Luki 2

Zyezu seeli kéele

(Mat 1:18-25)

1Lǎli bee ni a Sezari Ogusiti tundunro tun wi tári tɛ́ɛyɛ myɛ ni níì jo be syɛ́ɛnbèle myɛ córo. 2Córoli bee wozelile n pye lǎli ni Kirinyusi da ni Sirii tári kàragí lè. 3A pe myɛ i syée be tiimaa kěyi ma be sa poro córo.

4A Zyozɛfu wɔ́ɔ̀ yìri Nazarɛti ma Galile tári ni n kári Davidi kěgi ma ki lè Bɛtilehɛmi Zyude tári ni, níì cán wi i nyɛ Davidi yòdaʔagaa, 5a woro ní wi pìcaaw Marii pínɛ n kári be sa poro córo. Fícɛnni si i nyɛ Marii na. 6Lǎli ni be pye yaà lè, a wi làrizeeli baa nan, 7a wi wi pìiseliw see nàɔn, níì wi mígi ní fàni ní n sínɛgɛ yaweeri yaliire yalege ni,#2:7 yaweeri yaliire yalege ni: Yaweere kpaʔa ni pe da Zyezu see. Yaweeri bee yaliire yalege ni si pe da wi sínɛgɛ. níì cán pe da tɛɛgaa taa nibɔndirige-kpáagi ni í.

Nyɛ̀ʔɛni tundunwaa n wiyɛɛ dɛ̀ɛn bànaʔabèle na

8Bànaʔabèle pèle si maa pye tári bee ni ni be bǎbèle nàʔá ni syɔ̀ɔ́n yaà sìnbirigi ni. 9A Kàfɔw tundunwaa pan n baa yére be taana, a be Kàfɔw nìjangbɔɔrɔ nyaa a di be màʔa ní i nyɛ́ʔɛnɛ. A be fyáa gbanʔama. 10A nyɛ̀ʔɛni tunduɔn be pye: «Yele a kɔ́ ra fɛ̀ɛgí í, níì cán syɛɛntaanra mii a joo yele ma, ti a pye fundaangbɔɔrɔ syɛ́ɛnrɛ yele syɛ́ɛnbèle myɛ ma, 11toro di nyɛ pe n syɔɔfɔlɔ see yele ma níjanʔa Davidi kěgi ni, woro wi nyɛ Kirisi wi lè Kàfɔw. 12Gee naa a pye yele ma fɛ̀ɛ, yele a sa sàánnyɛɛnnɛ nyaa pe li mígi ní fàni ní bi sínɛgɛ yaweeri yaliire yalege ni.»

13Lǎli bee ni a nyɛ̀ʔɛni sùlasii-nɛʔɛmaa pàla n pan n baa fàra tundunw na, a be i Kolocɔlɔɔ kpɔ̀ʔɔrɔ́ níì jo:

14«Kolocɔlɔɔ na kpɔ̀ʔɔrɔli yɛlɛ wi lè ǹjoʔo ma tɛ́ɛyi myɛ ni,

yɛɛ̀nyingi si pye tári na wi syɛɛn-nidaanmabèle ma.»

Bànaʔabèle n kári Bɛtilehɛmi ma

15Lǎli ni tundunbèle núngo bànaʔabèle taana n kári nyɛ̀ʔɛni na lè, a bànaʔabèle gi joo peyɛɛ ma níì jo: «Yaa maa wo kári Bɛtilehɛmi ma, kéelee li kpéʔele yaà á Kàfɔw baa li tɛ̀ɛn wolo na lè, wo sa li wéle.»

16A be i fyàalá ni syée n sáà Marii ní Zyozɛfu nyaa ní sàánnyɛɛnni ní, a be li sínɛgɛ yaweeri yaliire yalege ni. 17A pe ga sáà li nyaa, syɛ́ɛnree nyɛ̀ʔɛni tunduɔn da joo be ma lè pìíw kéele na, a be di joo n tɛ̀ɛn syɛ́ɛnbèle na. 18Bele myɛ be bànaʔabèle syɛ́ɛnrɛ lóʔo lè, a be i káama kéeli bee na. 19Marii si maa kérigèle bee myɛ kɔn wi fúngi ni ní i sɔ̀ngí ge na. 20A bànaʔabèle lúru ni syée ní i Kolocɔlɔɔ mɛ́ɛgi kpɔ́ʔɔgi ní i wi kpɔ̀ʔɔrɔ́ poro kanyaagèle ní poro kaloʔogèle kéele na, níì cán gee myɛ ki da joo be ma lè, ànbée be sáà gi nyaa.

