Filipikaʔa ye 1
1
Fòów kéele
1 #
Kap 16:12
Mii Pɔli ní Timɔte wo nyɛ lè Kirisi Zyezu púlobèle, wolo a sɛ́bɛw naa tórigo yele ma, yele bele myɛ ye nyɛ lè Kolocɔlɔɔ syɛɛncanbèle Kirisi Zyezu ni, Filipikaʔa ni n fàra yele yɛɛ̀kinibèle ní yele dyakiribèle na. 2Ki n yɛlɛ wolo Tóow Kolocɔlɔɔ ní Kàfɔw Zyezu Kirisi í kpɔ́ʔɔri ní fûnnyingi kaan yele ma!
Pɔli i nyɛ́ɛri Filipikaʔa tágafɔbèle kéele na
3Mii ga tɛ́nɛ̀ sɔ̀ngi n taa yele kéeli na lǎlee myɛ ni lè, mii n fala n bariga kaan mii Kolocɔlɔw ma lǎli bee ni. 4Mii i nyɛ́ɛri làla o làla ní fundaanra ní mii nyɛ́ɛriyi myɛ ni yele myɛ kéeli na, 5àmɛɛ yele pínɛ ní mii ní lè Syɛɛnjóocǎnri joolo fáli na, nlaa ki cânzeligi na fwɔɔ n baa nan níjanʔa na. 6Mii n tɔ̀nɔ n tága gee naa na ncan wee wi falicanw séli lè yele fúnyi ni, wee bee wi a ra wi forogi bi taa sa nan Kirisi Zyezu cángi na. 7Sɔ̀nguri bee n yɛlɛ mii í di sɔ̀ngi yele myɛ kéeli na, níì cán yele kéeli i nyɛ mii fúngi ni, á yele myɛ yele lɛɛli taa kpɔ́ʔɔri ni ní mii ní n mii yaʔa naa kàsokpaagi ni, ní wɔ́ɔ̀ yele lɛɛli taa kpɔ́ʔɔri ni ní mii ní àmɛɛ mii Syɛɛnjóocǎnri tèé lè níì jo ti i nyɛ kányɛʔɛ, ní wɔ́ɔ i nyɛ báriga syɛ́ɛnrɛ. 8Kolocɔlɔɔ i nyɛ mii séera ncan yele myɛ láagi i nyɛ mii na Kirisi Zyezu tàmagi ni.
9Gee mii nyɛ́ɛri lè, koro gi gee naa, ki n yɛlɛ kàa í sèʔé ra taari yele tàmagi na kaa kpɔ́ʔɔgi gbanʔama kérigèle cánna ní sícilimi myɛ ni, 10koro ga pye yele í gbǎn ra kérigèle sɛʔɛ da cángi gele ge nyɔɔ lè, jàngó yele í ba pye kányɛɛgi fɔ̀ɔlɔ ní kajoolo fun syɛɛnnɛ Kirisi cángi na, 11Zyezu Kirisi si yele fúnyi nyìn kasinbyeri na, koro ga pye nìjanri ní kpɔ́ʔɔri sáā taari Kolocɔlɔɔ na.
Kirisi wi nyɛ sìíw
12Ni senyɛ̀nnɛ, mii i caa yele í gi cán bi cán kérigèle gele ge kpéʔele mii na lè, gele bee n gi kaan a Syɛɛnjóocǎnri kári yɛʔɛ ma n sɔ̀lɔ. 13#Kap 28:30 Kánmi bee na fànʔafɔw kpaàwelebéle ní wozanbèle myɛ baa gi cán ncan Kirisi kéeli na pe mii le kàsow ni. 14Senyɛnbèle be nyɛ lè Kàfɔw ni, mii kàsoleri di pye sábabu, á bele bee saamaw i nànzorodo kpéʔele gbanʔama níì soro ni Kolocɔlɔɔ syɛ́ɛnri nyuu fyáara fun.
