Matye 20
20
Falipyebèle be lè ɛrɛzɛn ségi ni
1«Nyɛ̀ʔɛni fànʔa i nyɛ àmɛɛ kàcoolofɔlɔ nyɛ lè, wee wi yiri lè nyǐngi nyɔ́ɔ na pɛ́ɛn pɛ́ɛn bi sa falipyebèlē caa tórigo wi ɛrɛzɛn ségi ma. 2Wi si maa bɛ̀ɛ ní falipyebèle ní toko toko na cángi sàra, níì be tórigo wi ɛrɛzɛn ségi ma. 3A wi ga níì yiri dɔnwolo lǎli#20:3 dɔnwolo-lǎli: Mɔ ga lóʔo dɔnwolo-lǎli nɛvɛɛriw na be nyɛ. ni, a wi pèle nikwɔɔlɔ nyaa woyérebéle ní cédaali na fali fun. 4A wi be pye: ‹Ye wɔ́ɔ yaa syée mii ɛrɛzɛn ségi ma. Kánmee mii yɛlɛ bi kaan yele ma lè, mii a bi kaan yele ma.› A be kári. 5A wi ga níì yiri cânvulɛɛli ní cangàrigi na, a wi gi pye sèjira. 6A wi níì yiri tèfalabèle gbaa ziin làla#20:6 tèfalabèle gbaa ziin làla: Mɔ ga lóʔo tèfalabèle gbaa ziin làla cângwɔɔgi nyɔ́ɔ katirɛri na be nyɛ. ni, n níì pèle nikwɔɔlɔ nyaa woyérebéle ní. A wi be pye: ‹Nyàʔá na yele yére nɛɛ naa n cángi kwɔ́ɔ fali fun?› 7A be wi yari: ‹Ncan syɔɔn faala ga wolo láa fali na í.› A wi be pye: ‹Ye wɔ́ɔ yaa syée mii ɛrɛzɛn ségi ma.›
8 #
Lev 19:13; Làlw 24:15 A cángi ga jée, a ɛrɛzɛn ségi fɔ́lɔ gi joo wi nìgwɔɔw ma níì jo: ‹Mi falipyebèle yeri mi ba sàra. Mi gi séli kàdotɔnbèle na bi taa ba nan wozelibèle na.› 9A gbaa ziinw làla wòolo ga pan, a be taa toko toko. 10A wozelibèle ga pan, a be i gi sɔ̀ngí poro a saʔa taa bi sɔ̀lɔ bele na. Kàjáa a be wɔ́ɔ̀ taa toko toko. 11A pe ga wáliw syɔɔ n kwɔ́ɔ, a be i kàcooli fɔ́lɔ sànʔá, 12níì jo: ‹Kàdotɔnbèle naa n lɛ́ɛri nibin yagana báara, á mɔ baa be córo ní wolo ní sèjira, wolo bele wo cángi fɔ̀rɔgɔ ní gi káfugi kpàraco lè.› 13Kàjáa a wi poro wàa pye: ‹Ni tàannyɛnnɛ, mii ga kolo mɔ ma í. Toko na ban wo da bɛ̀ɛ mii ní mɔ ní ì? 14Mɔ saraw láa maa syée, mii a wɔ́ɔ kàdotɔnw naa kaan ní mɔ ní sèjira. 15Gee gi mii dɛ́nɛ lè, koro ban mii yɛlɛ bi kpéʔele ní mii kɔ́lɔ yáriri ní ì? Nyàʔá na mɔ mii kacǎnni córo kapeele?› 16#Mat 19:30; Mar 10:31; Luk 13:30 Kánmi bee na kàdoʔo ma syɛ́ɛnbèle a ba pye yɛʔɛ̀ ma, yɛʔɛ̀ ma wóbèle si ba pye kàdoʔo ma.»
Zyezu n wi kùúw ní wi nyán yirili kéele joo tɔdaanri wógi na
(Mar 10:32-34; Luk 18:31-34)
17A Zyezu ga ni syée Zyerusalɛmi ma, n wi yaʔa kólogi na, a wi wi pìitamabèle kɛɛ ní siin yeri n kàri kɔlɔ̀ na níì be pye: 18«Wéle, wolo i syée bele Zyerusalɛmi ma, pe si a sa Syɔɔn-pya le sáriga-wòlobèle kàfɔɔlɔ ní làlwaw sɛ́bɛwelebéle kɔ́yɔ ni be kútiiw kúun wi na, si jo wi n yɛlɛ ní kùu ní, 19si wi kaan syɛɛnfeleyi ma yi sa ra yiyɛɛ nyɛ́nɛ wi na, si wi kpúmɔn ní sapile ní si wi kóri tiiparigi na. Kàjáa wi si a nyán yiri kúbèle nínge ni candaanri wógi na.»
