Wɔrɔmi ye 8
8
Pìicǎnni kôdanʔara kéele
1Koro na tɔ́ɔliw ni bele be nyɛ lè Kirisi Zyezu ni, bele bee wàa tɔ́lɔgɔ ní o nyɛ kálagili kútii ni í. 2Níì cán Pìicǎnni li sìíw kaangi syɔɔn ma Kirisi Zyezu ni lè, li làlwaw n mii yirige kapeebyeri ní kùúw làlwa púloro ni. 3Níì cán gee gi nyɛ lè Mowizi làlwaw da gbàn n gi kpéʔele í, àmɛɛ céri kèlē da wi kàriga lè fànʔa fun, Kolocɔlɔɔ n gee bee kpéʔele, àmɛɛ wi wi tiimaa Jáaw tun lè syɛ́ɛnbèle kapeebyere kéele na, a wi pan n baa cere láa dee di syɔɔn kapeebye-céri wíri lè, níì kútii cáan kapeebyeri na céri ni, 4koro ga pye àmɛɛ Mowizi làlwaw caa syɔɔn í da síngi lè, koro í ba foro wolo ma, wolo bele wo nyɛ lè wolo o táanri ni yɛlɛgi ní céri kínidɛnɛgɛ ní í, fwɔɔ ní Pìicǎnni kínidɛnɛgɛ ní. 5Bele be táanri ni yɛlɛgi ní céri kínidɛnɛgɛ ní lè, bele bee sɔ̀ngurɔ i nyɛ céri nyɛ́nɛ kèlē na, bele si be táanri ni yɛlɛgi ní Pìicǎnni kínidɛnɛgɛ ní lè, bele bee sɔ̀ngurɔ i nyɛ Pìicǎnni nyɛ́nɛ kèlē na. 6Níì cán céri kèlē sɔngurɔ i syɔɔn tórogi kùúw ma, Pìicǎnni kèlē sɔngurɔ si i syɔɔn tórogi sìíw ní yɛɛ̀nyingi ma. 7Bele ni céri kèlē sɔngurɔ nyɛ lè, bele bee i nyɛ Kolocɔlɔɔ nígoobéle, níì cán sɔ̀nguri bee n be kaan pe o lúro Kolocɔlɔɔ ma í, àlí fànʔa o wɔ́ɔ̄ nyɛ be ni bi gbǎn gi kpéʔele í. 8Bele si be nyɛ lè céri kôdanʔabéle, poro kéeli a gbǎn Kolocɔlɔɔ dɛ́nɛ í.
9Yele si na, yele o nyɛ céri kôdanʔabéle í, fwɔɔ Pìicǎnni kôdanʔabéle àmɛɛ Kolocɔlɔɔ Pǐli tɛ́ɛn lè yele fúnyi ni. Kirisi Pǐli ga pye li o nyɛ syɔ́ɔnwee fúngo ni lè í, wee bee o nyɛ Kirisi wóo í. 10Kapye Kirisi i nyɛ yele fúnyi ni yele pìígèle i nyɛ woweegèlē ní sínni kéele na, àlí bi gi taa yele céri i nyɛ woguuro ní kapeebyeri kéele na. 11#1Kor 3:16 Wee wi Zyezu nyán n yirige kúbèle nínge ni lè, wee bee Pìle ga pye yele fúnyi ni, woro wee wi Kirisi Zyezu nyán n yirige lè kúbèle nínge ni, wi a ba yele cekuuri nyán di pye sìi na wi Pǐli báriga ni li tɛ́ɛn lè yele fúnyi ni.
