Mariki 1

Zyan Batisiti syɛɛnjóori

1Kolocɔlɔɔ Jáaw wi nyɛ lè Zyezu Kirisi Syɛɛnjóocǎnri di joo lè wi kéeli na, di sélimi bi nyɛ bee naa. 2#Mal 3:1 Kanyaajoow Ezayi maa gi sɛ́bɛ níì jo:

«Kolocɔlɔɔ n jo:

‹Wéle, mii n mii tundunw tórigo mɔ yɛ́ʔɛ ma,

wee wi a sa mɔ kólogi sámaga lè.

3 # Eza 40:3 Woro wi yákpoli wáa fìími tára ni níì jo:

Yaa Kàfɔw kólogo sámagi yáā wi kozɔ̀lɔyi síngi.› »

4Tundunw bee wi nyɛ Zyan, wee wi da pan lè n ba ni syɛ́ɛnbèle batize fìími tára ni, ní i gi nyuu syɛ́ɛnbèle ma àmɛɛ gi yɛlɛ lè be kàdoʔo wáa be kapeegèle ma si batize, koro ga pye Kolocɔlɔɔ í be kùsulugi syɔɔ. 5A Zyude tári wòolo ní Zyerusalɛmi kěgi wòolo myɛ i yirigi ni syée wi ma. A wi sa ni be batize Zyuridɛnw cábiga ni. Pe si maa ni yèré be kapeegèle ni. 6#2Fàn 1:8 Zyan búrogi maa pye a be gi tìin ní fàlibaʔa síire ní, á wi saliga sɛntiiri tɛ́ʔɛ n wiyɛɛ bwɔɔ sárigèle ni. Wi yaliiri ti da pye kúdow ní tiiweeyi sárigā. 7A wi i gi nyuu níì jo: «Wàa i maa mii kàdoʔo ma, wi séew n kpɔ́ʔɔ n sɔ̀lɔ mii wów na. Alí mii ga caa wɔ́ɔ̀ nyɔɔ n yɛlɛ mii í lɛ̀ɛlɛ bi wi taʔalayi mɛ́ɛngéle sánʔana í. 8Mii n yele batize lǒgi ni, woro si a ba yele batize Pìicǎnni ni.»

Zyezu batɛmiw ní wi kárimani kéele

(Mat 3:13—4:11; Luk 3:21-22; 4:1-13)

9Lǎli bee ni a Zyezu yìri Nazarɛti ma Galile tári ni n kári Zyan ma, a wi sáà wi batize Zyuridɛnw ni. 10Lǎli ni Zyezu yirigi lǒgi ni lè terire, a wi nyɛ̀ʔɛni nyaa li i múru níì Kolocɔlɔɔ Pǐli nyaa li i tíri ni maa wi ma àmɛɛ kàtolo nyɛ lè. 11#Sél 22:2; Ŋún 2:7; Eza 42:1; Mat 3:17; 12:18; Mar 9:7; Luk 3:22 A wi yákpolo lóʔo nyɛ̀ʔɛni na, a li jo: «Mɔ wi nyɛ mii Pìinidaanmaw, mɔ kéeli n mii dɛ́nɛ gbanʔama.»

12Lǎli bee ni a Kolocɔlɔɔ Pǐli fala n wi kɔ́ri n tórigo fìími tára ni. 13A wi sáà canya togoye siin kwɔ́ɔ fìími tára ni, a Sutanaw sa ni wi kárima ni wéle. Wi maa pye sìnbirigi yaweere nínge ni, nyɛ̀ʔɛni tundunbéle si maa ni wi dɛ̀ɛmɛ́.

Zyezu n cɔ̀ɔwáabéle sicɛrɛ yeri

(Mat 4:12-22; Luk 4:12-15; 5:1-11)

14Lǎli ni pe Zyan le kàsow ni lè, a Zyezu kári Galile tári ma n sa ni Kolocɔlɔɔ Syɛɛnjóocǎnri nyuu yaà 15#Mat 3:2 níì jo: «Lǎli n foro, a Kolocɔlɔɔ fǎngi nùuni. Ye kàdoʔo wáa yele kapeegèle ma, yé tága Syɛɛnjóocǎnri na.»

16A wi ga ni sɔ̀lɔ́ Galile lòkpɔɔgi nyɔ́ɔ na, a wi Siimɔn ní wi cɔnɔw Andire nyaa pe i cɔ̀ɔ wáa lòkpɔɔgi ni, ncan pe maa pye cɔ̀ɔwáabéle. 17A Zyezu be pye: «Ye taʔa mii na. Amɛɛ yele cɔ̀ɔ́w wáa ni fábèle taagi lè, ànbée mii a wɔ́ɔ yele kpéʔele yele í da syɛ́ɛnbèle taagi.» 18A be fala n be cɔ̀ɔ́bèle yaʔa níì taʔa wi na.

19A wi ga sɛ̀ʔɛrɛ yɛʔɛ̀ ma cɛɛri, a wi Zebede jáaw nyaa wi lè Zyaki, woro ní wi cɔnɔw Zyan. Pe maa pye kɔ́rɔw ni ni be cɔ̀ɔ́bèle sámagi. 20A wi fala n poro yeri. A be be tóow Zebede ní falipyebèle yaʔa kɔ́rɔw ni, níì taʔa wi na.

Nǎnwee màdeo da ni kàragí lè

(Luk 4:31-37)

21A be kári Kapɛrinayumi ma. A cândɛnɛgi* canʔa ga nan, a Zyezu sáà jée Zyefubèle sérikpaʔa ni ni syɛ́ɛnbèle tama. 22#Mat 7:28-29 A be i káama wi tamani na níì cán wi maa ni be tama ní séew ní. Wi tamani da pye àmɛɛ làlwaw sɛ́bɛwelebéle wólo nyɛ lè í.

