Zyan 14
14
Zyezu wi nyɛ kólogi, gee gi syée lè Tofɔw ma
1 #
Ŋún 42:12; Eza 43:1-2 «Ki ga yɛlɛ yele í yele fúnyi yaʔa yaa curugu yele na í. Ki n yɛlɛ ye tága Kolocɔlɔɔ na yé wɔ́ɔ tága mii na. 2#2Kor 5:1; Heb 11:10 Tɛɛkòroyo saʔa i yaà mii Tóow kpaʔa ni. Kapye ki da pye nya í, mii mǎà dée gi fílige joo yele ma. Mii si a kári sa kàa sámaga yele ma. 3Mii ga kári n sáà gi sámaga yele ma, mii a lúru pan ba yele láa kári yele í sa pye ní mii ní, koro ga pye tɛ́ɛgee ni mii nyɛ lè, yele í wɔ́ɔ sa pye nɛɛ bee. 4Tɛ́ɛgee ni mii syée lè, yele n gi kólogi cán.»
5 #
Zyan 11:16
A Toma wi pye: «Kàfɔw, tɛ́ɛgee ni mɔ syée lè, wolo ga gi cán í. Mɛ̀ɛ́ si wolo a gbǎn pye si gi kólogi cán?» 6A Zyezu wi yari: «Jo mii si wi nyɛ kólogi, ní kányɛɛgi, ní sìíw. Syɔɔn faala a gbǎn nan Tofɔw na mii kàdoʔo ma í.» 7Yele ga maa mii cán, yele mǎà dée wɔ́ɔ mii Tóow cán. Yele si n wi cán tɔ́ɔliw ni, níì cán yele n wi nyaa.
8A Filipi wi pye: «Kàfɔw, mi Tofɔw tɛ̀ɛn wolo na, gee bee a yɛlɛ ní wolo ní.» 9A Zyezu wi yari: «Filipi, a mii làrigèle naa myɛ kwɔ́ɔ lé ní yele ní mɔ ga sèʔê mii cán í? Syɔ́ɔnwee wi mii nyaa lè, Tofɔw wi nyaa. Mɛ̀ɛ́ si mɔ jo mii í ní Tofɔw tɛ̀ɛn yele na bi sɛ́ɛ? 10Mɔ ga tága gi na ncan mii i nyɛ Tofɔw ni, Tofɔw si wɔ́ɔ i nyɛ mii ni ì? Níì cán syɛ́ɛnri mii nyuu yele ma lè, mii tiimaa wóro ban í. Mii Tóow wi nyɛ mii ni lè, woro wi wi kérigèle kpéʔele mii ni. 11Ki n yɛlɛ ye tága gi na bi cán mii i nyɛ Tofɔw ni, Tofɔw si wɔ́ɔ i nyɛ mii ni. Kapye yele a tága mii syɛɛnjóori na í, kérigèle mii kpéʔele lè, ki n yɛlɛ ye tága mii na gele bee báriga ni. 12Mii a tɔ̀nɔ́ gi joo yele ma kányɛʔɛ ni, syɔ́ɔnwee wi tága mii na lè, wee bee a wɔ́ɔ ra mii kapyegèle félege kpéʔele, àlí bi kɔ́ ra kèle kpéʔele ge kpólo bi sɔ̀lɔ gele bee na, níì cán mii i syée Tofɔw ma. 13Yele si ga yárigee faala nyɛ́ɛri wi ma lè mii mɛ́ɛgi na, mii a gi kpéʔele yele ma, koro ga pye nìjangbɔɔrɔ í da taari Tofɔw na Jaafɔw báriga ni. 14Yele ga yariga o yariga nyɛ́ɛri mii ma mii mɛ́ɛgi na, mii a gi kpéʔele yele ma.
Pìicǎnni panna nyɔɔfaliga
15«Yele ga tàmaga le ní mii ní, yele a ra mii tundunri kɔngi sáā di kpéʔele. 16Mii si a sa Tofɔw nyɛ́ɛri wi dɛ̀ɛmɛfɔwaa nikwɔɔ kaan yele ma, wee wi a ba pye ní yele ní lè làla o làla. 17Dɛ̀ɛmɛfɔw bee wi nyɛ kányɛɛgi Pìle, lee li lè dulunyanw syɛ̀ɛnnɛ a gbǎn li taa í, níì cán pe o li nyaagi í, pe si ga wɔ́ɔ̀ li cán í. Yele si na, yele n li cán, níì cán li i nyɛ ní yele ní, li si a ba pye yele fúnyi ni.
