʔɛ ke fanŋa àʔa kɔ. Wi ìn dàá nyaʔa adi. Wɔ̀ɔ bâ wi pyɔ lagwɔ Esawu yeri mà bɔ́ɔ̀ po: «Na pyɔ.» Wɔ̀ɔ syɔ mà yo: «Mí ŋa.»

2Isake wɔ̀ɔ wí po: «Welé, ki tɔ na mí ma lɛ. Mi ìn na kuwlɛʔɛ cɛn kpo. 3Mí na ma fɛn. Ma ma disoʔo yrɛbɛ kpe, ŋara nì, ní anda nì, ma kɛri ma ya nya kara ca ná kan. 4Ma ba hro da hɔʔɔ ná kan tí na na glanʔa ge. Ma pan tí ni ná kan bì ba ti lì, jango bì Nyɛʔɛlɛ wa bì ma kân sanni mí bi gu ge.»

5Hrebɛka wɔ̀ɔ ki loʔo ga Isake wi dá yo wi pyɔ Esawu ma we. Esawu wɔ̀ɔ kɛri nyarihaʔa na bì yà kara ca bì ban tí ni.

6Ki kruʔu ma Hrebɛka wɔ̀ɔ kí yo wi pyɔ Jakɔbe ma we mà yo: «Welé, mi dí ma to nya wí na nyu ma lɛ nì mà yo: 7Ma pan ná kan nyakara ní, ma ba hutanra da hɔʔɔ ná kan tí na na glanʔa ge, nà mi ba ti li kɔ, pa mi Nyɛʔɛlɛ wa bì ma kan, sanni mí bi gu ge. 8Ki tɔ na maʔa lòʔó ná ma. Ga mí bi yo ma hanri ge maʔa hanri. 9Ma kɛri wa ajoyribi jasaʔa ni, ma ya ŋkapiʔi syɛn fara wa na kân. Mí bi ba hukmara tà hɔʔɔ ma to kan we da ti noo glanʔa ge. 10Ma ba gɛri tí ni wí kan jango wi ya Nyɛʔɛlɛ wa wi ma kan, sanni wí bi gu ge.»

11Jakɔbe wɔ̀ɔ kí yo wi no ma mà yo: «Wele, na lɛ Esawu wí nyɛ yujoro fɔlɔ di tà wo nyɛ domi na we. 12Kana na to wí bi yà maʔa na na, pɔɔ ki nya mí noo fanla, wòo Nyɛʔɛlɛ wa bì na kân jango bì frɛmɛ ta, di pɔɔ na danŋa.»

13Wi no wɔ̀ɔ wí po: «Pa mi ki danŋama yaʔa mi to domi na. Di kiì nì kì bɛfu ní ta sye ma ya ki ŋkapiʔi co, ma pan ké ni ná kan.»

14Jakɔbe wɔ̀ɔ kɛri mà yâ ke ca mà pan ké ni wi no kan we. Wɔ̀ɔ hutanra tà hɔʔɔ da ti dáa Isake glanʔa we. 15Ki kruʔu ma wɔ̀ɔ wi pyɔ lagwɔ wi drekmara da wi da jɛʔɛ́ wa go ni kà kpe maʔa le Jakɔbe na we, 16mà wi kyɛrɛ fo de wi na ŋkapiʔi hlɛrɛ ní de ní wi atiʔi deʔe ní ga kí nyɛ wlɔʔɔgɔ ge. 17Ki kruʔu ma wɔ̀ɔ ki hutanra kan de wi ma ní bru ŋa nì wi dá hɔʔɔ ge. 18Wɔ̀ɔ kɛri wi to krugu mà yɔ́ɔ̀ po: «Na to!» Wi to wɔ̀ɔ wí po: «Mí ŋa. Maʔa yo ná kan hɛn ŋa wi má ni ge.»

19Jakɔbe wɔ̀ɔ ní mòo po nɛ: «Mì wi Esawu, ma pikplɛɛ we. Ga ma dí yo bì hanri mí maʔa hanri. Ta ban ma ba glɛn ma na karà ka de. Ki kruʔu ma ma Nyɛʔɛlɛ wa ma na kan.» 20Isake wɔ̀ɔ wí po: «Na pyɔ, má maʔa po mɛlɛ mâ ki karà ta ticaʔaga banmɛ ge?»