Zyezu mɛ́ɛgi lele kéele

21 # Lev 12:3; Luk 1:31 A canya kɔrɔsiin ga sɔ̀lɔ, kɔrɔtaanri wógi na, a koro pye pìíw kɛ́nɛ canʔa, a be wi mɛ́ɛgi le níì jo paa wi yiri Zyezu, mɛ́ɛgee nyɛ̀ʔɛni tunduɔn da tɛ̀ɛn lè n gi yaʔa wi nɔ́ɔw da kɔ́ɔ̀ wi fícɛnni taa í.

Zyezu tɛ̀ɛ́nni kéele kpɔ̀ʔɔrɔli kpaʔa ni

22 # Lev 12:6-8 Lǎlee ni peyɛɛ zámagali canya baa foro lè n yɛlɛ ní Mowizi làlwaw syɛ́ɛnrɛ ní, a be kári ní pìíw ní Zyerusalɛmi ma sa wi kàlifáa Kàfɔw ma, 23#Yir 12:2,12 àmɛɛ ki da sɛ́bɛ lè Kàfɔw làlwa ni níì jo: «Nànbiiseligèle myɛ n yɛlɛ paa ge córo Kàfɔw wòʔolo.» 24Pe maa wɔ́ɔ̀ kári sa sárigaw wòlo wee kéele li joo lè Kàfɔw làlwa ni níì jo: «Kàtogèlē siin koro ga jáa lòbwɔɔpiigéle siin.»

25Nànwaa si maa pye Zyerusalɛmi ni pe i wi yiri Simeyɔn. Nǎnw bee maa pye syɛɛnsiɔn, ní i fɛ̀ɛgí Kolocɔlɔɔ na, ní wɔ́ɔ i yɛɛ̀nyingi sige, gee Kolocɔlɔɔ da joo wi a ba kaan Isirayɛli ye ma lè. Pìicǎnni si maa ni wi kàragí. 26Pìicǎnni si maa téè gi tɛ̀ɛn wi na n jo, wi a kùu í bi taa wi ba Kirisi nyaa, wi lè Kàfɔw wóo. 27A wi sáà jée kpɔ̀ʔɔrɔli kpaʔa ni Pìicǎnni báriga ni. Lǎli ni Zyezu seefɔbèle baa jée yaà ní wi ní lè bi Mowizi làlwaw kalɛɛlɛ kpéʔele wi na, 28a wi wi syɔɔ n cò wi kɔ́yi ni ní i Kolocɔlɔɔ kpɔ̀ʔɔrɔ́ níì jo:

29«Kàfɔgbɔɔw, mii wee wi lè mɔ púlonǎnw,

tɔ́ɔliw ni mɔ a gbǎn mii yaʔa mii í da syée yɛɛ̀nyinge

na bi yɛlɛ ní mɔ syɛ́ɛnri ní mɔ da joo lè.

30Níì cán mii tiimaa nyapiigèle n mɔ syɔɔli nyaa,

31lee mɔ sámaga lè syɛ́ɛnbèle myɛ nyɛ́nɛ na.

32 # Eza 42:6; 49:6; 52:10 Li a pye gbɛ̀ɛnmɛ bàā kányɛɛgi tèé dulunyanw syɛɛnfeleye na.

Si nìjangbɔɔrɔ kaan mɔ syɛ́ɛnbèle ma be nyɛ lè Isirayɛli ye.»

Simeyɔn kanyaajoori kéele

33Syɛ́ɛnree wi joo lè pìíw kéele na, a wi tóow ní wi nɔ́ɔw i káama di na. 34A Simeyɔn dùbaw kpéʔele be ma níì gi joo Marii ma wi lè pìíw nɔ́ɔ, níì wi pye: «Wéle, Kolocɔlɔɔ n wee naa tɛ́ʔɛ Isirayɛli ye syɛ́ɛnbèle pèle saʔa toolo, ní pèle saʔa yirile kánma na. Wi a ba pye fɛ̀ɛ, wee syɛ́ɛnbèle a ra kábala lè, 35koro ga pye syɛ̀ɛnnɛ saʔa funzɔngurɔ í yiri kàfugi na, mɔ tiimaa si mɔ nyaa lè, kayaagi a ba pye mɔ ni mɔ a jo pe n mɔ súu n fùru ní ŋɔsée ní.»

