Zyonasi 1
1
Zyonasi i kanmaa caa bi fǎn léeli Yawe na
1 #
2Fàn 14:25
A Yawe syɛ́ɛnri nan Amitayi jáaw Zyonasi na kánmi naa na, wi n jo: #Ŋún 139:7-10 2«Yìri maa syée Niniivi ma, ki lè kèkpɔɔgi mi sa yákpoli wáa gi kánmi na. Níì cán ki péemi kéele n lúgu fwɔɔ n baa nan naa mii na.»
3Lǎli bee ni a Zyonasi yìri bi fàn bi kári Tarisiisi ma bi léeli Yawe na. A wi tìgi n kári Zyafa ma ní sáà bàtowaa nyaa yaà, wee wi da ni syée Tarisiisi ma lè. A wi wi tánʔani lɔ́rɔ sàra, níì jée ní syɛ́ɛnbèle ní bi kári Tarisiisi ma bi léeli Yawe na.
4Kàjáa a Yawe káfalapeʔe yìrige ki i funu sólomi lɔ̀ʔɔ ǹjoʔo ni, a gi pye káfalakpɔʔɔ, fwɔɔ a bàtow i caa bi kabagi. 5A bàtow falipyebèlē fyáa. A pe myɛ nibin nibin i be kolocɔlɔbèlē nyɛ́ɛri gbanʔama be poro syɔɔ. A be bàtow fúngo yárira yirige n wáa sólomi lɔ̀ʔɔ ni jàngó bàtow í faʔa. Zyonasi si maa tìgi n jée bàtow fúngo ni n sáà sínɛ ni ŋúnɔ yaà gbanʔama. 6A bàtow kùndigi nùuni wi na n sáà wi pye: «Nyàʔá na mɔ ŋúnɔ? Yìri maa mɔ kolocɔlɔw yiri! Dɔ̀ʔɔ́ Kolocɔlɔw bee a sɔ̀ngi wolo kéeli na, wolo si a kɔ́ kùu í.» 7A pe gi joo peyɛɛ ma níì jo: «Yaa maa wo ba gɔ̌n wáa, jàngó wo gi cán wee kéele na kapeegi naa wolo taa lè.» A be gɔ̌nw wáa, a gɔ̌nw too Zyonasi na. 8Lǎli bee ni a be wi pye: «Ki tɛ̀ɛn wolo na wee kéele na kapeegi naa wo taa lè. Nyàʔá gi nyɛ mɔ kapyeli? Sán mɔ yìri? Tárìí wóo mɔ nyɛ? Syɛɛnfelegìí wóo mɔ nyɛ?» 9A wi be yari: «Mii i nyɛ Heburuo, Yawe mii kpɔ̀ʔɔrɔ́, wi lè nyɛ̀ʔɛni Kolocɔlɔɔ, woro wee wi sólomi lɔ̀ʔɔ ní tári kpéʔele lè.»
10A fyáakpɔɔrɔ nǎnbèle bee cò, a be wi pye: «Nyàʔá na mɔ gee naa kpéʔele?» Níì cán pe maa gi cán a wi fé bi léeli Yawe na wii, ncan woro wi da gee bee joo be ma. 11A be wi pye: «Nyàʔá wolo a kpéʔele mɔ na jàngó sólomi lɔ̀ʔɔ í yére wolo ma?»
Níì cán kàa maa ni fàrá sólomi lɔ̀ʔɔ tugo-mí-yìrile na. 12A wi be yari: «Ye mii láa ye wáa sólomi lɔ̀ʔɔ ni, sólomi lɔ̀ʔɔ a yére yele ma. Níì cán mii n gi cán mii kéeli na káfalakpɔɔgi naa yele taa.»
13A nǎnbèle bee i bàtow waari jàngó bi nan táfàa na, kàjáa be fanʔa ga taa í, níì cán sólomi lɔ̀ʔɔ maa ni tugu ni yìrigí ni be yéregi. 14Lǎli bee ni a be i Yawe nyɛ́ɛri gbanʔama níì jo: «Ee Yawe, wolo i mɔ nyɛ́ɛri ki ga yɛlɛ wolo í kùu nǎnw naa sìi kéele na í, mɔ a kɔ́ tɛɛlɛ fun sìsyaan wolo kapeele túgoro tugo wolo na í! Níì cán mɔ, Yawe, gee gi mɔ dɛ́nɛ lè, koro mɔ kpéʔele.»
15A be náà Zyonasi cò n wáa sólomi lɔ̀ʔɔ ni, a sólomi lɔ̀ʔɔ jángila yére. 16A nǎnbèle bee fyáa Yawe na gbanʔama. A be sáriga wòlo Yawe ma, níì nyɔɔfaliya kpéʔele.
Currently Selected:
Zyonasi 1: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
