Kapyegèle 16
16
Timɔte n pínɛ ní Pɔli, ní Silasi ní
1Koro kàdoʔo ma a Pɔli kári Dɛribe ma, ní náà kári Liisitiri ma. Pìitamawaa si maa pye yaà pe i wi yiri Timɔte, wi nɔ́ɔw maa pye Zyefuo, ní i nyɛ tágafɔlɔ, wi tóow si i nyɛ Girɛkio. 2Liisitiri ní Ikonyɔmi ye senyɛnbèle maa ni wi mɛ́ɛtaangi yiri. 3Pɔli maa ni caa wi kári ní woro ní. A wi wi kɔ́ri n sáà wi kɛ́nɛ Zyefubèle kéele na, bele pe da pye yaà lè tɛ́ɛyi bee ni, níì cán pe myɛ maa gi cán ncan wi tóow i nyɛ Girɛkio. 4Lǎli ni be forogi kěyi ni lè, a be i kérigèle nyuu ni tèé tágafɔbèle na, gele na pìitunbèle ní yɛɛ̀kinibèle da joo n bɛ̀ɛ lè Zyerusalɛmi ni níì jo paa gi kpéʔele nya. 5A egilizibèle i nìrí tágali ni, a pèle i taari be na, a be i nɛʔɛgi ni maa canʔa o canʔa.
Pɔli yanyaagi, n be yaʔa Turowasi ni
6Amɛɛ Pìicǎnni be yérige lè níì jo pe a kɔ́ sa Kolocɔlɔɔ syɛ́ɛnri joo Azii ni lè í, a be lúru n kári n sáà foro Firizii, ní Galasii tári ni. 7A pe ga nùuni Mizii tári na, a be i caa bi jée Bitinii tári ni. Kàjáa Zyezu Pǐli ga fɔ̀lɔ pe jée yaà í. 8A be foro Mizii ni n tìgi n kári Turowasi ma. 9A ki ga pye yébiligi ni, a Pɔli yanyaʔa nyaa, ki maa pye Maseduwani ye nànwaa, woyéreo ní, a wi jo: «Mii pɔʔɔ, mí jeli mi pan Maseduwani ma mi ba wolo dɛ̀ɛmɛ!» 10Pɔli yanyaagi bee kàdoʔo ma a wolo fala ni kanmaa caa bi kári Maseduwani ma, níì cán wolo maa gi fílige n cán ncan Kolocɔlɔɔ wi wolo yeri yaà, wolo í kári sa Syɛɛnjóocǎnri joo be ma.
Lidii n tága Kàfɔw na, n be yaʔa Filipikaʔa ni
11A wolo jée bàtowaa ni Turowasi taana ni syée zìnmɛ na n lǒgi jeli n kári Samotirasi ma, ki nyǐndaligi na a wolo nan Neyapolisi na, 12níì yiri nɛɛ bee n kári Filipikaʔa ma, kěgi bee i nyɛ Maseduwani tɛ́nɛmi kèkpɔʔɔ, ní wɔ́ɔ i nyɛ Wɔrɔmi ye kèkòrogaa. A wolo canyaa kwɔ́ɔ yaà kěgi bee ni.
13A Zyefubèle cândɛnɛgɛ canʔa ga nan, a wolo yiri kěgi ni n kári cábigi ma, ní i sɔ̀ngí dɔ̀ʔɔ́ pe a ra Kolocɔlɔɔ nyɛ́ɛri nɛɛ bee. A wolo zǐn sáà cébèle pèle nyaa a be i peyɛɛ gbóʔoro yaà, a wolo tɛ́ɛn ni nyuu ní be ní. 14Cewaa maa pye yaà be ni Tyatiiri ye wóo, wi maa ni fɛ̀ɛgí Kolocɔlɔɔ na pe i wi yiri Lidii. Wi maa pye fàninyɛɛɔn#16:14 fàninyɛɛɔn: Fàninyɛɛnw bee félege maa pye màsaabèle woleo. párafɔlɔ. Woro maa wi líiyi cáan ni Pɔli syɛ́ɛnri lúro, a Kàfɔw wi fúngi múgu, koro ga pye wi tága di na si di cò. 15A woro ní wi kpáagi wòolo batɛmiw kpéʔele, a wi náà wolo nyɛ́ɛri níì jo: «Yele ga ni mii córo tágafɔlɔ Kàfɔw ni, ye mii pɔʔɔ, yé sa tìrige mii kpaʔa ma.»
A wi joo n wári wolo na, a wolo fɔ̀lɔ.
Pɔli ye leli kéele kàsow ni Filipikaʔa ni
16Cangaa wolo maa ni syée Kolocɔlɔɔ tɛɛ̀nyɛɛrigi ni, a wolo sáà fàra ní pulocewaa ní, màdeo maa pye wi ni a wi i kérigèle nyaagi ni nyuu màdew bee báriga ni, a wi kàfɔbèle i lɔrɔ saʔa taagi nyaani bee báriga ni. 17A wee bee taʔa wolo na, wolo ní Pɔli ní, ní i yákpoli wáa níì jo: «Nǎnbèle naa i nyɛ Kolocɔlɔw falipyebèlē wi lè Pe Myɛ Nyúngo na, poro be nyɛ syɔɔli kólogo syɛ́ɛnrɛ joofɔɔlɔ yele ma.»