18Mii a yele yaʔa yele í pye círibéle í, níì cán mii a lúru pan yele ma. 19Ki n kòro cɛɛri dulunyanw syɛ̀ɛnnɛ si a ní mii nyaa í, kàjáa yele si na, yele a ní mii nyaa, níì cán mii i nyɛ sìi na, yele si a wɔ́ɔ pye sìi na. 20Cángi bee na yele a náa gi cán bi cán mii i nyɛ mii Tóow ni, si wɔ́ɔ gi cán yele i nyɛ mii ni, mii si wɔ́ɔ i nyɛ yele ni. 21Wee wi mii tundunri cán lè kányɛʔɛ ni, ní i di kɔngi ní i di kpéʔele, wee bee wi tàmaga le ní mii ní. Wee si wi tàmaga le ní mii ní lè, mii Tóow a wɔ́ɔ tàmaga le ní wee bee ní, mii si wɔ́ɔ tàmaga le ní wi ní, si niyɛɛ dɛ̀ɛn wi na.»
22Zyudi wi lè wi o nyɛ Isikariyɔti í, a woro wi pye: «Kàfɔw, mɛ̀ɛ́ gi nyɛ á mɔ jo mɔ a miyɛɛ dɛ̀ɛn wolo na, mɔ si a miyɛɛ dɛ̀ɛn dulunyanw syɛ̀ɛnnɛ na í?» 23A Zyezu wi yari: «Syɔ́ɔnwee faala wi ga tàmaga le ní mii ní lè, wee bee a ra mii syɛ́ɛnri lúro, mii Tóow a wɔ́ɔ tàmaga le ní wee bee ní. Mii ní mii Tóow si a pan wee bee ma bi ba kòro ní wi ní. 24Wee si wi lè wi ga tàmaga le ní mii ní í, wee bee a ra mii syɛ́ɛnri lúro í. Koro ní ki myɛ ní syɛ́ɛnree yele lúro mii ma lè, mii wóro ban í, tofɔw wi mii tun lè, woro wóro dii.
25A mii kérigèle naa joo yele ma wii, àmɛɛ mii sèʔé i naa ní yele ní lè. 26Dɛ̀ɛmɛfɔw Tofɔw a tun naa yele ma mii mɛ́ɛgi na lè, woro wi a ba yele tama kérigèle myɛ na si wɔ́ɔ yele kaan yele í da sɔ̀ngí da taagi kérigèle myɛ na mii da ni nyuu yele ma lè, dɛ̀ɛmɛfɔw bee wi nyɛ Pìicǎnni.
27Mii a fûnnyingi kaan yele ma, mii tiimaa fûnnyingi si mii a kaan yele ma. Mii si a gi kaan yele ma dulunyanw syɛ̀ɛnnɛ wóʔo kaanganma na í. Ki ga yɛlɛ yele í yele fúnyi yaʔa yaa curugu yele na í, ki ga wɔ́ɔ̀ yɛlɛ yele í da fɛ̀ɛgí í. 28Yele n gi lóʔo mii ma n kwɔ́ɔ, àmɛɛ mii gi joo yele ma lè níì jo: Mii a kári, mii si a ní lúru pan yele ma. Kapye yele maa tàmaga le ní mii ní, fundaanra mǎà dée pye yele ni àmɛɛ mii syée lè Tofɔw ma, níì cán Tofɔw n kpɔ́ʔɔ n sɔ̀lɔ mii na. 29Gee ki a kɔ́ ba kpéʔele lè kàdoʔo ma, koro mii joo gee yele ma tɔ́ɔliw ni, koro ga pye ki ga kɔ́ baa kpéʔele yele si tága gi na. 30Mii a ní joo ní yele ní kèlē saʔa na í, níì cán dulunyanw fànʔafɔlɔ i yaà ni maa. Wi fanʔa si o nyɛ mii na í. 31Koro ní ki myɛ ní gee Tofɔw joo mii í kpéʔele lè, gee bee mii a tɔ̀nɔ́ kpéʔele, koro ga pye dulunyanw syɛ̀ɛnnɛ í gi cán mii n tàmaga le ní Tofɔw ní. Ye yìri wo núngo nɛɛ naa wo kári.»
Currently Selected:
Zyan 14: CB10
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.