Yirile 21

Kajoolo Heburu-púlobèle kéele na

1 # Làlw 15:12-18 «Làlwaw kèlē mɔ a tɛ̀ɛn be na lè, koro ge nyɛ gele naa. 2#Lev 25:39-46 Mɔ ga puloo syɔɔ wí i nyɛ Heburuo, yɛ̀ʔɛlɛ kɔrɔni wi a báara, kɔrɔsiin wóli na wi a pye wɔ́rɔɔ bi yiri kári yafyɛn sìnzara ni. 3Kapye wi maa pan wi nibin, wi a wɔ́ɔ kári wi nibin. Kapye wi si maa pan ní cɔlɔɔ ní, wi a wɔ́ɔ lúru kári ní wi céw ní. 4Kapye wi kàfɔw maa cɔlɔɔ kaan wi ma, a wi nànbiigéle, wàlá calipiigèlē see wi ma, céw ní wi pìíbèle a kòro yaà wi kàfɔw ma, wi nibin sáā syée. 5Púlow si ga gi joo níì jo: ‹Mii kàfɔw, ní mii céw, ní mii jáabèle kéele n mii dɛ́nɛ, mii o caa bi pye wɔ́rɔɔ bi yiri kári í,› 6lǎli bee ni wi kàfɔw a kári ní wi ní Kolocɔlɔɔ#21:6 Syɛ́ɛnri naa kɔ́rɔ a wɔ́ɔ gbǎn pye Jàbɔbèle yɛ́ʔɛ ma. yɛ́ʔɛ ma, si sɛ̀ʔɛrɛ ní wi ní kɔ̀rigi, wàlá kɔ̀riteligi na, si wi líigi fùru ní ŋaana ní. Lǎli bee ni púlow a kòro wi kàfɔw fáli na làla o làla.

7Nànwaa jáa ga pye cɔlɔɔ, á wi wi pára puloo, wee bee yiriganma a pye ní pulonǎnbèle wómɔ ní sèjira í. 8Kapye wi kàfɔw maa wi syɔɔ wi pye woro cɔ́ɔ, ní baa gi nyaa wi kéeli ga níì woro dɛ́nɛ í, wi a wi yaʔa pe wi nyúngi syɔɔ wi pye wɔ́rɔɔ. Ki ga yɛlɛ wi wi pára táraa syɔ́ɔn ma í, níì cán woro wi wi jànváa. 9Kapye wi n wi syɔɔ bi kaan wi jáaw ma, gee be kpéʔele calipiigèle ma lè, ki n yɛlɛ wi gee bee wonijanga kpéʔele wi ma. 10Wi ga níì cewaa nikwɔɔ láa, ki ga yɛlɛ wi kɔ kàa yirige wi ceseliw yaliire, wàlá wi yaleri, wàlá wi kpaasinɛ-kéeli ni í. 11Kapye wi o kérigèle naa taanri kpéʔele wi ma í, wi a gbǎn pye wɔ́rɔɔ bi yiri kári yafyɛn sìnzara ni, wáli sìngaan ni.

Kolomee kéele na pe a syɔɔn kpóo lè

12 # Lev 24:17 «Syɔ́ɔnwee wi ga wi syɛɛnnyɛnnɛ kpúmɔn n kpóo lè, pe a syɔ́ɔnw bee kpóo wii. 13#Cór 35:10-34; Làlw 19:1-13; Zyoz 20:1-9 Ki si ga pye wi ga làra n wi syɛɛnnyɛnw sige níì wi kpóo í, fwɔɔ a gi pye mii Kolocɔlɔɔ wi gi yaʔa a wi kɔ́gi wi kpóo, mii a tɛɛgaa yaʔa gi pye yele ma syɔ́ɔnw bee í fàn bi sa jée yaà beè bi wiyɛɛ nyúngi syɔɔ. 14Kàjáa syɔɔnwaa ga wiyɛɛ dɔri níì wi syɛɛnnyɛnnɛ kpóo gbánama ni, àlí wi ga fàn n sáà mii sáriga-wòlo-yafaangi cò, mɔ a sa wi kíle láʔa yaà bi kpóo.

15Syɔ́ɔnwee wi ga wi toò wàlá wi nɔɔ̀ kpúmɔn lè, syɔ́ɔnw bee a kpóo wii.

16 # Làlw 24:7 Syɔɔn ga syɔɔnwaa yùu n pára, wàlá n wi yaʔa wiyɛɛ kɔ́lɔ na, á be tɛ́nɛ̀ wi nyaa wi ma, syɔ́ɔnw bee a kpóo wii.

17 # Lev 20:9; Mat 15:4; Mar 7:10 Wee wi ga syɛɛnpeere joo n wáa wi toò wàlá wi nɔɔ̀ na lè, wee bee a kpóo wii.

Kúruyi ní kpàliyi kéele

18«Nǎnbèle pèle ga ni túngu, á wàa wàa kpúmɔn ní kàdɛnɛgɛ ní, wàlá ní kágunnɔ ní, wi si ga kùu í, fwɔɔ a wi i yáa n sínɛ yasinɛgɛ na, 19wi ga baa gbàn n yìri ni nyaari kàgbeele na kàfugo ma, wi kpúmɔnfɔw a náa gbǎn pye wɔ́rɔɔ. Koro ní ki myɛ ní lǎlee wi kwɔ́ɔ lè sìnbaara ni, wi a lee bee sàra wi ma, sáā wi báara bi taa wi ba pɔʔɔ foro péw.