Wɔ̀ɔ wí po: «Bajegɔ Nyɛʔɛlɛ, ma Nyɛʔɛlɛ, liì ma ti tyɛʔɛ wa na kloʔò na ge.»

21Isake wɔ̀ɔ Jakɔbe po we: «Ma flo naʔa. Mí ma cori bì maʔa ma na, na pyɔ, jango biʔi cɛn kmaʔa mo wi na pyɔ Esawu we.»

22Jakɔbe wɔ̀ɔ flo wa wi to tanla. Isake wɔ̀ɔ maʔa wi na ma yo: «Wi akpolo lí nyɛ Jakɔbe wolo, di wi kyɛrɛ̀ tí nyɛ Esawu woro.»

23Wi ìn Jakɔbe cɛn, mɛjɛn wi kyɛrɛ̀ ti dá bo tonro joro ní nɛ pa Esawu nyɛ we. Di sanni wí bi Nyɛʔɛlɛ wa buú kan ge. 24Wɔ̀ɔ wi yugu nɛ: «Kayocɛnŋɛ na mo wí na pyɔ Esawu we yo?» Jakɔbe wɔ̀ɔ wí po: «Ee.»

25Isake wɔ̀ɔ yo nɛ: «Ma hro tà fa na kan, jango bì ma karà ka de bì Nyɛʔɛlɛ wa bì ma kan.» Jakɔbe wɔ̀ɔ hro kan wi to ma mà dufɛn kan wí ma nɛ, wɔ̀ɔ jɔ. 26Ki kruʔu ma Isake wɔ̀ɔ wí po: «Flo naʔa ma na fyon, na pyɔ.»

27Jakɔbe wɔ̀ɔ flo wa wì tanla mòo co mòo traʔa wi na. Isake wɔ̀ɔ wi drere ti nuʔu syɔ ge. Ki kruʔu ma wɔ̀ɔ frɛmɛ pa wí na mà yo:

«Welé, na pyɔ wi nuʔu kí nyɛ

nɛ pa kere da nyɛ

Nyɛʔɛlɛ lí ma li kyɛʔɛ pa ti na á ti po frɛmɛ woro ge.

28Nyɛʔɛlɛ li namuru kamɛŋɛ wo má na

ní tra ti nylanʔa nì ge,

akaba fafaʔa nì, ní dufɛn nì,

pi nyɛʔɛ má kan ceŋge.

29Klòʔo hɛɛn fafaʔa bi glɛ́n pe ma kan.

Klòʔo fafaʔagaa bí da kunbiʔi kanni mà tanla.

Ma po ma no pii pe fɔlɔ.

Pe da kunbiʔi kanni mà tanla.

Ki woo wi dànŋà ŋa wí bi mà danŋa ge.

Frɛmɛ bí bo ŋa ma wí bi frɛmɛ wa má kan ge.»

30Isake wi da gâ Nyɛʔɛlɛ wa Jakɔbe kan we kɔ, wɔ́ɔ nyini, ki ìn mo wi lɛ Esawu wɔ̀ɔ po wi jɛ̀ wa disoʔo ma mà pan. 31Wɔ̀ɔ bâ hro tà hɔʔɔ kpo tanra mà kɛri tí ni wi to kan mà yɔ́ɔ̀ po: «Na to, ma jɛ̀ ma lì ma ma pyɔ wi karà ka de, jango ma Nyɛʔɛlɛ wa ma na kàn.» 32Wi to Isake wɔ̀ɔ wi yugu mà yo: «Han wi mo ní we?» Wɔ̀ɔ wi to po we: «Mì wi ma pikplɛɛ ŋa pé na yeri Esawu we.»

33Ki dá Isake fo ceŋge fɔ wɔ̀ɔ na hiʔiri wre tì bɛfu na mòo yugu mà yo: «Han wi si wi di yâ karà ca mâ bâ na kân, á mi li sanni mo má bi ban ge? Mi dí frɛmɛ pa ki woo wiì na. Mí bi go ki woo wiì kan su.»

