Yirile 19

KOLOCƆLƆƆ N JOOGAANNA KPEʔELE NI ISIRAYƐLI NI

Yawe n joogaanna kpéʔele Isirayɛli ye ma

1Isirayɛli ye yirili kàdoʔo ma Ezyipiti tári ni, ki yedaanri wógi na pe jée cángi bee Sinayii fìími tára ni. 2Erefidimi ni pe da yiri níì jée Sinayii fìími tára ni n be fànikpaayi kóri. Isirayɛli ye maa be fànikpaayi kóri n yɛʔɛ̀ wáa nyanbelegi ma.

3A Mowizi lúgu n kári Kolocɔlɔɔ ma, a Yawe kòro yaà nyanbelegi ǹjoʔo ni níì wi yeri níì jo: «Ki n yɛlɛ mi syɛ́ɛnri naa joo Zyakɔbi kpáagi wòolo ma, pe lè Isirayɛli pìíbèle, mí be pye: 4‹Gee mii kpéʔele Ezyipiti na lè, ní kánmee na mii yele láa n pan mii tɛ́ʔɛ ma lè àmɛɛ nyɔɔdàdaga gi pìibēle lée gi fókaanyi na lè, yele tiimaa n gee bee nyaa. 5#Làlw 4:20; 7:6; 14:2; 26:18; Tiit 2:14 #1Pyɛ 1:9; Tɛ̀ɛn 1:6; 5:10Tɔ́ɔliw ni, yele ga ni mii jóomi lúro níì mii joogaanni cò, yele a pye mii tiimaa wòolo syɛɛnfeleyi myɛ nínge ni, níì cán tári myɛ i nyɛ mii wóro. 6Yele a pye mii ma sáriga-wòlobēle fannyɔʔɔ, ní tɛɛlɛfun syɛɛnfelege.› Syɛ́ɛnri bee mɔ a joo Isirayɛli syɛ́ɛnbèle ma.»

7A Mowizi pan ní baa syɛ́ɛnmi wólɛɛbéle yeri n kpóʔoro. Syɛ́ɛnree Yawe da joo n gbàn wi ma lè, a wi dee bee myɛ joo be ma. 8A syɛ́ɛnmi myɛ bìnɛw gi joo níì jo: «Gee Yawe joo lè, wolo a ra gi kpéʔele.»

A Mowizi sáà syɛ́ɛnbèle syɛɛnlurugoro joo Yawe ma. 9Lǎli bee ni a Yawe gi joo Mowizi ma níì wi pye: «Wéle, mii a pan mɔ ma fàfaanwɔʔɔ ni, koro ga pye mii ga ba ni nyuu ní mɔ ní, Isirayɛli ye í da mii joomi lúro, koro ga pye be tága mɔ na làla o làla.» A Mowizi syɛ́ɛnbèle syɛ́ɛnrɛ joo n tɛ̀ɛn Yawe na.

Kolocɔlɔɔ n Mowizi fàra Sinayii nyanbelegi na

10A Yawe gi joo Mowizi ma níì wi pye: «Da syée syɛ́ɛnbèle ma mi sa be jéemununi fáli kpéʔele níjanʔa ní nyɛ̀ʔɛna, mí be pye ki n yɛlɛ pe be búroyi jée. 11Pé peyɛɛ zámaga bi kwɔ́ɔ candaanri wógi na. Níì cán candaanri wógi na Yawe a tìgi syɛ́ɛnbèle myɛ nyɛ́nɛ na Sinayii nyanbelegi na. 12#Heb 12:18-20 Ki n yɛlɛ mi láʔagologo wòlo syɛ́ɛnbèle ma mi nyanbelegi màʔa mi kpàra, ki joo syɛ́ɛnbèle ma mí be pye: ‹Ki n yɛlɛ yaa kɔ̀rɔsíi, yele a kɔ́ lúgu nyanbelegi na í, wàlá bi caa kɔ́ tánga ki kàgomi na í. Syɔ́ɔnwee faala wi ga tánga lè nyanbelegi na, pe a wee bee kpóo. 13Syɔɔn a kɔlɔ̀ taʔa wi na í, kàjáa kàdɛnɛrɛ ní pe a wi wábagi kpóo, wàlá bi wi ŋɔɔn kpóo ní ŋaaya ní, a ki i nyɛ yaweele yoo, syɔɔn yoo, wi a ní kòro sìi na í.› Bàpɔw nyɛ́ngɛ wiimɛ ga tɔnɔ, pe a náa lúgu nyanbelegi na.» 14A Mowizi tìgi nyanbelegi na n kári syɛ́ɛnbèle ma n sáà be jéemununi fáli kpéʔele, á be wɔ́ɔ̀ be búroyi jée. 15A wi gi joo syɛ́ɛnbèle ma níì jo: «Ki n yɛlɛ ye yeyɛɛ zámaga ye kwɔ́ɔ canya taanri fúngo ni, yele wàa a kɔ́ nan cɔlɔɔ faala na í.»

