Habakuki 2
2
1Mii a yére mii kpaàwele-tɛ́ɛgi ni,
mii a yére bi kòro mii tònirigi na.
Mii a sige jàngó bi gi nyaa,
gee wi a joo mii ma lè,
ní syɛɛnlurugori mii a joo mii káyaagi kéele na lè.
Yawe syɛɛnlurugori: Syɛɛnsinw ní fǎngi gbànvɔlɔ kéele
2A Yawe syɛɛnlurugori kaan mii ma níì jo:
Yanyaʔa sɛ́bɛ,
ki kánʔana mi wòlo kàlagoripiigéle na,
jàngó ti kàlama dɛ́nɛ.
3 #
Heb 10:37
Níì cán làla n tɛ́ʔɛ yanyaagi bee forolo kéele na,
ki i gi làrivoroli yèʔerí, ki a jànvaa pye í.
Alí ki ga mɔn da gi sigi,
níì cán ki a tɔ̀nɔ́ foro ki a tée ba fàli í.
4 #
Wɔr 1:17; Gal 3:11; Heb 10:38 Wéle, kpɔɔmɔ n syɛɛnaa-sìnzinw fúngo nyìn,
kàjáa syɛɛnsinw a sìi taa wi tágali báriga ni.
5Kányɛʔɛ na dùvɛɛnw i syɔɔn có ni kaangi,
nɛ̀ɛgbɔʔɔgɔfɔw o yèré sági í,
wi i wi yákpodirigi múru fáa àmɛɛ kúbèle tɛɛkòrogo nyɛ lè.
Wi i nyɛ àmɛɛ kùúw nyɛ lè wi o tíngi í.
Wi i syɛɛnfeleyi myɛ kíle ni maa wiyɛɛ ma,
ni syɛɛnfeleyi myɛ kpóʔoro wiyɛɛ na.
6Bele bee myɛ a ba wi kéeli kpéʔele kakpanama, ní nɛ̀ɛnyɛnɛgɛ, ní kàseewáa-yáriga ì?
Dánga tɛ́ɛyɛ kagunɔ kéele
Pe a ra gi nyuu si jo:
Wɔʔɔlɔ a pye syɔ́ɔnwee na wi yáriri fàarí
ni kpóʔoro ti lè ti o nyɛ wi woro í.
Ní wee wi kàa fàrá wi fwɔ́ɔgèle túgoro na lè,
làlìí ni gee bee a kwɔ́ɔ?
7Bele fwɔ́ɔgéle ge nyɛ mɔ na lè,
pe a yìri kelekele ì?
Bele pe a mɔ nyàʔara lè,
pe a cɛ̀lɛ́ nyán ì?
Mɔ a ba pye pe yakoliro.
8Amɛɛ mɔ syɛɛnfeleye saʔa yárira fuguri n láa lè,
syɛɛnfeleyi wozanya myɛ a wɔ́ɔ mɔ yáriri fuguri bi láa,
syɛ́ɛnbèle sìsyaan kéele na,
ní péemi kéele na mɔ kpéʔele tári, ní kěgi,
ní gi syɛ́ɛnbèle myɛ na lè.
9Wɔʔɔlɔ a pye syɔ́ɔnwee na wi námara tɔ̀nɔw fàarí ni kpóʔoro wi kpáagi kéele na lè,
koro ga pye bi wi zyàári tɛ́ʔɛ ǹjoʔo ma
jàngó wɔʔɔgi a kɔ́ nan woro na í.
10Mɔ kpáagi fɛ̀ɛrɛ kéele na mɔ gi kɔ̀rirɔ n tímana,
àmɛɛ mɔ syɛɛnfeleye saʔa kpúmɔn n cáan lè mɔ n fɔ̀n mɔ siiw ni.
11Níì cán n kàdɛnɛgi yaʔa
gúngi na,
ki i yákpoli wáa, n tiipɔw yaʔa kpaatɔn-díiri láara ni
a wi syɔɔ gi ma.
12Wɔʔɔlɔ a pye syɔ́ɔnwee na wi kàʔa faanri
sìsyaan wori fúngo ni lè,
ní wee na wi kèkpɔʔɔ téeri kapeegi fúngo ni lè.
13Yawe wi lè Nyɛ̀ʔɛni Sùlasiibéle Kafɔlɔ,
woro má ban gee naa yìri ì,
koro gi nyɛ syɛ́ɛnbèle i báara náagi ma,
syɛɛnfeleyi i yiyɛɛ vɔ̀rɔgí gbanzan?
14 #
Eza 11:9
Níì cán tári a ba nyìn Yawe nìjangbɔɔri cánna na
àmɛɛ lǒyi sólomi lɔ̀ʔɔ nyìn lè.
15Wɔʔɔlɔ a pye syɔ́ɔnwee na wi wi syɛɛnnyɛnnɛ kaangi wi i
gbo lè,
mɔ wee na wi mɔ pɔ́sɔniw sòʔó ni kaangi lè,
jàngó bi wi yɛ́ɛgi kaan kaa wóo,
koro ga pye bi wi níboriw nyaa.
16Mɔ n tín fɛ̀ɛ́ri na,
nìjanri na ban í.
Wɔ́ɔ mi gbaa, mi kòro níbori!
Yawe kàliige kɔ́gi yagbaala a fíige nan mɔ na,
fɛ̀ɛrɛ a tɔ̀nɔ́ mɔ nijanri taa.
17Níì cán péemi bi kpéʔele Liban na lè,
poro a ŋɔ́ngari syɔɔ mɔ na.
Yaweeri gàlagí fyáakpɔɔrɔ
a mɔ cò,
syɛ́ɛnbèle sìsyaan kéele na wi
wo lè,
ní péemi kéele na bi kpéʔele tári, ní kěgi,
ní gi syɛ́ɛnbèle myɛ na lè.
18Nyàʔá ǹdedanga a nyɔɔ,
á koro gi yaʔa fáliw kacaɔn í gi tan,
ní tunmɔgbalara màdeo,
wee wi jànvaa tamana kaangi lè,
á koro gi yaʔa fáliw kacaɔn wi wi sámaga lè,
woro í wiyɛɛ daʔa wi na,
si kòro bàā jànvaa kolocɔlɔbèle sámagi,
poro bele be lè pe o nyuu í?
19Wɔʔɔlɔ a pye syɔ́ɔnwee na wi gi nyuu tiige ma lè níì jo:
«Ki n yɛlɛ mi yìri!»
Ní kàdɛnɛgɛ ma ki lè ki o nyuu í, níì jo:
«Yìri ŋúnɔmi na!»
A ki a gbǎn syɔɔn tama lé?
Wéle, pe n tɛ́ɛw ní wálifiiw tɛ́ʔɛ n gi tɔ́n,
kàjáa ŋɔ́ngara o nyɛ gi ni nyáana í.
20Kàjáa Yawe i nyɛ wi kpɔ̀ʔɔrɔli kpaacanga ni.
Ki n yɛlɛ tári myɛ í kòro pyèrio wi yɛʔɛ̀ ma!
Currently Selected:
Habakuki 2: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