23Nànwaa si maa pye yaà be sérikpaagi ni, màdeo maa pye wi ni, a wi yákpoli wáa 24níì jo: «Nyàʔá gi nyɛ wolo ní mɔ níngi ni, mɔ Zyezu, Nazarɛti ye wów? A mɔ pan lé ba wolo kálagi wii láà? Mii n mɔ cán, mɔ wi nyɛ Kolocɔlɔɔ syɛɛncanw.»

25A Zyezu fúlo màdew na níì wi pye: «Nyɔ́ɔgi tɔ́n, mí yiri nǎnw bee ni.» 26A màdew nǎnw bee cáan wi i kirigi, níì yákpogbɔɔlɔ wáa níì yiri wi ni. 27A pe myɛ i káama gi na ní i gi nyuu peyɛɛ ma níì jo: «Nyàʔá gi nyɛ gee naa? Nyàʔá tamavɔnnɔ li lee naa? Ncan fànʔa i nyɛ li ni. Alí wi n màdebèle jáa, a be i lúro wi ma.» 28A wi mɛ́ɛgi fala n yiri Galile tári tɛ́ɛyɛ myɛ ni.

Zyezu n yaabèlē saʔa pɔʔɔ

(Mat 8:14-17; Luk 4:38-41)

29A pe ga yiri sérikpaagi ni terire, a be sáà jée Siimɔn ní Andire ye kpáagi ni, Zyaki ní Zyan si maa pye ní be ní. 30Siimɔn céw nɔ́ɔ maa pye wozinɛɔ ní, níì cán cefuuro maa pye wi na. A be fala n wi kéeli joo Zyezu ma. 31A wi nùuni wi na n sáà wi cò kɔ́gi na n yìrige, a cefuuri láʔa wi na. A wi yìri ni kpéʔele be ma.

32A ki ga pye cângwɔɔgi nyɔ́ɔ na, lǎli ni cángi jée lè, a be i yáabèle myɛ lée ni maa wi ma, n náà fàra màdebèle fɔ̀ɔlɔ na. 33A kěgi syɛ̀ɛnnɛ myɛ peyɛɛ gbóʔoro n baa kpoʔolo kpaaweeli nyɔ́ɔ na. 34A wi yáami féleye syɛɛnnɛ saʔa pɔʔɔ, ní wɔ́ɔ̀ màdebèle nɛnɛ n yirige syɛ̀ɛnnɛ saʔa ni. Wi si da fɔ̀lɔ màdebèle í ní da nyuu í, ncan pe maa wi cán.

Zyezu n Galile tári nyaari n foro

(Luk 4:42-44)

35A wi sɔ̀li n yìri nyǐnjerigi na n kári fìími tára tɛ́ɛgaa ni n sa ni nyɛ́ɛri yaà. 36A Siimɔn ní wi pínɛnyɛnbèle kári n sa ni Zyezu caa. 37Lǎli ni be wi caa n nyaa lè a be wi pye: «Syɛ́ɛnbèle myɛ i yaà ni mɔ caa.» 38A wi be yari: «Ye bo waa syée wolo taana kěyi ma, koro ga pye mii í wɔ́ɔ sa joo nɛɛ bee, níì cán gee bee gi nyɛ mii kapanni nyúngo.» 39#Mat 4:23; 9:35 A wi kári Galile tári tɛ́ɛyɛ myɛ ni n sa ni Kolocɔlɔɔ syɛ́ɛnri nyuu Zyefubèle sérikpaaya ni, ní wɔ́ɔ i màdebèle nɛnɛ ni yirigi syɛ́ɛnbèle ni.

Zyezu n yaanyɛɛnmɛfɔlɔ pɔʔɔ

(Mat 8:1-4; Luk 5:12-16)

40A yaanyɛɛnmɛfɔlɔ pan wi ma n baa kpùmɔnɔ wi taana, níì wi nyɛ́ɛri níì jo: «Mɔ ga fɔ̀lɔ mɔ a gbǎn mii kàriga wojaɔn ní.» 41A Zyezu nyinimɛ taa wi na níì wi kɔ́gi sánʔa n tánga wi na níì jo: «Mii n fɔ̀lɔ, pɔʔɔ mi nyɔɔ.» 42A yaanyɛɛnmi fala n láʔa wi na terire, a wi kàri wojaɔn ní. 43Lǎli bee wonijanna ni a Zyezu gi joo n gbàn wi ma níì wi yaʔa waa syée, 44#Lev 14:1-32 níì wi pye: «Mɔ a kɔ́ gi joo syɔɔn ma í. Kàjáa da syée mi sa miyɛɛ dɛ̀ɛn sáriga-wòlow na, mí sárigaw wòlo mɔ jéemununi kéele na, wee kéele Mowizi da joo lè, jàngó gee bee í pye be ma séera.»

45Kàjáa a nǎnw bee sèʔé sa ni gi nyuu ni yákpoli wáa, a koro gi kaan Zyezu ga gbàn n níì jée kègaa ni syɔɔn nyɛ́nɛ na í, fwɔɔ a wi i kòró fìími tára tɛ́ɛyɛ ni, beè gi nyɛ lè syɔɔn o yaà í. A syɛ́ɛnbèle i yìrigí kàbanyi myɛ na ni syée wi ma.

Currently Selected:

Mariki 1: CB10

Highlight

Copy

Compare