Amɔsi 7
7
Amɔsi yanyaazeligi: Kúdow
1 #
Zyow 1:4-7
Gee Kàfɔw Yawe mii yaʔa a mii nyaa lè, koro gi nyɛ gee naa, mii maa gi nyaa a wi kúdo sámaga lǎli ni nyàákɔnigwɔɔgi nyàányunro séli ni fún lè, gee fànʔafɔw da kɔni lè. 2Amɛɛ si wi tári nyàā myɛ lìi n kwɔ́ɔ lè, a mii jo: «Kàfɔw Yawe, mii i mɔ nyɛ́ɛri, wo kùsulugi syɔɔ. Kanmìí na Zyakɔbi a ní fànʔa taa bi sɛ́ɛ? Níì cán wi n cɛ́rɛ n sɔ̀lɔ.» 3A Yawe kàdoʔo wáa gee bee pyele ma níì jo: «Gee bee a ní pye í.»
Yanyaa-ziin wógi: Náagi
4 #
Am 2:5
Gee Kàfɔw Yawe mii yaʔa a mii nyaa lè mii maa gi nyaa a Kàfɔw Yawe naà tɛ́ʔɛ n kútiiw joo, a náagi weekpɔɔ-cùrugi sórigo, ní i tári sórogi. 5A mii jo: «Kàfɔw Yawe, mii i mɔ nyɛ́ɛri, yére nya. Kanmìí na Zyakɔbi a fànʔa taa bi sɛ́ɛ? Níì cán wi n cɛ́rɛ n sɔ̀lɔ.» 6A Kàfɔw Yawe kàdoʔo wáa gee bee pyele ma níì jo: «Gee bee a ní pye í.»
Yanyaa-taanri wógi: Gûnzin-túnmɔnyini
7 #
Eza 34:11
Gee Kàfɔw tɛ̀ɛn mii na lè koro gi nyɛ gee naa, mii maa wi nyaa a wi yére gungo ǹjoʔo ni, gee ki da tímana n pye kiyɛɛ nyɔ́ɔ na lè, gûnzin-túnmɔnyinɛ#7:7 gûnzin-túnmɔnyinɛ: Gûnzin-túnmɔnyini bee i nyɛ mɛɛnnɛ, lee na be tunmɔnyinɛ pwɔɔ lè. Masɔnbèle falipye-yarigaa gii, gee ní be kpáayi faanri lè yi i síngi. si i nyɛ wi kɔ́gi ni. 8A Yawe mii pye: «Amɔsi, nyàʔá mɔ nyaa?» A mii wi yari: «Gûnzin-túnmɔnyinɛ mii nyaa.» A Kàfɔw jo: «Wéle, mii a gûnzin-túnmɔnyinɛ lége mii syɛ́ɛnbèle nínge ni pe lè Isirayɛli ye. Mii a tée ní be kùsulugi syɔɔ í. 9Izaaki sáriga-wòlo-tɛ́ɛyi a ba kpúmɔn kálagi. Isirayɛli ye tɛɛcǎnyi a ba kálagi. Mii a ba ŋɔsée láa bi yìri Zyerobowami kpáagi wòolo kurugo.»
Amɔsi n nɛnɛ n yirige Betɛli ni
10Lǎli bee ni Amasya wi pye lè Betɛli sáriga-wòlow, a woro tun be sa Isirayɛli fànʔafɔw Zyerobowami pye: «Amɔsi n nyɔɔ kúun mɔ na Isirayɛli kpáagi wòolo nínge ni. Tári syɛ̀ɛnnɛ a ní gbǎn wi syɛ́ɛnri myɛ kpàraco í. 11Níì cán Amɔsi i gi nyuu kánmi naa na níì jo:
‹Pe a Zyerobowami kpóo ní ŋɔsée ní,
Isirayɛli ye si cò bi yirige be tári ni bi kári léelige.› »
12A Amasya Amɔsi pye: «Yanyaaɔ mɔ, sɔ̀lɔ maa syée. Da fé maa syée mi sa tɛ́ɛn Zyuda tári ni maa líi yaà beè, máā kérigèle nyaagi maa nyuu yaà beè. 13Mɔ a ní kɔ́ ra kérigèle nyaagi bàā nyuu nɛɛ naa Betɛli ni í. Níì cán fànʔafɔw tɛɛcànga gii, ní fànʔafɔlɔ kpaʔa.»
14A Amɔsi Amasya pye: «Mii o nyɛ kanyaajooo í, wàlá kanyaajooo jáa í, yaweenaʔaɔ mii nyɛ, ní děsyaantiire sefalaɔ. 15Kàjáa Yawe n mii cò n lúrugo yaweeri kurugo, Yawe si n mii pye: ‹Da syée mi sa ra kérigèle nyaagi maa nyuu mii syɛ́ɛnbèle ma, pe lè Isirayɛli ye.› 16Tɔ́ɔliw ni ki n yɛlɛ mi Yawe syɛ́ɛnri lóʔo, mɔ wee wi gi joo lè níì jo: ‹Mɔ a kɔ́ ra kérigèle nyaagi bàā nyuu Isirayɛli ye kéeli na í, mɔ a kɔ́ ra nyuu Izaaki kpáagi wòolo kéele na í.› 17Gee bee na Yawe syɛ́ɛnri naa joo níì jo:
‹Mɔ céw a ba ra nànjaari kpéʔele kěgi ni.
Ŋɔséew a mɔ nanbiigèle,
ní mɔ calipiigèle kpóo cáan,
mɔ tári a tíla tíla ní mɛɛnnɛ ní bi lɛɛ.
Mɔ si na, mɔ a sa kùu tánɔnʔɔrɔ ni,
Isirayɛli ye si cò bi yirige be tári ni bi kári léelige.› »
Currently Selected:
Amɔsi 7: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
