Mariki 15

Pe n baa Zyezu yérige Pilati yɛ́ʔɛ ma

(Mat 27:1-2,11-14; Luk 23:1-5; Zyan 18:28-38)

1A nyǐngi ga tali, a sáriga-wòlobèle kàfɔɔlɔ, ní wolɛɛbèle, ní làlwaw sɛ́bɛwelebéle ní Sanedirɛnw myɛ kpóʔoro n joo n bɛ̀ɛ, níì Zyezu pwɔɔ n kári n sáà kaan Pilati ma. 2A Pilati wi yíbe níì jo: «Mɔ lé wi nyɛ Zyefubèle fànʔafɔlɔ?» A Zyezu wi yari: «Ɛɛn, mii wii.»

3A sáriga-wòlobèle kàfɔɔlɔ kèlē saʔa joo n taʔa wi na. 4A Pilati níì wi yíbe níì jo: «Mɔ ga keelaa taa bi joo wii ì? Wéle, àmɛɛ be kèlē saʔa nyuu ni taari mɔ na lè.» 5Zyezu si ga yarigaa faala joo í. A Pilati i káama gi na.

Pe n Zyezu kpóoli kútii ceri

(Mat 27:15-26; Luk 23:13-25; Zyan 18:39—19:16)

6Ki si maa pye kalɛɛlɛ, sériw canʔa ga baa nan, á syɛ́ɛnbèle sáà kàsolewee nyɛ́ɛri Pilati ma lè, wi n wee bee yirige n yaʔa. 7Nànwaa maa pye kàsow ni ní wi niceenyɛnbèle ní, pe i wi yiri Barabasi. Pe maa syɔɔn kpóo be céemi báriga ni. 8A syɛ́ɛnmi kári Pilati ma n sáà wi nyɛ́ɛri níì jo, gee wi tàli ni kpéʔele lè, wi gee bee kpéʔele poro ma. 9A Pilati be pye: «Zyefubèle fànʔafɔlɔ lé yele caa mii í yaʔa yele ma?»

10Níì cán Pilati maa gi cán nyabɛɛnni kéele na sáriga-wòlobèle kàfɔɔlɔ baa Zyezu kaan woro ma. 11A sáriga-wòlobèle kàfɔɔlɔ syɛ́ɛnmi sɔ́ɔn jàngó Pilati í Barabasi yirige yaʔa poro ma Zyezu sìndɛɛgi ni. 12A Pilati níì be pye: «Mɛ̀ɛ́ si yele jo mii í nǎnw naa pye, wee yele yiri lè Zyefubèle fànʔafɔlɔ?» 13A be yákpogèle wáa níì jo: «Wi kóri tiiparigi na.» 14A Pilati be pye: «Nyàʔá kapee-félile wi kpéʔele?» A be níì yákpogèle wáa gbanʔama níì jo: «Wi kóri tiiparigi na.» 15Pilati maa ni caa bi syɛ́ɛnmi kanidaanna kpéʔele, gee bee na wi Barabasi yirige n yaʔa be ma a wi kári, níì Zyezu kpúmɔn ní sapile ní, ní náà wi kaan be ma pe sa wi kóri tiiparigi na.

Sùlasiibèle n peyɛɛ nyɛ́nɛ Zyezu na

(Mat 27:27-31; Zyan 19:2-3)

16A sùlasiibèle wi kɔ́ri n sáà jée kàcooli fúngo ni fànʔafɔw tɛɛkòrogo ni, níì be sùlasiinyɛnbèle myɛ#15:16 sùlasiinyɛnbèle myɛ: Sùlasiibèle bee myɛ bìnɛw maa pye saala taanri. yeri n kpóʔoro. 17A be sáà burogbɔɔ-nyɛ̀nʔɛ le wi na, níì wúuro mígele di pye fànʔafɔ-ǹdɔnnɔ n tɔ́n wi na, 18níì fala ni wi syáanri níì jo: «Mɔ o faana, Zyefubèle fànʔafɔlɔ.» 19Ní i wi kpúmɔn nyǔngi ni ní kàgaanna ní, ní i tɛ́ɛri wáa wi na, ní ba ni yégunri cáan ní i tíri ni tuun wi yɛʔɛ̀ ma. 20Lǎli ni be peyɛɛ nyɛ́nɛ n kwɔ́ɔ wi na lè, a be burogbɔɔ-nyɛ̀ɛ́ngi wòlo wi na, níì wi tiimaa búroyi le wi na, níì wi kɔ́ri ni syée bi sa kóri tiiparigi na.

