Yirile 26

Tɛɛkòrojǎngi kéele

1«Ki n yɛlɛ mi kpɔ̀ʔɔrɔli fànikpaʔa sámaga mii ma ní fànitɔnɔyɔ kɛɛ ní. Ki sámaga ní lɛn fànifɛɛlɛfɛɛlɛɔ ní wee be sára lè, ní kɔ́luruna céri fàni, ní fàninyɛɛnw, ní fàninyɛɛn-telew ní. Mí syerubɛnbéle sámaga yaà bi yɛlɛ ní kacánmi fálipyeganma ní. 2Fàniyi myɛ nibin nibin tɔnɔganma a pye mɛ́tiribéle kɛɛ ní sicɛrɛ-jɛrɛ, yi kpóloganmi si pye mɛ́tiribéle siin-ziin. Fàniyi myɛ tímanaganma a pye sèjira. 3Pe a fàniyaa kagunɔ jɔli bi sogi yiyɛɛ na si yee kagunɔ jɔli bi sogi yiyɛɛ na. 4Fàniyee yi jɔli n sogi yiyɛɛ na lè, ki n yɛlɛ mi kɔ́luruna cére mɛnɛpiire kùru weegèlē wozeligi nyɔ́ɔ na, mí wɔ́ɔ gee bee wonijanga kpéʔele siin wógi nyɔ́ɔ na. 5Ki n yɛlɛ mi mɛnɛpiire togoye siin ní kpɔrigɔ kùru weegèlē fàniyee wozelige nyɔ́ɔ na, mí ní tàa togoye siin ní kpɔrigɔ kùru weegèlē siin wógi nyɔ́ɔ na. Mɛnɛpiiri bee wéegéle n yɛlɛ ge sín ní keyɛɛ ní. 6Mí tɛɛ̀ yakparagéle togoye siin ní kpɔrigɔ sámaga mi fàniyi kpàra mi táriga yiyɛɛ na ní ge ní. Kánmi bee na kpɔ̀ʔɔrɔli fànikpaʔa a pínɛ pye nibin.

7Mɔ a fàniyaa sámaga ní sike-síire ní, yoro í pye kpɔ̀ʔɔrɔli fànikpaʔa njoʔo ma tɔ́nnɔ kéele na. Mɔ a yee bee sámaga fàniyaa kɛɛ ní nibin. 8Fàniyi bee myɛ nibin nibin tɔnɔganma n yɛlɛ bi pye mɛ́tiribéle kɛɛ ní kagunɔ kagunɔ. Yi kpóloganmi si pye mɛ́tiribéle siin-ziin. Fàniyi tímanaganma a pye mɛ́tiri nyɔ́ɔnijanga na. 9Ki n yɛlɛ mi fàniyaa kagunɔ jɔli mi sogi yiyɛɛ na, mí yee kɔrɔni wàli mi kpéʔele kánmi bee na. Mi ba fàniyi kɔrɔni wóʔo wáa mi taʔa fànikpaagi yɛʔɛmaw na. 10Fàniyee wozeliye yi jɔli n sogi yiyɛɛ na lè, ki n yɛlɛ mi mɛnɛpiire togoye siin ní kpɔrigɔ kùru weegèlē yee bee wozanga wóʔo nyɔ́ɔ na, fàniyee pe níì jɔli n sogi yiyɛɛ na lè n pye nibin mi mɛnɛpiiraa togoye siin ní kpɔrigɔ kùru weegèlē yee bee wozanga nyɔ́ɔ na. 11Mí kanyɛɛnrɛ yakparagéle togoye siin ní kpɔrigɔ sámaga, mí ge foro mɛnɛpiiri wéegéle ni. Kánmi bee na mɔ a fànikpaagi pínɛ pye nibin. 12Amɛɛ fàniyi wozanga a ba tɔnɔ yiri fànikpaagi tɔnɔganma ni lè, ki tílaw a ba tìgi wo kpɔ̀ʔɔrɔli fànikpaʔa kadoʔo ma. 13Fànikpaagi fàniya a tɔnɔ yiri mɛ́tiri tíla kàbangaa na, ní mɛ́tiri tíla gee na. Tílawee a tìgi wo kpɔ̀ʔɔrɔli fànikpaʔa kabangee na, wee í tìgi wo kàbangee na bi gi tɔ́n. 14Mí bàpɔɔlɔ sáliya tɛ́ʔɛ mi yatɔngɔ sámaga mi tɔ́n fànikpaagi na, yee pe a nyɛ́nɛgɛ lè. Mí ní yatɔngaa sámaga ní dofɛn sáliya ní, bi koro taʔa ǹjogi ni.

