Sofonii 3
3
Zyerusalɛmi ye ga Kolocɔlɔɔ kayeli lóʔo í
1Wɔʔɔli a pye kèceegi na gi nɔ́nʔɔ lè,
koro gee gi nyìn fǎngi gbànvɔɔlɔ na lè!
2Ki o joomɔ faala lúro í,
ki o fɔ̀lɔ́ kpúmɔn-mí-kàrigala na í,
ki o kiyɛɛ daari Yawe na í,
ki o nùuní gi Kolocɔlɔw na í.
3Ki syɛɛnkpolobèle be nyɛ gi níngi ni lè
pe i nyɛ càarabēle bele be kaana lè.
Ki kútiijoobèle i nyɛ cângwɔʔɔ nyɔ́ɔ kàsoloyo,
yee yi lè yafyɛn ga kòro yi ma yi ba káa nyǐngi nyɔ́ɔ na í.
4Ki kanyaajoobèle i nyɛ nɔ̀ʔɔrɔgɔ-syɛ̀ɛnnɛ,
ní nǎnbèle pèle,
bele be lè pe o nyɛ tágala syɛɛnnɛ be fáliw ni í.
Ki sáriga-wòlobèle i yacanri nɔ́ɔnri,
pe i làlwaw kálagi.
5Yawe n sín ki níngi ni,
wi o kakologo kpéʔele í.
Nyɛ̀ʔɛ nyɔ́ɔ o nyɛ̀ʔɛ nyɔ́ɔ,
wi i wi sínni yirigi gbɛ̀ɛ́nmi na,
wi o láari gee bee pyele na í.
Kàjáa syɛɛnnaa-sìnzinw ga fɛ̀ɛrɛ cán í.
6«Mii n syɛɛnfeleye kwɔ́ɔ n yirige yaà.
Mii n be jɛ̀ɛ́ngèle kpaataʔa-tɔ́nɔyɔ kálagi yi lè be fǎngi.
Mii n be kàlari-kóloyi kálagi,
syɛ̀ɛnnɛ ni o sɔ̀lɔ́ yaà í!
Pe kěyi n jaa, syɛ̀ɛnnɛ ní o yaà í,
tɛ́ɛnfɔɔlɔ ní o yaà í!
7Mii maa ni gi nyuu níì jo:
Mɔ mi tɛ́nɛ maa fɛ̀ɛgí mii na,
mí fɔ̀lɔ kpúmɔn-mí-kàrigali na!
Kánmi bee na kérigèle myɛ mii tɛ́ʔɛ n wi sàmi lè,
mii màko a dée pye bi wi kálagi í.
Kàjáa a be sèʔê tɔlɔyɔ wári be kálagimi kapyere kurugo.
8Koro na ye mii sige,
cángee na mii a yìri lè bi pye séerafɔlɔ,»
Yawe wi jo nya,
«níì cán mii n gi kɔ̀rirɔ n tímana bi syɛɛnfeleyi pínɛ yiyɛɛ ni,
bi fǎnyi kpóʔoro yi pan mii ma,
bi mii fundanʔagbɔɔri yàli yi na,
mii fundanʔari gbànma myɛw.
Níì cán mii yejaagi náa a tári myɛ sórigo.
Kolocɔlɔɔ a syɛɛnfeleyi kàriga
9«Lǎli bee ni mii a syɛɛnfeleyi nyɔ́ɔwara jée mùnu
koro ga pye pe myɛ í da Yawe mɛ́ɛgi yiri
sáā báara wi ma ní fungo nibin ní.
10Mii kpɔ̀ʔɔrɔfɔbèle, poro bele mii cariga lè,
pe a ra yìrigí yaà Etyopii cábiyi jelige na
bàā maa ní yakaanyi ní mii ma.
Isirayɛli wogorobèle kéele
11«Cángi bee na nàʔabeemi myɛ mɔ kpéʔele mii na lè,
fɛ̀ɛrɛ a ní mɔ taa bi kéeli na í,
níì cán lǎli bee ni bele be muguri ní nɛ̀ɛnyɛnɛgɛ ní lè
mii a be cɔɔnri yirige mɔ níngi ni.
Mɔ a láʔa nɛ̀ɛgbɔʔɔgi pyele na mii nyanbejǎngi na.
12Mii a syɛ́ɛnbèle pèle yaʔa mɔ níngi ni,
bele be nyɛ lè màámi fɔ̀ɔlɔ ní fóomi fɔ̀ɔlɔ,
pe a Yawe mɛ́ɛgi pye be tɛɛlaragi.
13 #
Tɛ̀ɛn 14:5
Isirayɛli wogorobèle a ní da kakoloyo kpéʔele í.
Pe a ní da jànvaa nyuu í,
námara nyíngéle a pye be nyɔ́ɔyi ni í,
pe a ra líi sáā sìnɛ́,
syɔɔn faala a ra be tɔ́ɔrɔ í.»
Zyerusalɛmi lúru-mí-télegeli kéele
14 Siyɔn calipile,
da fàndaara yákpolo wáa!
Isirayɛli ye, yaa yákpogèle wáa ní fundaanra ní!
Zyerusalɛmi,
da fundaanra kpéʔele,
máā muguri ní mɔ fúngi myɛ ní!
15Kútiiw wi da too mɔ na lè,
Yawe n wi láʔa mɔ na,
wi n mɔ nigoow kolo n lúrugo.
Isirayɛli fànʔafɔw wi lè Yawe,
wi i nyɛ mɔ níngi ni.
Wɔʔɔgɔ ní o yaà,
gee na mɔ a ra fɛ̀ɛgí lè í.
16Cángi bee na,
pe a gi joo Zyerusalɛmi ma si jo:
«Siyɔn, mɔ a kɔ́ ra fɛ̀ɛgí í!
Mɔ kɔ́yi a kɔ́ fɔlɔ í!
17Yawe mɔ Kolocɔlɔw i nyɛ mɔ níngi ni,
nànnirio wii,
wee wi syɔɔn syoo lè.
Wi fundaanratɔw a ra muguri mɔ
kéeli na.
Wi a kòro pyèrio mɔ tamagi
kéele na.
Wi a ra fàndaara mugurumɔ kpéʔele mɔ kéeli na.»
18«Bele be fɔ̀n kpóʔorojǎngèle ni,
àmɛɛ be léeli mɔ na lè,
mii a be kpóʔoro,
poro bele na fɛ̀ɛ́ri líbe lè.
19Wéle, lǎli bee ni,
bele myɛ be fànʔa cáan mɔ na lè,
mii a keele tɛ́ʔɛ be na.
Mii a tɔyaayi fɔ̀ɔlɔ syɔɔ,
bele be nɛnɛ lè, mii a be kpóʔoro.
Táree myɛ ni be nyɛ fɛ̀ɛ́ri ni lè,
mii a be kpéʔele yaà beè sòololo,
ní mɛ́ɛyɛ fɔɔlɔ.
20Lǎli bee ni mii a yele lúrugo pan,
loro lǎli ni mii a ní yele kpóʔoro.
Níì cán mii a yele kpéʔele mɛ́ɛyɛ fɔɔlɔ
ní sòololo yárigéle tári syɛɛnfeleye myɛ nínge ni,
koro a pye yele wóbèle be cò n kári lè
lǎli ni mii ga be lúrugo n pan yele nyɛ́nɛ na lè,»
Yawe wi jo nya.
Currently Selected:
Sofonii 3: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