Zyaki ní Zyan nɔ́ɔw n nyɛ́ɛrigɛ kpéʔele
(Mar 10:35-45)
20Lǎli bee ni a Zebede jáabèle nɔ́ɔ pan Zyezu ma ní wi pìíbèle ní n baa tìgi n too wi taana bi wi nyɛ́ɛri. 21A Zyezu wi pye: «Nyàʔá mɔ caa?» A wi wi yari: «Mi gi yaʔa mii pìíbèle naa siin í tɛ́ɛn mɔ taana, wee í pye mɔ kaliige ma, wee si pye mɔ kamɔnɔ ma mɔ fangi ni.» 22A Zyezu be pye: «Gee yele nyɛ́ɛri lè, yele ga gi cán í. A yele fánʔa i nyɛ lé bi gbǎn gbaa yagbaali ni, lee ni mii a gbaa lè?» A be wi pye: «Wolo fánʔa i nyɛ.» 23A wi be pye: «Yele a gbaa mii yagbaali ni, koro i nyɛ kányɛʔɛ, kàjáa bi tɛ́ɛn mii kàliige ma, wàlá mii kàmɔnɔ ma, gee bee o nyɛ mii kéele mii í gi kaan yele ma í. Ki i nyɛ pèle wóʔo bele kéele na mii Tóow gi sámaga lè.» 24A pìitamabèle bele kɛɛ ga gee bee lóʔo, a be fúnyi tanʔa bele bee siin kurugo. 25#Luk 22:25-26 A Zyezu be yeri ní baa be pye: «Yele n gi cán bele be nyɛ lè syɛɛnfeleyi nyúngo na, pe fǎngi kólogo n gbàn. Yi syɛɛnkpolobèle si i yi kàragí ní be fǎngi ní. 26#Mat 23:11; Mar 9:35; Luk 22:26 Kàjáa ki ga yɛlɛ gi pye ànbée yele níngi ni í. Wee wi ga ni caa lè bi pye yele ni syɛɛnkpɔɔɔ, wee bee n yɛlɛ wi pye yele nìgwɔɔ. 27Wee wi caa lè bi pye yele ni yɛʔɛ̀ ma, wee bee n yɛlɛ wi wiyɛɛ bye yele púlo. 28Kánmi bee na Syɔɔn-pya wɔ́ɔ̀ pan, wi ga pan syɔɔn í ba ra báara wi ma í. Kàjáa wi n pan bi ba ra báara syɛ́ɛnbèle ma si wi sìíw kaan syɛ̀ɛnnɛ saʔa nyunzyɔɔrɔ kéele na.»
Zyezu n fúunbéle siin paʔa
(Mar 10:46-52; Luk 18:35-43)
29A pe ga yiri Zyeriko ni, a syɛɛnnɛʔɛmɛ taʔa Zyezu na. 30Fúunbéle siin si maa pye wodɛ́ɛnbéle ní kólogi nyɔ́ɔ na. A pe ga lóʔo Zyezu wi sɔ̀lɔ́, a be i yákpogèle wáa níì jo: «Kàfɔw, mɔ wi lè Davidi Jáaw, nyinimɛ taa wolo na.» 31A syɛ́ɛnmi i fúlo be na níì jo be pyèri. A be sèʔé i yákpogèle wáa n sɔ̀lɔ wozeligi na níì jo: «Kàfɔw, mɔ wi lè Davidi Jáaw, nyinimɛ taa wolo na.» 32A Zyezu yére níì be yeri ní baa be pye: «Nyàʔá yele caa mii í kpéʔele yele ma?» 33A be wi pye: «Kàfɔw, wolo i caa wolo nyapiigèle í tɛ́nɛ múgu.» 34A be nyínimi Zyezu taa, a wi tánga be nyapiigèle na, a be fala ni nyaagi níì taʔa wi na.
Currently Selected:
Matye 20: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
