Oze 6
6
1«Yaa maa, wo lúru wo pan Yawe ma!
Wi n suluguli kpéʔele,
kàjáa wi a wolo pɔʔɔ.
Wi n kpúmɔnri kpéʔele,
kàjáa wi a wolo námiyi pwɔɔ.
2Wi a sìíw kaan wolo ma nɛɛ ní canya siin fúngo ni.
Candaanri wógi na wi a wolo yìrige,
wolo a kòro sìi na wi yɛʔɛ̀ ma.
3Wo wi cán, wo kanmaa caa wo Yawe cán.
Amɛɛ nyǐnjerigi panna nyɛ lè kakabalaga fun ni,
ànbée wi panni wɔ́ɔ i nyɛ.
Wi a pan wolo ma àmɛɛ zàʔá nyɛ lè,
àmɛɛ nyìnbegéle nyɔ́ɔ zàʔá nyɛ,
gee gi tári fɔɔnri lè.»
4«Nyàʔá mii yɛlɛ bi pye mɔ na Efirayimi?
Nyàʔá mii yɛlɛ bi pye mɔ na Zyuda?
Yele tàmagi i nyɛ àmɛɛ nyɛ̀ʔɛ nyɔ́ɔ fàfanʔa nyɛ lè,
ní àmɛɛ nyɛ̀ʔɛ nyɔ́ɔ kásaga nyɛ,
gee gi kwóo lè.
5Koro na mii kanyaajoobèle tɛ́ʔɛ n be sála n wo,
mii n be kpóo ní mii nyɔ́ɔgi syɛ́ɛnrɛ ní.
Mii kútiiw kèlē i yirigi àmɛɛ gbɛ̀ɛnmɛ nyɛ lè.
6 #
Mat 9:13; 12:7 Níì cán funjǎngi mii caa,
sáriga ban mii caa í,
Kolocɔlɔɔ cánni mii caa n sɔ̀lɔ sáriga-sórigow na.»
Kapeeyi kéele Isirayɛli ni
7«N yɛlɛ ní syɔɔn ye kánmi ní,
pe n joogaanni kálagi.
Nɛɛ bee pe mii jànváa.
8Galaadi i nyɛ kapeebyebèlē kaʔa,
ki n nyìn sìsyaanw túluyo na.
9Amɛɛ kàyuu-fànʔafɔɔlɔ làrá ni syɔɔn sige lè,
ànbée sáriga-wòlobèle kabiga syɛ́ɛnbèle sige ni kúu Sisyɛmi kólogi na.
Gee bee i nyɛ kapeekpɔʔɔ!
10Mii n yanɔnʔɔyɔ nyaa Isirayɛli kpáagi ni,
nɛɛ bee Efirayimi nyɛ ni kanɔnʔɔri kpéʔele,
Isirayɛli i wiyɛɛ nɔ́ɔnri.
11Yaliilaara kéele n sámaga n yaʔa mɔ ma wɔ́ɔgēle Zyuda,
lǎli ni mii ga mii syɛ́ɛnbèle yirige yaà púlori ni n lúrugo n pan lè.»
Currently Selected:
Oze 6: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