12Gee bee na ni senyɛ̀nnɛ, fwɔɔlɔ i nyɛ wolo na, kàjáa li o nyɛ céri wólo í, jàngó wolo a ní kɔ́ ra táanri da yɛlɛgi ní ti kínidɛnɛgi ní í. 13Níì cán yele ga ni táanri ni yɛlɛgi ní céri kínidɛnɛgɛ ní, yele a ba kùu. Yele si ga ni céri kínidɛnɛgɛ kúu Pìicǎnni báriga ni, yele a sìi taa. 14Níì cán Kolocɔlɔɔ Pǐli ga pye bele yɛɛ̀kinio lè, bele bee i nyɛ Kolocɔlɔɔ pìibēle. 15#Mar 14:36; Gal 4:6 Pǐlee yele taa lè, li o nyɛ pìlaa félege, lee li a yele kàriga lè pulobèlē si yele nyìn fyáari na níìgēle í, kàjáa Pǐli yele taa lè, lee bee n yele kpéʔele Kolocɔlɔɔ pìibēle, a koro wolo kaan wolo i gi nyuu ni yákpogèle wáa níì jo: «Abaa! Wolo Tóow!» #Gal 4:5-7 16Pìicǎnni tiimaa li gi fíligi ni tèé wolo pìígèle na níì jo wolo i nyɛ Kolocɔlɔɔ pìibēle. 17Amɛɛ wolo nyɛ lè wi pìibēle, wolo wɔ́ɔ i nyɛ wi kɔriliibéle, wolo i nyɛ Kolocɔlɔɔ kɔriliibéle ní i nyɛ Kirisi kɔriliinyɛ̀nnɛ, níì cán wolo n pínɛ ni wɔʔɔ ní Kirisi ní, koro ga pye wolo í wɔ́ɔ ba pye ní wi ní wi nìjangbɔɔri ni.
Nyɛ̀ʔɛna nijanri kéele
18Mii i gi tímana n jo wɔʔɔgee ni wolo nyɛ lè tɔ́ɔliw naa ni, ki o nyɛ bi gbǎn tímana ní nìjanri ní í, dee wolo a ba nyaa lè nyɛ̀ʔɛna. 19Kolocɔlɔɔ yasamagari myɛ wɔ́ɔ i wi jáabèle làridɛ̀ɛnnɛ yèʔerí. 20#Sél 3:17-19 Yasamagari myɛ i nyɛ wodɛʔɛrɛ ní kanyɔɔnɔ fun fangi láara ni, ti nyɛnɛ kéele si ban í, ti tɛ́ʔɛfɔw nyɛ́nɛ kéele lii, koro ní ki myɛ ní sɔ̀ngumɔ tɛɛtaʔaga i yaà, 21koro gi nyɛ, ncan Kolocɔlɔɔ a ba yasamagari bee tiimaa yirige fɔ́nʔɔri púloro ni si nìjanri wɔ́rɔdɔ kaan di ma ní wi pìíbèle ní. 22Wolo si n gi cán ncan yasamagari myɛ n pínɛ ni wɔʔɔ ní i cɛ́ɛn n baa nan níjanʔa na, àmɛɛ fícɛnnɛfɔlɔ ga ni caa bi see lè. 23#2Kor 5:2-4 Toro yagana si ban í, níì cán wolo bele fúnyo ni Pìicǎnni nyɛ lè yaseligi wozanri yɛ́ʔɛ na, wolo tiimaa wɔ́ɔ i cɛ́ɛn wolo fúnyi ni ni lǎli sige, lee ni Kolocɔlɔɔ a ba wolo kpéʔele foro lè wi pìibēle àmɛɛ wi a ba wolo céri syɔɔ lè. 24Amɛɛ wolo syɔɔ lè, wolo n wo sɔ̀ngumi taʔa gi na ncan Kolocɔlɔɔ a ba wolo syɔɔ foro. Níì cán syɔɔn ga wi sɔ̀ngumi taʔa yárigee na lè, wi ga gi nyaa, wi a ní da gi sige í, àmɛɛ wi gi nyaa n kwɔ́ɔ lè, nyàʔá na wi a ní da gi sige? 25Yárigee si gi nyɛ lè wolo o gi nyaagi í, wolo ga wo sɔ̀ngumi taʔa gi na, wolo a ra gi sige ní kpàracogo ní.