Zyezu kórili kéele tiiparigi na

(Mat 27:32-44; Luk 23:26-43; Zyan 19:17-27)

21 # Wɔr 16:13 A pe ga ni syée n sáà fàra ní nànwaa ní, a wi yìri seʔe ma, pe maa ni wi yiri Siimɔn, Sirɛni tári wówaa wi da pye. Alɛkisandiri ní Wurufusi ye tóow wi da pye, a be wi kɔ́ri, a wi Zyezu tiiparigi tugo. 22A be kári ní Zyezu ní tɛ́ɛgi ma be yiri lè Gɔligota, ki kɔ́rɔw wi nyɛ Nyùngbokɔrigɔ tɛ́ɛgi. 23A be sáà míiri nyáʔami dùvɛɛn ni n kaan Zyezu ma wi gbaa. Wi si ga fɔ̀lɔ n wi gbaa í.

24 # Ŋún 22:19 A be fala n wi kóri tiiparigi na, níì wi yaleri lɛɛ ní gɔ̌nwáara ní jàngó pe myɛ í be lɛɛgéle cán. 25Lǎli ni pe wi kóri tiiparigi na lè, cángi maa nan dɔnwolomɔ na. 26A be wi kpóoli nyúngo sɛ́bɛ n táriga tiiparigi na wi ǹjogi ni a gi jo: ZYEFUBELE FANʔAFƆLƆ. 27A be kàyuu-fànʔafɔɔlɔ siin kóri tiipariyaa na wi taana, wàa maa pye wi kàliige ma wee si i nyɛ wi kàmɔnɔ ma. 28#Eza 53:12 [Kánmi bee na Kolocɔlɔɔ syɛɛnsɛbɛri foro, àmɛɛ ki da sɛ́bɛ lè níì jo: «Pe n wi córo kapeebyebèle nínge ni.»]

29 # Ŋún 22:8; Ŋún 109:25; Mar 14:58; Zyan 2:19 A kozɔ̀lɔbèle i wi teeri ní i nyǔnyi kólo níì jo: «Cɔ́ɔ! Mɔ wee wi jo lè mɔ a kpɔ̀ʔɔrɔli kpaʔa cáan si ní gi faan canya taanri nínge ni, 30mi miyɛɛ zyɔɔ mi tìgi tiiparigi na.»

31A sáriga-wòlobèle kàfɔɔlɔ ní làlwaw sɛ́bɛwelebéle wɔ́ɔ i peyɛɛ nyɛ́nɛ wi na, ní i gi nyuu peyɛɛ ma níì jo: «Wi n pèle nikwɔɔlɔ syɔɔ, woro tiimaa si a gbǎn wiyɛɛ zyɔɔ í. 32Ye Kirisi pye wi tìgi tiiparigi na wo wi nyaa, wi lè Isirayɛli fànʔafɔw, koro ga pye wolo í tága wi na.» Bele pe da kóri wi taana lè, a poro wɔ́ɔ i wi teeri.