Kanyaajoocew Ani

36 Kanyaajoocewaa maa wɔ́ɔ̀ pye yaà pe i wi yiri Ani, wi maa pye Fanuwɛli pyà, ní i nyɛ Azɛɛri yòdaʔagaa. Wi maa tɔ̀nɔ n lɛɛ gbanʔama. Pe maa wi pìcaamatɔw kaan nànwaa ma, a wi kòro ní wi ní n taa yɛ̀ʔɛlɛ kɔrɔsiin, 37ní náà pye lɔgucaa n taa a wi baa yɛ̀ʔɛlɛ togoye sicɛrɛ ní sicɛrɛ taa, wi da ni fɔ̀ngí kpɔ̀ʔɔrɔli kpaʔa ni í, níì cán wi maa ni Kolocɔlɔɔ kpɔ̀ʔɔrɔ́ ní súnleri, ní nyɛ́ɛriyi ní canʔa ní yébilige. 38Lǎli bee wonijanna ni a wee bee wɔ́ɔ̀ nan yaà be na, níì bariga kaan Kolocɔlɔɔ ma, ní i pìíw kéele nyuu bele myɛ ma be Zyerusalɛmi syɔɔli sige lè.

Lúrugárili kéele Nazarɛti ma

39 # Mat 2:23 Lǎli ni be kwɔ́ɔ lè kérigèle bee myɛ na n yɛlɛ ní Kàfɔw làlwa syɛ́ɛnrɛ ní, a be lúru n kári pe tiimaa kěgi ma, be yiri lè Nazarɛti, Galile tári ni. 40Pìíw si maa ni leegi ní i báriga taagi. Wi sícilimi maa nɛʔɛ, níì cán Kolocɔlɔɔ kpɔ́ʔɔri maa pye wi na.

Zyezu i nyɛ kpɔ̀ʔɔrɔli kpaʔa ni wi yɛ́ɛgèle kɛɛ ní siin wólo na

41 # Yir 12:1-27; Làlw 16:1-8 Yɛɛlɛ o yɛɛlɛ Zyezu seefɔbèle maa ni syée Zyerusalɛmi ma Sɔ̀lɔ-mí-yaʔali séri ma. 42A Zyezu ga baa yɛ̀ʔɛlɛ kɛɛ ní siin taa, a be kári yaà n yɛlɛ ní sériw kalɛɛlɛ ní. 43Lǎli ni sériw canya sáà foro lè, a be lúru ni syée kàʔa ma, kàjáa Zyezu si maa kòro kàdoʔo ma Zyerusalɛmi ni, wi seefɔbèle si da gee bee cán í, 44ní i sɔ̀ngí wi i nyɛ poro kôdanʔanyɛnbèle nínge ni, gee bee na a be canʔa nibin tánʔana kpéʔele, ní náà wi fɔ̀n, a be wi caa be senyɛnbèle, ní be cánvɔbèle ma. 45Amɛɛ si be wi caa n fɔ̀rɔ lè, a be lúru ni syée Zyerusalɛmi ma ní i wi caa ni syée. 46A canya siin ga kwɔ́ɔ, candaanri wógi na, a be sáà wi nyaa kpɔ̀ʔɔrɔli kpaʔa ni wodɛ́ɛɔn ní syɛ́ɛnbèle tamafɔɔlɔ nínge ni, a wi i be syɛ́ɛnri lúro, ní i be yíbe. 47Bele pe da wi syɛ́ɛnri lóʔo lè, a bele bee myɛ i káama wi sícilimi, ní wi syɛ́ɛnri lúrugoganma na be ma. 48Amɛɛ si wi seefɔbèle sáà wi nyaa lè nɛɛ bee, a be tɔ̀nɔ́ i káama gi na. A wi nafɔw wi pye: «Dóō, nyàʔá na mɔ kéeli naa kpéʔele wolo na? Wéle, mɔ tóow ní mii ní, wolo maa ni mɔ caa ní nyatinmɛ ní.»

49A wi be yari: «Nyàʔá na yele da ni mii caa? Yele ga gi cán ki i nyɛ ŋàʔanaga kéele mii í da mii Tóow fáli kpéʔele ì?» 50Syɛ́ɛnree si wi da joo be ma lè, pe da di kɔ́rɔw cán í.

51A Zyezu pínɛ ní be ní n lúru n kári Nazarɛti ma n sa ni lúro be ma. A wi nafɔw kérigèle bee myɛ kɔn wi fúngi ni. 52#1Sam 2:26; Kàs 3:4 Zyezu si maa ni leegi, kàa si i fàrá wi sícilimi na, a wi kéeli i Kolocɔlɔɔ ní syɛ́ɛnbèle dàán.

Currently Selected:

Luki 2: CB10

Highlight

Copy

Compare