15Pèle i Kirisi kéeli nyuu nyabɛɛnni ní kàsiiw kánma na, koro i nyɛ kányɛʔɛ, kàjáa pèle wɔ́ɔ i di nyuu ní funjànya ní. 16Bele bee i gi kpéʔele tàmagi báriga ni àmɛɛ pe gi cán lè ncan Kolocɔlɔɔ n mii nyɛ́nɛ n wòlo koro ga pye mii í da gi tèé ncan Syɛɛnjóocǎnri i nyɛ kányɛʔɛ, 17bele si be Kirisi kéeli nyuu lè kàsiiw kánma na, bele bee o di nyuu ní funviire ní í. Pe i sɔ̀ngí bi wɔʔɔlaa fàra mii kàsoleri na.
18Gee bee si i nyɛ nyàʔá? Kanma o kanma na pe Kirisi kéeli nyuu lè, àlí ti jooli nyúngo ga pye pèle ma jànvaa yoo, ní si i nyɛ pèle ma kányɛʔɛ yoo, mii i fundaanra kpéʔele gee bee na. Mii si a sèʔé ra di kpéʔele làla o làla. 19Níì cán mii n gi cán gee naa myɛ kàdoʔo a ba pye mii syɔɔli sábabu yele nyɛ́ɛrigi báriga ni n fàra Zyezu Kirisi Pǐli dɛ̀ɛmɛnɛ na. 20N yɛlɛ ní gee ní mii sige lè ní fundaanra ní, ní gee gi nyɛ lè mii sɔ̀ngumi tɛɛtaʔaga, fɛ̀ɛrɛ a tɔ̀nɔ́ ba mii taa keelaa faala na í. Kàjáa mii ga pye sìi na yoo, a mii náà kùu yoo, mii i nànzorodo kpéʔele koro ga pye Kirisi í kpɔʔɔrɔ taa mii céri ni tɔ́ɔliw ni àmɛɛ ki da tée ni kpéʔele lè làrigèle myɛ ni. 21Níì cán mii má, mii ga pye sìi na, Kirisi wii, mii si ga kùu, koro i nyɛ mii ma ní tɔ̀nɔ ní. 22Kàjáa mii ga kòro sìi na céri ni, kàa mii a ní da fàrá mii falicanw na. Koro na gee mii a nyɛ́nɛ wòlo lè, mii ga gi cán í. 23Yi tɛ́ɛyi siin i mii kíle, mii i caa bi kári sa pye ní Kirisi ní, gee bee gi pɔ́rɔ n sɔ̀lɔ. 24Kàjáa ŋàʔanaga gii, fwɔɔ mii í kòro sìi na céri ni yele kéeli na. 25Amɛɛ mii tága lè gee bee na, mii n gi cán ncan mii a kòro sìi na, si pye ní yele myɛ ní koro ga pye yele í da syée yɛʔɛ̀ ma ní fundaanra ní, tágali ni, 26koro ga pye mii ga lúru n kári yaà yele ma, yele í da nyɔ̌ngbɔɔlɔ táanri Kirisi Zyezu kólogi ni mii kéeli na.
27Gee nibin gi nyɛ gi ni lè, koro gi nyɛ yaa táanri yaa yɛlɛgi ní Kirisi Syɛɛnjóocǎnri ní, koro ga pye mii ga kári yaà sa yele wéle yoo, a mii náà kòro sìngári ni yaà yoo, mii í yele kéeli lóʔo pe jo yele i yaà n kòro pìle nibin ni, níì pínɛ ni kapɛɛnni kpúmɔn ní fungo nibin ní tágali kéele na li lè Syɛɛnjóocǎnri wólo, 28mii í wɔ́ɔ gi lóʔo bele be túngu ní yele ní lè, yele o fɛ̀ɛgí be na kanmaa faala na í. Ki a pye be ma pe kálagili fɛ̀ɛ, si pye yele syɔɔli fɛ̀ɛ, gee bee n yìri Kolocɔlɔɔ ma. 29Níì cán Kolocɔlɔɔ n yele kpɔ́ʔɔ Kirisi kéeli na jàngó yele a kɔ́ tága wi na yagana í, fwɔɔ yele í wɔ́ɔ ra wɔʔɔ wi kéeli na. 30#Kap 16:19-40 Kapɛɛnni wonijanna yele kpúmɔn, lee yele da mii nyaa mii i kpúmɔn lè, níì gi lóʔo mii sèʔé i nyɛ li na fwɔɔ n baa nan níjanʔa na.
Currently Selected:
Filipikaʔa ye 1: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