Zyezu kùúw kéele

(Mat 27:45-56; Luk 23:44-49; Zyan 19:28-30)

33Lǎli ni cángi tɛ́ɛn lè nyùngo ni, a tári myɛ kàri yébilimɛ fwɔɔ n taa n baa nan cangàrigi na.#15:33 cangàrigi na: Gee bee n jo, ki n séli midiw na n baa nan turuwazɛɛriw na. 34#Ŋún 22:2 Lǎli bee ni a Zyezu yákpogbɔɔlɔ wáa níì jo: «Elowi, Elowi, lama sabatani?» Ki kɔ́rɔw wi nyɛ, «Mii Kolocɔlɔɔ, mii Kolocɔlɔɔ, nyàʔá na mɔ mii yaʔa?» 35Syɛ́ɛnbèle bele be pye yaà lè woyérebéle ní, a bele bee pèle gi lóʔo níì jo: «Wéle, wi i yaà ni Elii yiri.» 36#Ŋún 69:22 A wàa fàn n sáà cétɛɛ fɔɔn vinɛgiri ni, níì wi nɔɔri kàgaanna na n baa kaan wi ma wi gbaa, níì jo: «Ye tíi waa wi wéle kapye Elii a pan ba wi tìrige.»

37A Zyezu yákpoli wáa gbanʔama níì kùu.

38 # Yir 26:31-33 Fàniw pe da pari lè kpɔ̀ʔɔrɔli kpaʔa fúngo ni, a wi yabi siin nlaa ǹjoʔo ma n tìgi táàma.

39Sùlasiibèle dabata kàrigafɔlɔ wi pye yaà lè woyéreo ní Zyezu zǐnmi na, a wi ga wi nyaa a wi kùu kùuganmi bee na, a wi jo: «Kányɛʔɛ na, nǎnw naa maa tɔ̀nɔ n pye Kolocɔlɔɔ Jáa.»

40 # Luk 8:2-3 Cébèle pèle maa wɔ́ɔ̀ canʔana n yére léelige ní i wéle yaà. Poro pèle pe da pye Marii, Magidala ye wów, ní Zyakipile ní Zyozi ye nɔ́ɔw Marii ní, n fàra Salomɛ na. 41Lǎli ni Zyezu pye lè Galile ma, cébèle bee maa taʔa wi na ni wi fáliw kpéʔele. Cébèle pèle saʔa maa wɔ́ɔ̀ pye yaà, bele pe da pínɛ n kári Zyerusalɛmi ma ní wi ní lè.

Zyezu leli kéele nyángi ni

(Mat 27:57-61; Luk 23:50-56; Zyan 19:38-42)

42Lǎli ni cángi jée lè kavɔn, koro n gi taa ki maa pye sériw sámaga-yaʔala canʔa gee bee n jo cángi bee nyǐndaliga a pye cândɛnɛgi canʔa. 43A Arimate ye Zyozɛfu wi nyúngi waʔa níì kári Pilati ma n sáà Zyezu kúceri nyɛ́ɛri wi ma. Wi maa pye kútiijoobèle gboolo wogbɔɔwaa, ní wɔ́ɔ i Kolocɔlɔɔ fǎngi sige. 44Amɛɛ Pilati gi lóʔo lè Zyezu n kùu kelekele nya, a wi i káama gi na, níì wi sùlasiibèle dabata kàrigafɔlɔ yeri n baa yíbe kapye wi n kùu booma ni. 45Lǎli ni wi Zyezu kùúw kéele fílige n cán sùlasiibèle dabata kàrigafɔlɔ ma lè, a wi Zyezu kúceri kaan Zyozɛfu ma. 46A wi sáà fànicàɔn syɔɔ, ní baa Zyezu tìrige tiiparigi na, níì wi pwɔɔ ní fàniw bee ní, níì wi láa n sáà le nyángi ni, gee pe da túgu fálaga na lè, koro kàdoʔo ma a wi kàdɛnɛgbɔʔɔ kòlogo n baa tɔ́n nyanweeli na. 47Marii wi lè Magidala ye wów, n fàra Marii na wi lè Zyozi nɔ́ɔw, poro maa pye yaà, a be gi wéle beè pe a wi sínɛgɛ lè.

Currently Selected:

Mariki 15: CB10

Highlight

Copy

Compare