Oze 14
14
1 Samarii a córo kolomɔfɔlɔ,
níì cán wi n céemɛ kpéʔele wi Kolocɔlɔw kánma na.
Ŋɔséew a be kpóo cáan.
Pe pìipiiri a tɔ́nʔɔnɔ, pe cébèle be nyɛ lè ficarigèle fɔ̀ɔlɔ, bele bee a purugu.
Tágala fun syɛɛnfelegi pɔʔɔlɔ kéele
2 #
Zak 1:4 #Sél 3:12-15,21-23; 31:18-21Isirayɛli, lúru mi pan Yawe mɔ Kolocɔlɔw ma,
níì cán mɔ n kpírige n too mɔ kolomi kéele na.
3Ye kàdowaara syɛ́ɛnrɛ láa ye yaʔa yeyɛɛ ma,
yé lúru ye pan Yawe ma.
Ye ba gi joo wi ma ye jo:
«Kolomi myɛ kùsulugo syɔɔ,
mí fɔ̀lɔ wolo na ní funjànga ní!
Wolo a ra wolo nyɔɔwari kpɔ̀ʔɔrɔlɔ wóo mɔ ma sáriga náapegèle sìndɛʔɛ ni.
4 #
Ŋún 10:14; 68:7 Asirii ye wów a wolo syɔɔ í.
Wolo a ní lúgu kapɛɛnkpumɔn-syɔ́ɔnyɔ na í,
wolo a ní gi joo wolo kɔ́yi fáli ma í si jo:
‹Wolo Kolocɔlɔw í!›
Níì cán mɔ taana círiw ba ni nyinidaara nyaagi.
5 #
Làlw 30:1-10; Ezek 36:24-30; Wɔr 11:25-29 Mii a be tágala funmi yáama pɔʔɔ,
pe kéeli a mii dɛ́nɛ gbanʔama,
níì cán mii fundanʔari n wàli n láʔa be na.
6Mii a pye Isirayɛli ma àmɛɛ kásaga nyɛ lè,
wi a fyɛ́ɛnrɛ kpéʔele àmɛɛ sinbirigi nyàáfyɛɛnrɛ nyɛ lè,
si nǐnri tìrige àmɛɛ Liban tíiri nyɛ lè.
7Wi káganyi a cabara.
Wi a nyɔɔ àmɛɛ olivye tíige nyɛ lè,
wi núngi si tɛ́nɛ àmɛɛ Liban nùndaanni nyɛ lè.
8Bele pe a lúru pan lè,
pe a ba ra tɛ̀ɛ́n wi nyínmi ni,
pe a ní da lìíli fála da taagi,
pe a ra fyɛ́ɛnrɛ kpéʔele àmɛɛ ɛrɛzɛn tírige nyɛ lè.
Pe mɛ́ɛgi a yiri àmɛɛ Liban dùvɛɛnw wóʔo nyɛ lè.
9Efirayimi, nyàʔá mii ní i caa ní yasunyo ní?
Mii i wi nyɛ́ɛrigi lúro,
mii nyɛ́nɛ i nyɛ wi na.
Mii a pye wi ma àmɛɛ siipirɛ tiipirige nyɛ lè.
Mii má mɔ yasanri yìrigí.»
10Wee wi cìlige lè,
ki n yɛlɛ wi cánna taa kérigèle bee ni!
Wee má cánna nyɛ lè,
ki n yɛlɛ wi ge kɔ́rɔw cán!
Níì cán Yawe kóloyi n sín.
Syɛɛnsinbèle a ra táanri yi ni,
kàjáa kapeebyebèle a ra kpírigi da tuun yi ni.
Currently Selected:
Oze 14: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
