Kapyegèle 12
12
Pe n Zyaki kpóo níì Pyɛri le kàsow ni
1Lǎli bee ni a fànʔafɔw Herodi too Egiliziw syɛ́ɛnbèle pèle wɔʔɔlɔ na. 2A wi Zyaki kpóo ní ŋɔsée ní wi pye lè Zyan yɛʔɛfɔw. 3A wi ga koro nyaa a gi Zyefubèle dɛ́nɛ, a wi ní sáà Pyɛri cò. (Gee bee maa pye levé fun búruw séri canya ni.) 4#Yir 12:1-27 Amɛɛ wi Pyɛri cò lè, a wi baa wi le kàsow ni, níì wi yaʔa sùlasiibéle sicɛrɛ-jɛrɛ tɛ́ɛyɛ sicɛrɛ ma níì jo paa wi kɔ̀rɔsíi taʔalagèlē taʔalagèlē, ní i gi sɔ̀ngí sɔ̀lɔ-mí-yaʔali séri kwɔ́ɔlɔ kadoʔo ma woro a wi yirige yérige Isirayɛli syɛ́ɛnbèle yɛ́ʔɛ ma. 5N Pyɛri yaʔa kàsow ni, a Egiliziw i Kolocɔlɔɔ nyɛ́ɛri wi kéeli na.
Pyɛri n yiri kàsow ni
6Cángee na Herodi da ni caa bi Pyɛri yirige bi yérige syɛ́ɛnmi yɛ́ʔɛ ma lè, sáni ki nan lè koro yébiligi ni Pyɛri maa ni ŋúnɔ sùlasiibéle siin nínge ni, pe si maa wi pwɔɔ ní nyɔ̀ʔɔdiriye siin ní, kàsokpaàwelebèle pèle si i nyɛ kpaaweeli nyɔ́ɔ na. 7A Kàfɔw tundunwaa pan terire, a gbɛ̀ɛnmɛ fala n pye kàsokpaagi ni. A tundunw baa Pyɛri kpúmɔn wi kótiiri ni n yìrige níì jo: «Yìri kelekele!» A nyɔ̀ʔɔdiriyi wòlo wi kɔ́yi na n too. 8A tundunw wi yari: «Mɔ sɛntiiriw láa mi pwɔɔ miyɛɛ na, mí mɔ taʔalayi le.» A wi gi kpéʔele ànbée. A wi níì gi joo wi ma níì jo: «Mɔ burogbɔɔgi le, mí taʔa mii na.»
9A Pyɛri yiri n taʔa wi na. Gee tundunw da ni kpéʔele lè, Pyɛri da gi cán ncan ki i nyɛ kányɛʔɛ í, wi maa ni gi sɔ̀ngí yanyaʔa woro nyaagi. 10A pe ga sɔ̀lɔ kpaàwele-tɛ́ɛgi wozelige ní siin wógi na, a be nan túnmɔri kɔ̀rigɔ na, beè syɛ́ɛnbèle yirigi kàsokpaagi ni ni jǐn kěgi ni lè. A kɔ̀rigi bee múgu kiyɛɛ ma pe yɛʔɛ̀ na. A be yiri n kàlari-kólogaa láa ni syée. A tundunw fala n núngo Pyɛri taana n kári.
11A yákirii náà jée Pyɛri ni a wi jo: «Tɔ́ɔliw ni mii n gi cán n fílige, ncan Kàfɔw wi wi tundunw tun a wi baa mii yirige Herodi kɔ́yi ni, ní wɔ́ɔ̀ mii syɔɔ gee myɛ ma Zyefubèle da ni sɔ̀ngí ki a ba kpéʔele mii na lè.»