34Esawu wi gâ wi to wi kayoro loʔo de, wi lama à mi horo wí na ceŋge. Wɔ̀ɔ taʔara gbanʔa mà yo: «Na to, ma frɛmɛ pa domi na kpo!»

35Isake wɔ̀ɔ wi po: «Ma conlo wí ma pan ticlimi na mà bâ ma frɛmɛ kpe me ma mi dí bì gân má ma ge.»

36Esawu wɔ̀ɔ kí yo gbanʔa mà yo: «Pa pe gáa wi yeri Jakɔbe kiì gi ki kan wɔ́ɔ na fanla fɔ mâ ta syɛn dee? Wi klú mà na lɛmɛ tonro syɔ na ma. Wi ní mà na frɛmɛ syɔ me na ma nɛ.»

Ki kruʔu ma wɔ̀ɔ yo nɛ: «Mɛ ìn frɛmɛ mà yaʔa ná kan yo?»

37Isake wɔ̀ɔ wí po: «Mí moo krɛʔɛ ma fɔlɔ mà wi heme woo pè bɛfu krɛʔɛ wi tungɔɔlɔ. Mí ma frɛmɛ pa wí na mà yo akaba nì dufɛn nì pi nyɛʔɛ wí ma. Mi ìn bi gban bì yraʔa kà hanri má kan, na pyɔ.»

38Esawu wɔ̀ɔ wi to po we: «Ki frɛmɛ ma miì nigbe nyɛ wa ma ma yo. Frɛmɛ mà pa mì na kpo, na to.»

Ki kruʔu ma wɔ̀ɔ kpele gbanʔa ceŋge. 39Wi to Isake wɔ̀ɔ wí po:

«Ma korohaʔa kí bi bo leʔe trakmara ní de.

Namuru kamɛŋɛ kí bi bo má ni leʔe kpo.

40Má bi dá ma hro taʔa wa ma mlaʔa kpele liì nì.

Pa ma bo nɛ ma conlo wi tungɔɔ.

Di má bi ba jan bì syɔ wí ma

bì ŋklomo tiʔi kaʔabu ga wí bi le má na ge

bìʔi fara wa kpo ma atiʔi ni ge.»

Jakɔbe wí ma fɛ mà kɛri wi lɛ Laban krugu

41Esawu wi lama mi dá gban wi na wi conlo Jakɔbe wi kala na ga na pe to wi da gâ frɛmɛ pa Jakɔbe na we. Wi dáa ki nyu mà yo: Wò to wí bi gu ki ìn bi mo. Ki wlɛʔɛ na pa mi ba Jakɔbe kpo we. 42À pe yâ ki kayoro yo Hrebɛka kan da wi pikplɛɛ Esawu wi dá yo ge, wɔ̀ɔ wi pyɔ syɛnwoo Jakɔbe yeri mà bɔ́ɔ̀ po: «Welé, ma lɛ Esawu wí yo wí bi wi nàʔà fara ma ní bì ma kpo. 43Ki tɔ na, na pyɔ, ma lòʔó ná ma, ma fɛ̀, ma kɛri Laban krugu, na lɛ we. Wí nyɛ wa Aran ni. 44Ma ya gò wa wi ní, ma nyiŋi kà kɔ wa fɔ ma lɛ wi lama mi ba fiʔi 45fɔ wi lagbanma mi kɔ, wi lama wɔ ga nì ma dá hanri wí na ge. Ki nyiŋi na pa mi ma hanri ma pan. Mi ìn jori yè syɛnmu ye kù na ma wlɛdege na.»

46Hrebɛka wɔ̀ɔ Isake po we: «Nyuwyeʔe ki laa kí ma kɔ ná na Ɛti wi picɛ kala na le. Jakɔbe nòo cɛlɛ wà kpe nòo po nɛ pa ki woo bee nyɛ be wa Ɛti wi picɛɛ ni, ná kiì ban wa ki klo li picɛɛ ni be, na nyuwyeʔe ki tonro pɔɔ bo nyaʔa ní.»

Currently Selected:

HLIMI 27: NLK10

Highlight

Copy

Compare