26Kánmi bee na Pìicǎnni wɔ́ɔ i wolo dɛ̀ɛmɛ́ wolo báriga fǔnmi kéele na, níì cán gee wolo yɛlɛ wolo í da nyɛ́ɛri Kolocɔlɔɔ ma lè, wolo ga gi cán í. Kàjáa Pìicǎnni tiimaa i Kolocɔlɔɔ nyɛ́ɛri wolo kéeli na ní cɛ́ɛnmɛ ní, cɛ́ɛnmee bi lè syɔɔn a gbǎn bi syɛ́ɛnri cán bi joo í. 27Kolocɔlɔɔ wi syɛ́ɛnbèle fúnyo sɛʔɛ ni cángi lè, woro wi Pìicǎnni sɔ̀ngurɔ cángi, níì cán li i nyɛ́ɛri Kolocɔlɔɔ syɛɛncanbèle kéele na n yɛlɛ ní wi kínidɛnɛgi ní.
28Wolo n gi cán Kolocɔlɔɔ i kérigèle myɛ pínɛ ni sámagi ke i nyɔɔgi bele má be tàmaga le ní woro ní lè, poro bele wi nyɛ́nɛ n wòlo lè n yɛlɛ ní wi kakɔrirɔli ní. 29Níì cán bele Kolocɔlɔɔ da téè nyɛ́nɛ n wòlo lè booma ni, wi maa wɔ́ɔ̀ gi kɔ̀rirɔ bi bele bee kàriga pe woro Jáaw wíri, koro ga pye woro Jáaw í pye pìiseliw senyɛn-nɛʔɛmi nínge ni. 30Bele kéele wi da kɔ̀rirɔ n tímana lè, a wi bele bee yeri. Bele si wi yeri lè, a wi wɔ́ɔ̀ sínni kaan be ma, bele má wi sínni kaan lè, a wi wɔ́ɔ̀ nìjangbɔɔri taʔa be na.
Kolocɔlɔɔ tàmagi kpɔ́ʔɔganma
31Ki si i lè nya, nyàʔá wolo a joo kérigèle bee na? Amɛɛ Kolocɔlɔɔ nyɛ ní wolo ní lè, wìí wi a ní gbǎn yìri wolo kurugo? 32Alí wi ga cée wi tiimaa Jáaw na í, wi n wi kaan wolo myɛ kéeli na, àmɛɛ si wi wi kaan lè, wi a wɔ́ɔ yáriri myɛ kaan wolo ma ní fundaanra ní bi fàra wi na ì? 33Wìí wi a gbǎn kolomɔ kaan Kolocɔlɔɔ wonyɛnɛ-wòlobèle ma? Níì cán Kolocɔlɔɔ wi nyɛ sínni kaanfɔlɔ. 34Ba wìí wi a kálagili kútii kúun be na? Níì cán Kirisi Zyezu wi kùu. Koro yagana si ban í, ncan wi n nyán n pye sìi na, ní sáà tɛ́ɛn Kolocɔlɔɔ kàliige ma, ní i nyɛ́ɛri wolo kéeli na! 35Nyàʔá ki a gbǎn wolo láʔa Kirisi tàmagi na? Wɔʔɔgi láà, koro ga jáa funjurugori, wàlá kagbanyi, wàlá kateekpɔɔgi, wàlá fóomi, wàlá fyáari kèlē, wàlá ŋɔséew? 36#Ŋún 44:23 Amɛɛ gi sɛ́bɛ lè níì jo:
«Mɔ kéeli na pe wolo kúu làla o làla cângwɔɔmɔ.
Pe n wolo córo mɔ a jo bàala bɛɛ bele be kɔnɔgi lè.»
37Kàjáa wolo si n gbàn n yáriri bee myɛ jáa wi bárigaw ni woro wee wi tàmaga le ní wolo ní lè. 38Mii n gi fílige n cán ncan kùúw yoo, sìíw yoo, nyɛ̀ʔɛni tundunbéle yoo, màdebèle yoo, níjanʔa yáriri yoo, nyɛ̀ʔɛna wóri yoo, séekpoloyi yoo, 39ǹjoʔo ma fǎnyi yoo, táàma wóyi yoo, wàlá Kolocɔlɔɔ yakpéʔelegaa faala a gbǎn fànʔa taa bi wolo láʔa Kolocɔlɔɔ tàmagi na í, gee wolo taa lè wolo Kàfɔw Kirisi Zyezu bárigaw ni.
Currently Selected:
Wɔrɔmi ye 8: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