20Nàɔn ga wi pulonàɔn wàlá wi pulocaà kpúmɔn ní kàgbeele ní, a púlow kùu wi kɔ́gi ni, pe a wi gɔ̀lɔ́w wòlo wi na. 21Kàjáa púlow ga canʔa nibin wàlá canya siin kwɔ́ɔ ní náà kùu, pe a ní gɔ̀lɔ́w wòlo wi kpóofɔw na í, níì cán wi walì wii.

22Nǎnbèle pèle ga ni túngu ní sáà fícɛnnɛ fɔ́lɔ círi n taa, níì wi kaan a wi kébe n see, yafyɛn si ga níì céw taa í, céw nàɔn ga nyɔ́ɔgee tɛ̀ɛn lè, kolomɔfɔw a wáli nyɔ́ɔgi bee sàra bi yɛlɛ ní kútiijoobèle syɛ́ɛnrɛ ní. 23Kàjáa yarigaa ga wi taa, mɔ a sìiwaa yaʔa wi pye wàa sìndɛʔɛ ni, 24#Lev 24:19-20; Làlw 19:21; Mar 5:38 nyapilaa í pye làa sìndɛʔɛ ni, gǎnnaa í pye làa sìndɛʔɛ ni, kɔgaa í pye kàa sìndɛʔɛ ni, tɔlɔgaa í pye kàa sìndɛʔɛ ni, 25sógulo í pye sógulo sindɛʔɛ ni, kpàlila í pye kpàlila sìndɛʔɛ ni, kpumɔnnamiga í pye kpumɔnnamiga sìndɛʔɛ ni.

26Nànwaa ga wi pulonàɔn wàlá wi pulocaà kpúmɔn n nyapili jaa, wi a wi yaʔa wi pye wɔ́rɔɔ bàā syée koro í pye wi nyapili sàra. 27Wi ga wi pulonǎnw wàlá wi pulocew kpúmɔn n gǎnnaa kɔ́n, wi a wi yaʔa wi pye wɔ́rɔɔ bàā syée koro í pye wi gǎnni sàra.

28Náapɛɛlɛ ga nàɔn wàlá cɔlɔɔ círi ní nyɛ́ngèle ní n kpóo, náapeli bee n yɛlɛ pe li wábagi ní kàdɛnɛrɛ ní bi kpóo. Náapeli bee káara ga yɛlɛ pe di káa í. Kolomɔ si a ní pye náapeli fɔ́lɔ na í. 29Kàjáa kapye náapeli maa tàli ni cínɛ ní nyɛ́ngèle ní, a pe baa koro joo li kàfɔw ma, wi si ga fɔ̀lɔ n li pwɔɔ í, náapeli bee ga nàɔn, wàlá cɔlɔɔ kpóo, pe a li wábagi ní kàdɛnɛrɛ ní bi kpóo, si wɔ́ɔ li kàfɔw kpóo. 30Pe si ga wáli nyɔ́ɔgee taʔa wi na lè, gee wi yɛlɛ bi sàra bi wiyɛɛ nyúngi syɔɔ lè, ki n yɛlɛ wi gi myɛ sàra. 31Náapeli ga wàa pyà círi n kpóo, nàɔn, wàlá cɔlɔɔ, làlwaw bee wonijaɔn pe a foro bi yɛlɛ ní kútiiw kúunganma ní. 32Kapye pulonàɔn, wàlá pulocaà náapeli círi n kpóo, náapeli fɔ́lɔ a wálifiio támabéle toko ní kpɔrigɔ córo kaan púlow fɔ́lɔ ma, pé náapeli wábagi bi kpóo ní kàdɛnɛrɛ ní.

33Syɔɔn ga lɔ̀ʔɔ wéʔe yaʔa womúgugo ní, wàlá n lɔ̀ʔɔ wéʔe túgu, wi si ga gi tɔ́n í, nɔ̀ɔ, wàlá jòfani ga too gi ni, 34wéegi fɔ́lɔ a wáli sàra yaweegi fɔ́lɔ ma, yaweekuugi si kòro wéegi fɔ́lɔ ma.

35Syɔɔnwaa náapɛɛlɛ ga wàa wólo círi n kpóo, ki n yɛlɛ pe woweeli pára pe siinw si wáliw lɛɛ peyɛɛ na, pé wɔ́ɔ woguuli lɛɛ peyɛɛ na. 36Ki si ga pye náapeli maa tàli ni cínɛ, a pe gi joo li kàfɔw ma, wi si ga fɔ̀lɔ n li pwɔɔ í, wi a woweeli kaan woguuli fɔ́lɔ ma woro si kòro ní woguuli ní.

Yaweeri yùulo kéele

37«Syɔɔnwaa ga nɔ̀ɔ, wàlá byà, wàlá sikaà yùu, níì yaweeli bee kpóo, wàlá n li pára, kapye nɔ̀ɔ wii, wi a gi sàra ní nìye kagunɔ ní. Ki si ga pye byà, wàlá sikaà, wi a gi sàra ní bàala sicɛrɛ, wàlá sikaala sicɛrɛ ní.

Currently Selected:

Yirile 21: CB10

Highlight

Copy