18Wi maa ni koro kpéʔele canya saʔa ni. A gi tɔ̀nɔ n kɔ́ baa Pɔli fɔ̀rɔ fúngi ni, a wi fíige wi ma níì joo ní màdew ní níì jo: «Mii a gi joo gbàn mɔ ma Zyezu Kirisi mɛ́ɛgi na, yiri céw ni.» A màdew fala n yiri wi ni lǎli bee wonijanna ni. 19A pulocew kàfɔɔlɔ ga gi nyaa poro a ní wáli taa wi ma í, a be Pɔli ní Silasi cò n kílele n kári fànʔafɔbèle ma, beè syɛ́ɛnmi piyɛɛ gbóʔoro lè. 20Ní sáà be yérige fànʔafɔbèle yɛ́ʔɛ ma níì jo: «Nǎnbèle naa tɔ̀nɔ i wolo kěgi súrugu ni caanri. Pe i nyɛ Zyefubéle. 21Pe i kalɛɛgèle kèle nyuu, gele ge lè ki ga yɛlɛ wolo í fɔ̀lɔ ge na í, pé náa kɔ́ jo wolo a ra ge kpéʔele wii í. Ncan wolo i nyɛ Wɔrɔmi ye wòolo.»
22A syɛ́ɛnmi yìri be kurugo. A fànʔafɔbèle be búroyi kíle n wòlo be na níì pèle pye paa be kpúmɔn ní kàgbeegèle ní. 23A be tɔ̀nɔ n be sámaga n kpúmɔn gbanʔama ní náà be le kàsow ni níì gi joo n gbàn kàsolebèle kɔ̀rɔsiifɔlɔ ma níì jo waa be kɔ̀rɔsíi gbanʔama. 24Amɛɛ wi syɛ́ɛnri bee lóʔo lè, a wi be lége kàsokpaagi fúngo kpaagaa ni, níì be tɔ́lɔyi le le tiitangaa félege ni níì gi sɔ̀ʔɔ.
25Lǎli ni nyǐngi lɛɛ lè, a Pɔli ní Silasi i Kolocɔlɔɔ nyɛ́ɛri, ní i ŋúu ni Kolocɔlɔɔ sòoló, a kàsolebèle i gee bee lúro be ma. 26A cɛɛri ga pye, a tári fala n cúngo gbanʔama, àlí kàsokpaagi kàpɔɔn maa wɔ́ɔ̀ cúngo, a kɔ̀riyi myɛ múgu, a kàsolebèle yapwɔɔrɔ myɛ sánʔana làrinijanni ni. 27A kàsolebèle kɔ̀rɔsiifɔlɔ ga yìri níì kàsokpaagi kɔ̀riyɔ nyaa womúguyo ní, a wi wi ŋɔséew kɔ́n. Wi mǎà dée wiyɛɛ gbóo ní i sɔ̀ngí kàsolebèle n yiri n fàn. 28Kàjáa a Pɔli yákpoli wáa gbanʔama níì jo: «Mɔ a kɔ́ yafyɛn kpéʔele miyɛɛ na í, wolo myɛ i naa.»
29Lǎli bee ni a kàsolebèle kɔ̀rɔsiifɔlɔ jo paa maa ní fètinnɛ ní, níì tìn n jée n sáà kpùmɔnɔ Pɔli ní Silasi taana, ní i cɛ̀lɛ́, 30níì be kɔ́ri n yirige kàfugi na ní baa be yíbe níì jo: «Ni kàfɔɔlɔ, nyàʔá gi yɛlɛ mii í kpéʔele si syɔɔ?» 31A be wi pye: «Mi tága Kàfɔw Zyezu na, mɔ a syɔɔ ní mɔ kpáagi wòolo ní.» 32A be Kàfɔw syɛ́ɛnrɛ joo wi ma, woro ní bele myɛ ní be pye yaà lè wi kpáagi ni. 33A wi be kɔ́ri lǎli bee wonijanna ni yébiligi ni n sáà be kpumɔnnamiyi jée be na, níì fala n wi batɛmiw kpéʔele ní wi wóbèle myɛ ní. 34Koro kàdoʔo ma a wi kári ní be ní wi kpaʔa ma n sáà be kaan a be lìi, ní i fundaanra kpéʔele gbanʔama n fàra wi kpáagi wòolo myɛ na, àmɛɛ poro taa n tága lè Kolocɔlɔɔ na.
35A nyǐngi ga tali, a fànʔafɔbèle sùlasiibèle pèle tun kàsolebèle kɔ̀rɔsiifɔlɔ ma a be sáà wi pye: «Nǎnbèle bee yaʔa.» 36A kàsolebèle kɔ̀rɔsiifɔlɔ syɛ́ɛnri bee joo Pɔli ma níì jo: «Fànʔafɔbèle n tun naa níì jo mii í yele yaʔa. Gee bee na yele a gbǎn yiri tɔ́ɔliw ni bàā syée fûnnyinge na.» 37Kàjáa a Pɔli sùlasiibèle pye: «Amɛɛ be wolo kpúmɔn lè syɛ́ɛnbèle nyɛ́nɛ na kútii-sìnjoo ni, wolo bele wo nyɛ lè Wɔrɔmi ye wɔ́rɔbiigéle, ní níì wolo le kàsow ni, si kɔ́ wolo yirige lé làrama ni? Eʔe dɛ! Fwɔɔ poro tiimaa í ba wolo yirige.»
38A sùlasiibèle sáà syɛ́ɛnri bee joo fànʔafɔbèle ma, àmɛɛ be lóʔo lè pe i nyɛ Wɔrɔmi ye wɔ́rɔbiigèle kèle, a be fyáa, 39níì kári n sáà be sùlu, níì be yirige kàsow ni, ní wɔ́ɔ̀ be nyɛ́ɛri níì jo: «Ye wolo pɔʔɔ yé yiri kěgi ni.» 40A pe ga yiri kàsow ni, a be sáà jée Lidii kpáagi ni, àmɛɛ be senyɛnbèle nyaa lè, a be be kɛɛlɛ, ní náà kári.
Currently Selected:
Kapyegèle 16: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