16 # Tɛ̀ɛn 4:5 A ki ga pye candaanri wógi nyɛ̀ʔɛ nyɔ́ɔ na, a nyɛ̀ʔɛni folomɔ, ní li nyɛ́ʔɛnɛmi, ní fàfaanwɔɔ-tèlege pye nyanbelegi na, tòmaagi wìimɛ si wɔ́ɔ i yirigi gbanʔama. A syɛ́ɛnmi i cɛ̀lɛ́ tɛɛkòrogi ni. #Làlw 4:11-12 17A Mowizi syɛ́ɛnbèle yirige tɛɛkòrogi ni pe sa Kolocɔlɔɔ fàra. A be sáà yére nyanbelegi tìgimɛ ni.

18Sinayii nyanbelegi myɛ maa pye wírige, níì cán Yawe maa tìgi naà nínge ni n baa tɛ́ɛn ki ǹjogi ni. A wírigi bee i yìrigí mɔ a jo fúru naakpɔʔɔ wírige gii. A nyanbelegi myɛ i cɛ̀lɛ́ gbanʔama. 19Tòmaagi wìimɛ maa ni kpɔ́ʔɔgi ni syée gbanʔama. Mowizi maa ni nyuu, Kolocɔlɔɔ si i syɛɛnlurugori kaangi wi ma ní yákpogbɔɔlɔ ní.

20Yawe maa tìgi n baa tɛ́ɛn Sinayii nyanbelegi na, níì Mowizi yeri, a wi lúgu yaà. 21A Yawe gi joo Mowizi ma níì wi pye: «Tìgi maa syée mi sa syɛ́ɛnbèle sàmi mí gi joo mi gbàn be ma, mí be pye pe a kɔ́ jo poro a tìn bi pan naa mii Yawe ma ba mii wéle í. Kapye koro ban í, syɛɛnnɛʔɛmɛ a too kùu be ni. 22Sáriga-wòlobèle pe wɔ́ɔ̄ nùuní mii Yawe na lè, ki n yɛlɛ poro í wɔ́ɔ peyɛɛ jéemununi fáli kpéʔele, jàngó mii Yawe a kɔ́ pèle nyúnyo pùuni be kabigi ni í.» 23A Mowizi gi joo Yawe ma níì wi pye: «Syɛ́ɛnbèle a fɔ̀lɔ́ lúgu Sinayii nyanbelegi na í, níì cán mɔ tiimaa n wolo sàmi níì gi joo n gbàn níì jo: ‹Láʔagologo wòlo mi nyanbelegi màʔa mi kpàra, mí gi yaʔa kɔlɔ̀ na Kolocɔlɔɔ ma.› » 24A Yawe wi pye: «Tìgi maa syée, koro kàdoʔo ma mɔ a ní lúgu naa, Aarɔn si pínɛ lúgu ní mɔ ní. Kàjáa sáriga-wòlobèle ní syɛ́ɛnmi a kɔ́ jo poro a tìn bi lúgu naa mii Yawe ma í, jàngó mii a kɔ́ pèle nyúnyo pùuni pe kabigi ni í.» 25A Mowizi tìgi n pan syɛ́ɛnmi ma n baa joo ní bi ní.

Currently Selected:

Yirile 19: CB10

Highlight

Copy