12A wi ga kéeli bee sɔ̀ngi n kwɔ́ɔ, a wi kári Marii kpaʔa ma wi lè Zyan nɔ́ɔw, pe wɔ́ɔ i Zyanw bee yiri Mariki, syɛ̀ɛnnɛ saʔa maa peyɛɛ gbóʔoro nɛɛ bee ni Kolocɔlɔɔ nyɛ́ɛri. 13A Pyɛri sa ni nìkpaangi kɔ̀rigɔ kólo, a falipye-pìcaawaa kári n sáà líiyi cáan gi taana, pe i wi yiri Worodi. 14A wi Pyɛri yákpoli cán, wi si ga kɔ̀rigi múgu í fundaanri báriga ni, níì fàn n kári n sáà gi joo bele ma níì jo: «Pyɛri i yaà nìkpaanweeli nyɔ́ɔ na.» 15A be wi pye: «A mɔ tɔ̀ʔɔ̂ cúro lé wii?» Kàjáa a wi gi fílige n joo be ma níì jo: «Kányɛʔɛ gii.» A be jo: «Wi nyɛ̀ʔɛni tunduɔn wii.»
16Pyɛri si maa sèʔê pye yaà ni kɔ̀rigi kólo. A pe ga baa nìkpaanweeli múgu níì wi nyaa, a be i káama gi na. 17A wi kɔ́gi yìrige be ma níì jo be pyèri. Kánmee na Kàfɔw wi yirige kàsow ni lè, a wi gee bee joo n tɛ̀ɛn be na, ní wɔ́ɔ̀ be pye: «Ye sa kérigèle bee joo Zyaki ní senyɛnzanbèle ma.» Koro kàdoʔo ma a wi náà yiri n kári tɛɛgaa nikwɔɔ ma.
18A nyǐngi ga tali, a sùlasiibèle fúnyo curugo be na fwɔɔ n baa sɔ̀lɔ ki dǎnw myɛ na, a be i peyɛɛ yíbe bi gi cán mɛ̀ɛ́ Pyɛri pye n sɛ́ɛ. 19Kàjáa Herodi maa jo pe sa wi caa, pe si ga wi caa n nyaa í. A wi kpaàwelebèle yeri n baa yíbe, ní náà jo pe sa be kpóo. Koro kàdoʔo ma a Herodi yiri Zyude tári ni n kári Sezarikaʔa ma n sáà làlaa kwɔ́ɔ yaà.
Herodi kùúw kéele
20 Herodi fúngi maa tanʔa gbanʔama Tiiri ní Siidɔn ye kurugo keelaa na. A bele bee si bɛ̀ɛ nibin na, níì pínɛ n kári wi ma. Pe maa baa wi tɛɛ̀sinɛgi kpaàweleo kpéʔele poro tàannyɛnnɛ pe i wi yiri Bilasitusi, ní náa sa ni bɛ̀ɛ́li caa wi ma. Níì cán Herodi tári má pe yaliiri da ni yìrigí.
21Herodi maa cangaa tɛ́ʔɛ be ma, a cángi bee ga nan, a wi fànʔafɔ-búrogi le n tɛ́ɛn wi fàngoli ni, ní i joogbɔɔnni nyuu be ma. 22A syɛ́ɛnbèle myɛ i yákpogèle wáa níì jo: «Kolocɔlɔɔ yákpolo li nyɛ lee naa, syɔɔn wólo ban í.» 23Lǎli bee wonijanna ni a Kàfɔw tundunwaa baa wi kpúmɔn, àmɛɛ gi nyɛ lè wi ga Kolocɔlɔɔ kpɔ́ʔɔ í. A fyɛɛnrɛ fala n jée wi ni n wi káa n kpóo.
24 Kàfɔw syɛ́ɛnrɛ si maa ni jáari ni syée yɛʔɛ̀ ma, a kàa i fàrá di na.
25Lǎli ni Barinabasi ní Sɔli sáà tundunri kpéʔele n kwɔ́ɔ lè, a be yiri Zyerusalɛmi ni n lúru ni syée, pe si maa Zyan kɔ́ri n pínɛ ní peyɛɛ ní, wee be yiri lè Mariki.
Currently Selected:
Kapyegèle 12: CB10
Highlight
Copy
Compare
Share
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