15Mí tiikpakpaaya sámaga, akasya tíire wóyo kpɔ̀ʔɔrɔli fànikpaʔa kéele na mi yìrige mi yérige. 16Tiikpakpaayi myɛ nibin nibin tɔnɔganma a pye mɛ́tiribéle kagunɔ kagunɔ, yi yɛ́ɛyi kpóloganma si pye santimɛtiribéle togoye taanri ní kpɔrigɔ ní kagunɔ kagunɔ. 17Tɔlɔyɔ siin-ziin n yɛlɛ bi pye tiikpakpaayi myɛ nibin nibin na, yí sogi yiyɛɛ na bi kári. Kánmi bee na gi yɛlɛ mɔ í kpɔ̀ʔɔrɔli fànikpaʔa tiikpakpaaya myɛ sámaga. 18Ki n yɛlɛ mi tiikpakpaaya toko sámaga, yoro í pye kpɔ̀ʔɔrɔli fànikpaʔa worogulo kàbaan lɛ̀ʔɛlɛ ni. 19Mí yataʔaya togoye siin sámaga, wálifiio wóyo mi le tiikpakpaayi toko láara ni. Mɔ a yataʔaya siin-ziin le tiikpakpaayi myɛ nibin nibin láara ni, 20gee gi kpɔ̀ʔɔrɔli fànikpaʔa lɛʔɛziin wólo kéele kwɔ́ɔ lè li lè solomɔkulo kàbangi na, loro tiikpakpaayi a wɔ́ɔ pye toko. 21Ní yi yataʔayi togoye siin yi lè wálifiiw wóyo, yoro siin-ziin í pye tiikpakpaʔa o tiikpakpaʔa láara ni. 22Mɔ a tiikpakpaaya kɔrɔni sámaga kpɔ̀ʔɔrɔli fànikpaʔa kadoʔomaw kéele na, ki lè canʔajeemɛ kabangi. 23Ki n yɛlɛ mi tiikpakpaaya siin-ziin sámaga kpɔ̀ʔɔrɔli fànikpaʔa fungomaw jɛ̀ɛ́ngéle kéele na. 24Yi a sígi yiyɛɛ na táàma, vèʔege si sa yi fínaagèle cò bi sámaga táriga yiyɛɛ na. Koro wonijangi ki a kpéʔele yee myɛ siinw na yi nyɛ lè jɛ̀ɛ́ngèle siin na. 25Kánmi bee na tiikpakpaaya kɔrɔtaanri a pye yaà ní yi yataʔayi ní yi a pye lè wálifiio wóyo. Yi a pye yataʔaya kɛɛ ní kɔrɔni. Tiikpakpaayi myɛ yataʔaya siin-ziin a pye tiikpakpaayi myɛ nibin nibin láara ni.

26Mɔ a tiipalagéle kagunɔ sámaga akasya wòʔolo, kpɔ̀ʔɔrɔli fànikpaʔa lɛʔɛlaa nibin tiikpakpaaya kéele na, 27kèle kagunɔ í sámaga kpɔ̀ʔɔrɔli fànikpaʔa lɛʔɛziin wólo tiikpakpaaya kéele na. Kèle kagunɔ si wɔ́ɔ sámaga kpɔ̀ʔɔrɔli fànikpaʔa kadoʔomaw tiikpakpaaya kéele na canʔajeemɛ ma. 28Níngi tiiparila li a pye lè tiikpakpaayi nínge ni, li a séli láʔalee na bi sa sígi lee na. 29Mí tiikpakpaayi tɛ́ɛyɛ myɛ tɔ́n ní tɛɛ̀ ní. Mí tɛɛ̀ vèʔeye sámaga, yee ni tiipalagèle a foro lè. Mí tiipalagèle tɛ́ɛyɛ myɛ tɔ́n ní tɛɛ̀ ní. 30Kánmee bi tɛ̀ɛn mɔ na nyanbelegi na lè, ki n yɛlɛ mi kpɔ̀ʔɔrɔli fànikpaʔa sámaga mi yɛlɛ ní kánmi bee ní.

31Ki n yɛlɛ mi fànipariɔ sámaga ní kɔ́luruna cére fàni, ní fàninyɛɛɔn, ní fàninyɛɛn-tèleo ní, n fàra lɛn fànifɛɛlɛfɛɛlɛɔ na, wee be sára lè. Pé syerubɛnbéle sámaga wi na bi yɛlɛ ní kacánmi fálipyeganma ní. 32Mí wi cɔ̀rɔ akasya tíire gaangéle sicɛrɛ na, gele pe a tɔ́n ní tɛɛ̀ ní lè, ge tɛɛ̀ yacɔrɔgèle na. Gàángèle si yére wálifiiw yataʔaya sicɛrɛ na. 33#Heb 6:19; 9:3-5 Mɔ a fànipariw cɔ̀rɔ yakparagèle láara ni.

Nɛɛ bee mɔ a séeraw kásu lége bi tɛ́ʔɛ fànipariw màʔama na. Fànipariw a tɛɛcǎngi, ní tɛɛcàndelegi bee wàli bi láʔa yiyɛɛ na yele ma. 34Ki n yɛlɛ mi kapeegèle kùsulugo tɛ́ʔɛ tɔ́n séeraw kásu nyɔ́ɔ na, tɛɛcàndelegi ni. 35Ki n yɛlɛ mi tàbaliw tɛ́ʔɛ fànipariw yɛ́ʔɛ ma, fètindaʔali si pye tàbaliw zìnmɛ na kpɔ̀ʔɔrɔli fànikpaʔa worogulo kàbangi na. Mí tàbaliw tɛ́ʔɛ solomɔkulo kàbangi na.

36Mí fànikpaagi tɛɛ̀jeele kpaaweetɔn-fàni sámaga ní kɔ́luruna cére fàni, ní fàninyɛɛɔn, ní fàninyɛɛn-tèleo ní, n fàra lɛn fànifɛɛlɛfɛɛlɛɔ na, wee be sára lè. 37Mí akasya tíire gaangéle kagunɔ sámaga kpaaweetɔn-fàniw kéele na, mí tɛɛ̀ tɛ́ʔɛ mi ge tɛ́ɛyi myɛ tɔ́n. Wi yacɔrɔgèle si pye tɛɛ̀ wòʔolo. Mí kanyɛɛnrɛ gbàla mi pye gàángèle yataʔaya.

Currently Selected:

Yirile 26: CB10

Highlight

Compare

Copy